¿Tleka tecnología uelis kijtlakos mokuayejyekol?
Nochipa timomachtiaj ijkuak tiauij escuela, titekipanotiuij noso tikchiuaj okseki tlamantli. Tikajsij miak tlamantli itech celulares uan tabletas uan amo moneki kanaj tiaskej.
Akinmej sapanoua kitaj tecnología uelis kinpanos nin:
-
Okse tlamantli mokuayejyekojtokej ijkuak itlaj kitlajtoltijtokej.
-
Amo uelis san se tlamantli mokuayejyekoskej.
-
San niman mosotlauaj ijkuak katej inselti.
MONEKI TIKMATIS
IJKUAK ITLAJ TIKTLAJTOLTIS
Sekimej ijkuak itlaj kitlajtoltiaj amo kitlajtoltiaj nochi ken moneki uan seki tlamantli amo kajsikamati.
Ijkuak itlaj tiknekij tikmatiskej, moneki san totoka itlaj tiktlajtoltiskej pero tla tiknekij itlaj timomachtiskej uan tiknekij tikajsikamatiskej, moneki yolik tiktlajtoltiskej.
XIMOKUAYEJYEKO: ¿Tikita oui tiktlajtoltis itlaj tlen amo tsikitsin? ¿Tleka tikijtoskia moneki timochijchikauas uan ijkon tikajsikamatis tlen tiktlajtoltia? (PROVERBIOS 18:15).
XIMOKUAYEJYEKO SAN SE TLAMANTLI
Sekimej mokuayejyekouaj ika incelular noso intableta ueli kintlajkuililiaj akinmej inmiuan mouikaj uan noijki ueli momachtiaj. Pero tla tikchijtoskej ome tlamantli, amitlaj kuali kisas porque amo kuali timokuayejyekoskej.
Moneki ma timochijchikauakan para san se tlamantli timokuayejyekoskej. Se ichpochtli tlen itoka Grace okijto: “Ijkuak san se tlamantli timokuayejyekouaj kuali kisa tlen tikchijtokej uan amo kuali kisa tla tikchijtokej miak tlamantli”.
XIMOKUAYEJYEKO: ¿Tikita oui tikajsikamatis uan tikilnamiktos tlen timomachtia ijkuak tikchijtok miak tlamantli? (PROVERBIOS 17:24).
IJKUAK TIKA MOSELTI
Sekimej amo kinpaktia yetoskej inselti, ik non, san kitaj incelular noso intableta. Se siuatl tlen itoka Olivia okijto: “Amo ueli niyeto nion 15 minutos tla amo nikita nocelular, notableta noso televisión porque san niman nimosotlaua”.
Pero tinochtin moneki timokuayejyekoskej tlen timomachtiaj, moneki tiyetoskej toselti ijkon timomachtiskej miak tlamantli.
XIMOKUAYEJYEKO: ¿Timokuayejyekoua ijkuak tika moselti? (1 TIMOTEO 4:15).
¿TLEN UELIS TIKCHIUAS?
¿KEN TIKITA TECNOLOGÍA?
¿Ken mitspaleuis tecnología timomachtis tlen moneki? ¿Ken uelis kichiuas amo ximokuayejyeko tlen timomachtijtok?
PRINCIPIO BÍBLICO: “Xikmalui ixtlamatilistli tlen mitspaleuia uan mokuayejyekolis” (PROVERBIOS 3:21).
