¿Tleka tecnología uelis kinmijtlakos mokoneuan?
Axkan ixtlamatkej kijtouaj konemej okachi kimatij tecnología uan akinmej yikipiaj miak xiuitl amo okachi kimatij, ik non, okachi kitaj oui tecnología.
Sekimej kijtouaj tla konemej nochipa kipiaj se dispositivo electrónico uelis ijkin kinpanos:
-
Ayakmo uelis kikauaskej.
-
Uelis tetlajyouiltiskej noso kintlajyouiltiskej.
-
Uelis kitaskej pornografía maski amo kitemoskej.
MONEKI TIKMATIS
AYAKMO UELIS KIKAUASKEJ
Seki tlamantli sapanoua kinpaktia konemej, ken mauiltiskej porque ijkon kinchijchiuaj aplicaciones. Amochtli En defensa de la conversación kijtoua: “Itech internet uan aplicaciones kichiuaj para nochipa xikinmita”. Ijkuak okachi tikitaj tlen kinemakaj itech internet, okachi kitlanij tomin akinmej non kitlaliaj.
XIMOKUAYEJYEKO: ¿Namokoneuan nochipa kinmitaj incelular noso intableta? ¿Ken uelis tikinpaleuis ma kichiuakan tlen okachi ipati? (EFESIOS 5:15, 16).
KINTLAJYOUILTISKEJ
Akinmej okachi katej itech internet, okachi teuijuikaltiaj, amo tetlakaitaj uan amo teiknomatij, ik non, tetlajyouiltiaj.
Sekimej ijkon kichiuaj porque kinekij miakej ma kinmixmatikan. Sekimej kijtouaj kintlajyouiltiaj tla amo kinyoleuaj inmiuan ma yetokan itech se iluitl.
XIMOKUAYEJYEKO: ¿Tetlakaitaj mokoneuan ijkuak motlapouiaj iuan oksekimej itech internet? (Efesios 4:31). ¿Ken momachiliaj tla sekimej amo kinyoleuaj inmiuan ma yetokan?
PORNOGRAFÍA
Axkan okachi san niman uelis kajsiskej pornografía itech internet. Maski tetajmej kitlaliliaj seki tlamantli incelular noso intlableta ok uelis monextis pornografía uan konemej uelis kitaskej.
Sextear kijtosneki kititlanij noso kintitlaniliaj mensajes, fotos uan okseki tlamantli kanin mota kinekij auilnemiskej. Ualeua akinmej ijkon kichiuaj uelis kinteluiskej inmixpan tekiuajkej uan kijtoskej kichiuaj noso kiteititiaj pornografía kanin motaj konemej.
XIMOKUAYEJYEKO: ¿Ken uelis tikinpaleuis mokoneuan amo ma kitakan nion ma kititlanikan itech internet kanin mota auilnemij? (EFESIOS 5:3, 4).
UELIS IJKIN TIKCHIUAS
XIKINMACHTI MOKONEUAN
Maski konemej amo kitaj oui tecnología, moneki ikaj kinyekanas. Amochtli Indistraíble kijtoua ijkuak se konetl amo kixmati se dispositivo electrónico uan kimakaj, yetoskia ken ijkuak ikaj kikaua ma motlamotla ijtik atl maski amo kimati ajkuis.
PRINCIPIO BÍBLICO: “Kuali xikmachti chokotsin para kuali ma uia uan maski kipias miak xiuitl kichiuas tlen kuali” (PROVERBIOS 22:6).
Nikan ijkuilitok seki tlamantli, xikpejpena tlen tikneki tikchiuas noso xikijkuilo okseki tlamantli:
-
Nikiluis nokone ma tetlakaita ijkuak motlapouia iuan oksekimej itech internet.
-
Nikpaleuis amo ma moyolkoko tla sekimej amo kiyoleuaj inmiuan ma yeto.
-
Nikchiuas seki tlamantli para amo ma kita tlen amo kuali itech internet.
-
Nochipa nikitas tlen kita nokone itech iteléfono.
-
Nikiluis keski hora kipias se celular noso se tableta.
-
Nikiluis amo ma kipia ijkuak yikochiti.
-
Niknauatis amo ma kipia ijkuak titlakuaj.
