Jehová okiluiaya “noyolikni”
“Pero te oh Israel, tinotekipanojka, te oh Jacob, akin onikpejpenki, iixuiuan Abrahán, noyolikni” (ISAÍAS 41:8).
1, 2. (1) ¿Tleka tikijtoaj uelis timouikaskej iuan toTajtsin Dios? (2) ¿Tlen timomachtiskej axkan?
IJKUAK tinesij hasta ijkuak timikij, tiknekij ma techtlasojtlakan. Tinochtin moneki ma tikinpiakan toyolikniuan akinmej techtlasojtlaj, uan amo san ken ijkuak motlasojtlaj se siuatl uan se tlakatl. Tinochtin moneki kuali ma timouikakan iuan toTajtsin Dios uan noijki ma techtlasojtla. Miakej kineltokaj amo uelis timouikaskej iuan toTajtsin Dios, pampa ye kipia miak chikaualistli uan amo tikitaj. Pero tikmatij kema uelis timouikaskej iuan toTajtsin Dios.
2 ¿Tleka ijkon tikijtoaj? Pampa itech Biblia tikinmajsij intoka sekimej tlaltikpaktlakamej tlen omouikayaj iuan toTajtsin Dios. Miak ipati intech ma timokuayejyekokan uan ma tikchiuakan ken yejuan. ¿Tleka? Pampa timouikaskej iuan toTajtsin Dios non tlen okachi kuali uelis tikpiaskej. Axkan timomachtiskej itech Abrahán (xiktlajtolti Santiago 2:23). ToTajtsin Dios uan Abrahán kuali omouikayaj, pampa Abrahán otlaneltokaya itech Jehová. Ik non, Biblia kijtoa: “Abraham omochiwako teta de nochteh akimeh milák kineltokah Dios” (Romanos 4:11). Itech nin tlamachtil uelis timotlajtlaniskej: “¿Tlen uelis nikchiuas pampa nitlaneltokas ijkon ken Abrahán uan kuali nimouikas iuan toTajtsin Dios?”.
¿TLEKA ABRAHÁN KUALI OMOUIKAYA IUAN JEHOVÁ?
3, 4. (1) ¿Ken omotak Abrahán melauak otlaneltokaya itech Jehová? (2) Pampa otlaneltokaya, ¿tlen okimatiaya?
3 Ximokuayejyeko Abrahán akin yikipia 125 xiuitl yolik tlejkoti ipan se tepetl. [1] (Xikita nota kanin tlami tlamachtil). Noijki iuan oyaya Isaac, akin okipiaya 25 xiuitl. Abrahán okiuikaya se cuchillo uan tlen ika kixotlaltiskia kuauitl. Uan Isaac okiuikaya kuauitl. Nin tlamantli uelis sapanoa oui, pampa Abrahán amo keman ijkon okichiuaya. Uan amo pampa ayakmo okipiaya chikaualistli, pampa ye ok chikauak okatka. Sapanoa oui pampa ye okimatiaya omonekiaya kimiktiskia ikone, Isaac, pampa ijkon kitlamaniliskia Jehová, ijkon ken okinauati (Génesis 22:1-8).
Abrahán amo san nenka okitlakamatki Jehová. Okichi pampa itech otlaneltokaya.
4 Itech non tonal melauak okitakej kox Abrahán melauak otlaneltokaya itech Jehová. Sekimej kijtoaj toTajtsin Dios amo yolkuali pampa okilui Abrahán ma kimikti ikone. Oksekimej kijtoaj Abrahán okinekiaya kimiktis ikone pampa amo okitlasojtlaya. Akinmej ijkon mokuayejyekoaj amo tlaneltokaj uan amo kimatij tlen kijtosneki tlaneltokilistli (1 Corintios 2:14-16). Abrahán kuali omokuayejyeko tlen kichiuaskia, ik non, okitlakamatki Jehová. Okitlakamatki pampa melauak itech otlaneltokaya. Ye kuali okimatiaya Jehová amo keman kiluiskia ma kichiua itlaj tlen kitlajyouiltiskia. Uan noijki kuali okimatiaya tla kitlakamatiskia Jehová, ye kiteochiuaskia. Pampa ijkon uelis tlaneltokaskia, Abrahán omonekiaya ma kipia tlamatilistli uan tlen okipanok. ¿Ken okipixki?
5. (1) Abrahán, ¿ken okixmatki Jehová? (2) ¿Ken tlamatilistli okipaleui Abrahán?
5 Tlamatilistli. Abrahán oneski itech se altepetl tlen omotokayotiaya Ur. Ompa tlaltikpaktlakamej okinueyichiuayaj teotsitsintin. Uan Taré, itajtsin Abrahán noijki okinueyichiuaya (Josué 24:2). Abrahán, ¿ken okixmatki Jehová? Biblia techiluia ikojkol okatka Sem, ikone Noé. Uan Sem omikik ijkuak Abrahán okipiaya kanaj 150 xiuitl. Sem melauak otlaneltokaya itech Jehová, uan uelis noijki okintlapoui ikalchanejkauan itech Jehová. Uelis ijkon Abrahán okixmatki Jehová. Pampa nochi tlen okimatiaya, Abrahán okitlasojtlak Jehová uan itech otlaneltokak.
6, 7. ¿Tlen okipanok Abrahán pampa uelis kipiaskia chikauak itlaneltokilis?
6 Tlen okipanok. ¿Tlen okipanok Abrahán pampa uelis kipiaskia chikauak itlaneltokilis? Sekimej kijtoaj tlamatilistli mouika iuan tlen tikmachiliaj, uan tlen tikmachiliaj techpaleuia itlaj ma tikchiuakan. Uan ijkon okipanok Abrahán. Ye okimatki miak tlamantli itech toTajtsin Dios. Tlamatilistli okichi melauak ma kitlakaita Jehová, akin melauak toTajtsin Dios (Génesis 14:22). Biblia kijtoa sapanoa okitlakaitaya (Hebreos 5:7). Uan tlen okimachiliaya okipaleui nochipa ma kitlakamati Jehová. Tla tiknekij kuali timouikaskej iuan Jehová, moneki ma tiktlakaitakan (Salmo 25:14).
7 ToTajtsin Dios okinauati Abrahán uan Sara ma kisakan itech altepetl Ur uan ma chantitij itech okse tlali tlen amo okixmatiayaj. Yokipiayaj miak xiuitl, ayakmo okatkaj telpokamej, uan axkan omonekiaya chantiskej itech mantajkalmej. Noijki Abrahán okimatiaya sapanoa tlajyouiskiaj. Pero okinekiaya kitlakamatis Jehová. Uan ken ye otetlakamatki, Jehová okiteochi uan okimalui. Se neskayotl, Biblia kijtoa ome uelta okiuikakej Sara pampa kuajkualtsin omotaya. Ik non, Abrahán uelis kimiktiskiaj. Pero ika se milagro Jehová okimalui Abrahán uan Sara (Génesis 12:10-20; 20:2-7, 10-12, 17, 18). Nochi nin okichika itlaneltokilis Abrahán.
8. ¿Ken uelis okachi kuali timouikaskej iuan Jehová?
8 ¿Uan tejuan uelis timouikaskej iuan Jehová? Kema. Ijkon ken Abrahán uelis techpaleuis tlamatilistli uan tlen techpanoa. ¿Ken uelis tikpiaskej tlamatilistli? Achto moneki tikmatiskej itech Jehová. Abrahán amo okipiaya nochi Biblia, pero tejuan kema (Daniel 12:4; Romanos 11:33). Itech Biblia onka miak tlamantli tlen uelis tikmatiskej itech toTajtsin Dios. Tlen tikmatiskej kichiuas ma tiktlasojtlakan uan ma tiktlakaitakan. Uan tlen tikmachiliaj kichiuas ma tiktlakamatikan. Ijkuakon ye techmaluis uan techteochiuas, ijkon tikmatiskej miak tlamantli pampa tlen techpanoa, uan totlaneltokilis mochikauas. Tla ika nochi toyolo tiktekichiuiliaj Jehová tiyolpakiskej uan tikpiaskej yolseuilistli (Salmo 34:8; Proverbios 10:22). Tla okachi tikmatij itech Jehová uan techpanoa miak tlamantli, okachi kuali iuan timouikaskej.
¿KEN OMOMALUI ABRAHÁN PAMPA KUALI MOUIKASKIA IUAN JEHOVÁ?
9, 10. (1) ¿Tlen uelis tikchiuaskej pampa timouikaskej iuan toTajtsin Dios? (2) ¿Ken omomalui Abrahán pampa kuali mouikaskia iuan Jehová?
9 Kuali timouikaskej iuan ikaj, sapanoa miak ipati. Tla tiknekij kuali timouikaskej, moneki tikmaluiskej (xiktlajtolti Proverbios 17:17 *). Nin amo ken se ueyi kali kanin amo ikaj chanti. Timouikaskej iuan ikaj yetoskia ken se xochitl tlen moneki tikmaluiskej. Abrahán okimatiaya miak ipati kuali ma mouika iuan Jehová. Ik non, nochipa okimalui. ¿Ken okichi?
Pampa kuali timouikaskej iuan Jehová moneki ma tikmaluikan ken se xochitl.
10 Abrahán omochijchika pampa nochipa kitlakamatis uan kitlakaitas toTajtsin Dios. Se neskayotl, ijkuak ikalchanejkauan uan itekipanojkauan oyajtokaj itech altepetl tlen okinmilui toTajtsin Dios, ye nochipa okinekiaya ma kiyekana toTajtsin Dios maski amo okachi ipati tlen kichiuaskia. Se xiuitl achto nesiskia Isaac, Jehová okinauati Abrahán ma kinchiuili circuncisión nochtin tlakamej tlen okatkaj ikalijtik. Ijkuakon Abrahán okipiaya 99 xiuitl. ¿Tlen okichi? ¿Omokuayejyeko tleka Jehová ijkon okinauati? ¿Amo okinekiaya kitlakamatis nin tlanauatil? Amo. Ye otlaneltokak itech toTajtsin Dios uan okitlakamatki (Génesis 17:10-14, 23).
11. (1) ¿Tlen okitekipachoaya Abrahán? (2) ¿Ken okipaleui Jehová?
11 Abrahán kuali omouikaya iuan Jehová pampa nochipa itech otlaneltokaya. Okineltokaya san tlen tlamantli uelis kitlapouiskia, uan noijki miak tlamantli tlen amo okajsikamatiaya. Se neskayotl, ijkuak Jehová okilui kinmixpoloskia nochtin akinmej ochantiayaj Sodoma uan Gomorra, Abrahán sapanoa omotekipacho. ¿Tleka? Pampa okineltokaya mikiskiaj akinmej amo yolkualmej uan noijki yolkualmej. Uelis omokuayejyekoaya itech Lot akin okatka isobrino uan ikalchanejkauan, akinmej ochantiayaj Sodoma. Pero otlaneltokaya itech Jehová, akin nochipa kichiua tlen melauak. Ik non, ika yolyamanilistli okilui toTajtsin Dios tlen okitekipachoaya. ¿Ken okipaleui Jehová? Ika miak yolseuilistli okipaleui ma kita ye teiknomati. Okiyekilui ijkuak ye kinmixkomaka tlaltikpaktlakamej, ye kintemoa akinmej yolkualmej uan kinmakixtia (Génesis 18:22-33).
12, 13. (1) Ijkuak Jehová okilui Abrahán ma kitemaka Isaac ken se tlamanali, ¿ken okipaleui tlamatilistli uan tlen okipanok? (2) ¿Tleka tikmatij Abrahán otlaneltokaya itech Jehová?
12 Tlamatilistli uan tlen okipanok Abrahán okipaleui ma momalui pampa kuali mouikaskia iuan Jehová. Ik non, ijkuak Jehová okilui Abrahán ma kitemaka Isaac ken se tlamanali, Abrahán kuali okimatiaya toTajtsin Dios kichiua tlen kuali, kimati mochia uan teiknomati. Kuali okimatiaya Jehová amo opejki kichiua tlen amo kuali. ¿Tleka ijkon tikijtoaj?
13 Ijkuak Abrahán yoajsitoka itech tepetl, ye okinmilui itekipanojkauan: “Nikan ximokauakan iuan burro, pero telpochtli uan ne tiknekij nepa tiaskej uan titlaueyichiuatiuij uan oksepa timokuepaskej” (Génesis 22:5). ¿Tleka okinmilui Isaac oksepa iuan mokuepaskia? ¿Okinkajkaya? Amo. Biblia techiluia Abrahán kuali okimatiaya Jehová uelis kiyolitiskia Isaac (xiktlajtolti Hebreos 11:19). Ye kuali okimatiaya Jehová okichi ye uan Sara ma kipiakan se inkone maski yokipiayaj miak xiuitl (Hebreos 11:11, 12, 18). Ye okimatiaya Jehová nochi uelis kichiuaskia. Maski ye amo okimatiaya tlen panoskia non tonal. Ye otlaneltokaya maski Isaac mikiskia, Jehová kiyolitiskia pampa ma mochiua itlanekilis. Ik non, Biblia kijtoa Abrahán “omochiwako teta de nochteh akimeh milák kineltokah Dios”.
Abrahán okineltokaya tla Isaac mikiskia, Jehová uelis kiyolitiskia pampa ma mochiua itlanekilis.
14. (1) ¿Tlen ouijkayotl kipiaj sekimej itekipanojkauan toTajtsin Dios? (2) ¿Ken techpaleuia ineskayo Abrahán?
14 Axkan Jehová amo techiluia ma tikintemakakan tokoneuan ken se tlamanali. Pero kema techiluia ma tikintlakamatikan itlanauatiluan. Ualeua amo tikmatij tleka techiluia itlaj ma tikchiuakan. Noso uelis oui tiktlakamatiskej. Sekimej tikitaj oui titetlapouiskej pampa tipinauaj uan amo okachi timotlapouiaj iuan akinmej amo tikinmixmatij. Oksekimej uelis timomojtiaj pampa amo tikchiuaj ken akinmej iuan titekitij noso timomachtiaj (Éxodo 23:2; 1 Tesalonicenses 2:2). Tla ijkon timomachiliaj, ¿tlen uelis tikchiuaskej? Ma tikilnamikikan ineskayo Abrahán, ye otlaneltokaya uan okatka yolchikauak. Tla tikxeloaj kauitl pampa timokuayejyekoskej itech tlen okichijkej tlakamej uan siuamej ken ye, uelis noijki ijkon tikchiuaskej uan okachi kuali timouikaskej iuan Jehová (Hebreos 12:1, 2).
TECHYOLPAKTIA TIMOUIKASKEJ IUAN JEHOVÁ
15. ¿Tleka tikijtoaj Abrahán amo omoyolkoko kitlakamatis Jehová?
15 Abrahán amo keman okiyolkoko kitlakamatis Jehová. ¿Tleka ijkon tikijtoaj? Pampa Biblia kijtoa ijkuak Abrahán omikik okipiaya 175 xiuitl, yokatka ueyi uan sapanoa oyolpakik itech inemilis (Génesis 25:8). Nin amo kijtosneki Abrahán ayakmo okinekiaya yoltos. Nin kijtosneki ye oyolpakiaya pampa nochi tlen okichi. ¿Tleka? Pampa itech nochi iyolilis sapanoa okipatioitaya kuali mouikas iuan Jehová.
16. ¿Tleka ijkuak oksepa yoltos Abrahán yolpakis?
16 Biblia kijtoa Abrahán “okinekia kitas neká altepetl non kuali yektlakxilitok iwa ayik wetsis, non altepetl Dios okimájmanki iwa okichijchi” (Hebreos 11:10). Nin altepetl kijtosneki iTekiuajkayo toTajtsin Dios. Abrahán okineltokaya se tonal kitaskia non “altepetl” tlanauatijtoskia ipan Tlaltikpak. Uan ijkon mochiuas. Ximokuayejyeko ken Abrahán sapanoa yolpakis ijkuak yoltos itech Xochitlali uan okachi kuali mouikas iuan Jehová. Yolpakis miak ijkuak kimatis itech miak xiuitl itlaneltokilis okinpaleui miakej itekipanojkauan Jehová. Kimatis nochi tlen okichi iuan Isaac itech non tepetl okineskayoti itlaj tlen sapanoa miak ipati tlen omochi miak xiuitl satepan (Hebreos 11:19). Uan kimatis nochi tlen okiyolkoko ijkuak kimiktiskiaj Isaac okinpaleui miakej itekipanojkauan Jehová tlen yolmelajkej. ¿Tleka? Pampa okinpaleui ma kimatikan ken omoyolkoko Jehová ijkuak okiualtitlanki Jesús ma mikiki topampa (Juan 3:16). Ineskayo Abrahán techpaleuia ma tikpatioitakan imikilis Jesús, amo ikaj otechititi ijkon techtlasojtla.
17.(1) ¿Tlen moneki ma tikchiuakan? (2) ¿Tlen timomachtiskej chikome?
17 Ma timochijchikauakan pampa nochipa ma titlaneltokakan ken Abrahán. Ijkon ken Abrahán, tejuan noijki tiknekij tlamatilistli uan seki tlamantli ma techpano. Tla okachi timomachtiaj itech Jehová uan tiktlakamatij, tikitaskej ken techteochiua uan techmaluia (xiktlajtolti Hebreos 6:10-12). Ijkon nochipa uelis kuali timouikaskej iuan Jehová. Chikome tikitaskej inneskayo eyi itekipanojkauan Jehová tlen noijki kuali iuan omouikakej.
^ [1] (Párrafo 3). Achto Abrahán uan Sara omotokayotiayaj Abrán uan Sarai, pero Jehová okinpatili intoka. Itech nin tlamachtil tiktekitiltiaj tokayotl tlen Jehová okintlalili.
^ párr. 9 Proverbios 17:17 kijtoa: “Se melauak toyolikni nochipa kiteititia techtlasojtla, uan ye se tokni tlen kajki ijkuak timoyolkokoaj”.
