Ma tiyetokan tiyolmelajkej iixpan Jehová
“Jehová ma yeto itech te uan ne uan itech moxuiuan uan noxuiuan nochipa” (1 SAMUEL 20:42).
1, 2. ¿Tleka techtlajtlachialtia Jonatán omouikak iuan David?
JONATÁN omotlajtlachialti pampa David okatka yolchikauak. Nin telpochtli yolchikauak yikin okimikti se tlakatl uejkapantik tlen omotokayotiaya Goliat uan itsonteko okiuikili Saúl, akin okatka ueyi tekiua uan itajtsin Jonatán (1 Samuel 17:57). Jonatán okajsikamatiaya toTajtsin Dios okipaleuijtoka David. Itech non tonal ik tlayekapan Jonatán uan David kuali omouikakej. Uan omokajkej yetoskej yolmelajkej (1 Samuel 18:1-3). Uan ijkon opanok.
2 Techtlajtlachialtia tikmatiskej Jonatán kuali omouikak iuan David. ¿Tleka? Pampa Jonatán okatka ikone ueyi tekiua Saúl. Ik non, Jonatán ye peuaskia tlanauatiskia itech ueyi altepetl Israel ijkuak mikiskia itajtsin. Pero Jehová okijto Jonatán amo tlanauatiskia, axkan tlanauatiskia David. Pero Jonatán okiteititi yolmelajki iuan David. Ijkuak Saúl okitemoaya David pampa kimiktiskia, Jonatán omotekipacho itech iyolikni. Ken ye okimatiaya David omotlati kanin tlauaki itech Hores, Jonatán ompa oyajki uan okilui ma tlaneltoka itech Jehová. Okilui: “Amo ximomojti, pampa notajtsin Saúl amo mitsajsis; te tiyetos ueyi tekiua itech Israel, uan ne ojpa motech niyetos” (1 Samuel 23:16, 17).
3. (1) ¿Tlen okachi okipatioitaya Jonatán? (2) ¿Tleka tikmatij non tlen okachi okipatioitaya? (Xikita tlaixkopinal tlen ika peua tlamachtil).
3 Tinochtin techpaktia tlaltikpaktlakamej ma yetokan yolmelajkej. Pero ¿techpaktia ineskayo Jonatán san pampa okatka yolmelajki iuan David? Amo. Techpaktia pampa ye okachi okipatioitaya yetos yolmelajki iixpan toTajtsin Dios. Ik non, okatka yolmelajki iuan David uan amo ochauatik. Jonatán noijki okipaleui pampa okachi ma tlaneltoka itech Jehová. Yejuan okatkaj yolmelajkej uan noijki iixpan Jehová. Okichijkej ijkon ken okijtojkej: “Jehová ma yeto itech te uan ne uan itech moxuiuan uan noxuiuan nochipa” (1 Samuel 20:42).
4. (1) ¿Tlen techyolpaktia uan kichiua kuali ma timomachilikan? (2) ¿Tlen timomachtiskej axkan?
4 Tejuan noijki moneki tiyetoskej tiyolmelajkej iuan tokalchanejkauan, toyolikniuan uan tokniuan itech tlanechikol (1 Tesalonicenses 2:10, 11). Pero okachi moneki tiyetoskej tiyolmelajkej iixpan Jehová pampa ye otechchijchi (Apocalipsis 4:11). Sapanoa tiyolpakij uan kuali timomachiliaj tla tiyolmelajkej iixpan Jehová. Pero tikmatij moneki ijkon tikchiuaskej maski titlajyouiskej. Axkan timomachtiskej ken ineskayo Jonatán techpaleuia ma tiyetokan tiyolmelajkej iixpan Jehová itech naui tlamantli. Ijkuak tikneltokaj ikaj akin tlayekana amo moneki ma tiktlakaitakan. Ijkuak moneki tikpejpenaskej iuan akin tiyetoskej tiyolmelajkej. Ijkuak se tokni akin tlayekana techchiuilia itlaj amo kuali. Uan ijkuak tikitaj oui tikchiuaskej ken otikijtojkej.
IJKUAK TIMOKUAYEJYEKOAJ IKAJ AKIN TLAYEKANA AMO MONEKI TIKTLAKAITASKEJ
5. ¿Tleka okatka oui pampa israelitas yetoskej yolmelajkej iixpan Jehová ijkuak otlanauatijtoka Saúl?
5 Jonatán uan oksekimej israelitas okipiayaj se ouijkayotl. Saúl otlanauatijtoka ipatka Jehová itech Israel, pero okichi miak tlamantli amo kuali (1 Crónicas 29:23). Ken amo otetlakamatki, Jehová ayakmo okiseli ken ueyi tekiua itech Israel (1 Samuel 15:17-23). Pero Jehová ok okikauili Saúl ma tlanauati miak xiuitl. Ik non, israelitas uan Jonatán okitakej oui yetoskej yolmelajkej iixpan Jehová.
6. ¿Tleka tikijtoaj Jonatán okatka yolmelajki iixpan Jehová?
6 Jonatán okatka yolmelajki iixpan Jehová. ¿Tleka ijkon tikijtoaj? Ijkon tikijtoaj pampa nochi tlen okichi ijkuak Saúl ayakmo okitlakamatki Jehová (1 Samuel 13:13, 14). Ijkuakon se ueyi altepetl tlen okinpiaya 30,000 (treinta mil) carros tlen ika omoteuiayaj okinekiaya kimoaxkatis ueyi altepetl Israel. Uan israelitas san okinpiayaj 600 soldados. Uan san Saúl uan Jonatán okipiayaj tlen ika moteuiskej. Pero Jonatán amo omomojtiaya. Ye okilnamikiaya teotlajtojki Samuel okijto: “Jehová amo kikauas ialtepe, pampa itoka ueyititok, Jehová ipan kinuika pampa ma mochiuakan ialtepe” (1 Samuel 12:22). Ik non, Jonatán okilui se soldado: “Pampa Jehová amo itlaj kitsakuilia techmakixtis ika miakej noso amo miakej”. Uan yejuan ome oyajkej uan okinmiktijkej kanaj 20 soldados. Jonatán melauak otlaneltokaya itech Jehová. Uan Jehová okiteochi. Jehová okichi ma tlalolini, uan soldados omomojtijkej uan opejkej momiktiaj. Ijkon israelitas otlatlankej (1 Samuel 13:5, 15, 22; 14:1, 2, 6, 14, 15, 20).
7. ¿Tlen okichi Jonatán iuan itajtsin?
7 Maski ueyi tekiua Saúl amo okitlakamatiaya Jehová, Jonatán omochijchika kitlakamatis itajtsin, ijkuak omonekiaya kichiuas. Se neskayotl, iuan oyajki pampa moteuiskej iuan akinmej okinekiayaj kimoaxkatiskej ialtepe Jehová (1 Samuel 31:1, 2).
8, 9. ¿Tleka moneki tikintlakaitaskej akinmej techyekanaj?
8 ¿Ken uelis tikchiuaskej ken Jonatán uan tiyetoskej tiyolmelajkej iixpan Jehová? Timochijchikauaskej tikintlakamatiskej tekiuajkej itech toaltepe, tla ijkon moneki. Jehová kinkauilia “n tekiwajkeh” ma tlanauatikan uan noijki kineki ma tikintlakaitakan (xiktlajtolti Romanos 13:1, 2). Ik non, tikintlakaitaj nochtin akinmej tlanauatiaj, maski sekimej kichiuaj tlen amo kuali noso tikneltokaj amo moneki tikintlakaitaskej. Jehová noijki kineki ma tikintlakaitakan nochtin akinmej okintlali ma techyekanakan itech tokalchanejkauan uan itech tlanechikol (1 Corintios 11:3; Hebreos 13:17).
Tiyolmelajkej iixpan Jehová tla tiktlakaitaj tonamik maski amo iTlaixpantijka Jehová. (Xikita párrafo 9).
9 Ma tikitakan ineskayo Olga, ye chanti itech ueyi altepetl Bolivia, ye okiteititi yolmelajkayotl iixpan Jehová. [1] (Xikita nota kanin tlami tlamachtil). Inamik sapanoa okitlajyouiltiaya. Ualeua inamik tokni amo okitlapouiaya noso okiluiaya miak tlamantli amo kuali pampa ye se iTlaixpantijka Jehová. Uan noijki okilui kikauaskia uan kinuikaskia inkoneuan. Pero ye nochipa okitlakaitak uan amo keman okichiuili tlen amo kuali. Olga omochijchika pampa kuali kichiuas iteki. Okitlakualchiuiliaya, okitlapakiaya uan okinmaluiaya ikalchanejkauan (Romanos 12:17). Uan ijkuak ueli oyaya kintlajpalotiuij inkalchanejkauan inamik. Se neskayotl, ijkuak imonta Olga omikik, ye okiyektlali nochi pampa uelis yaskiaj, maski omonekiaya yaskej itech okse ueyi altepetl. Ijkuak okiuikakej teopan imonta, tokni kiauak okichixki inamik. Miak xiuitl satepan inamik ayakmo okitlajyouiltiaya. Uan nin opanok pampa ye amo okualaniaya uan okitlakaitaya. Axkan inamik kiluia ma monechiko uan ualeua kiuika. Uan ualeua mokaua iuan Olga itech nechikol (1 Pedro 3:1).
IJKUAK MONEKI TIKPEJPENASKEJ IUAN AKIN TIYETOSKEJ TIYOLMELAJKEJ
10. ¿Tleka Jonatán okipejpenki yetos yolmelajki iuan David?
10 Ijkuak Saúl okijto kimiktiskia David, Jonatán omonekiaya kipejpenas iuan akin yetoskia yolmelajki, iuan itajtsin noso iuan David. Nin sapanoa oui, pampa Jonatán okinekiaya kipaleuis itajtsin uan David. ¿Tlen okipaleui kuali ma kipejpena tlen kichiuas? Ye okimatiaya toTajtsin Dios okipaleuijtoka David uan amo Saúl. Ik non, okipejpenki yetos yolmelajki iuan David. Achto, okilui David ma motlati uan satepan okilui itajtsin amo ma kimikti David (xiktlajtolti 1 Samuel 19:2, 4 *).
11, 12. ¿Tlen tikchiuaskej tla tiktlasojtlaj Jehová?
11 Tla tiktlasojtlaj Jehová, okachi tiyetoskej tiyolmelajkej iixpan uan amo iuan tokalchanejkauan. Ma tikitakan ineskayo tokni Alice, akin chanti itech ueyi altepetl Australia. Ye omonekiaya kipejpenas iuan akin yetoskia yolmelajki. Ijkuak omomachtijtoka itech Biblia, okintlapouiaya ikalchanejkauan tlen omomachtijtoka. Se tonal okinmilui ayakmo iluichiuaskia itech Navidad uan okinyekilui tleka ayakmo ijkon kichiuaskia. Achto ikalchanejkauan sapanoa omoyolkokojkej. Pero satepan sapanoa okualankej. Ikalchanejkauan omokuayejyekojkej ayakmo okintlasojtlaya. Uan inantsin okilui ayakmo oksepa okinekiaya kitas. Alice okijto: “Nin sapanoa onechyolkoko, pampa sapanoa nikintlasojtla nokalchanejkauan. Pero onikijto achto niktekichiuiliskia Jehová uan Jesús, uan onimoapolakti itech se ueyi nechikol de circuito” (Mateo 10:37).
12 Tla tiktlasojtlaj Jehová tiyetoskej tiyolmelajkej iixpan, uan amo kanin timomachtiaj, toaltepe noso akinmej mauiltiaj. Ma timokuayejyekokan itech ineskayo se tokni telpochtli tlen itoka Henry. Ye omauiltiaya ajedrez kanin omomachtiaya uan omokuayejyeko kitlaniskia miak tlamantli. Pero ken nochi sábados uan domingos omauiltiaya, amo omajxiliaya tetlapouis nion monechikos. Se tonal okitak okachi okatka yolmelajki itech kanin momachtia uan amo iixpan Jehová. Ik non, okijto ayakmo mauiltis (Mateo 6:33).
13. Tla tiknekij tiyetoskej tiyolmelajkej iixpan Jehová, ¿tlen moneki ma tikchiuakan ijkuak itech tokalchanejkauan amo tikmatij tlen tikchiuaskej?
13 Ualeua oui tiyetoskej tiyolmelajkej inmixpan miakej tokalchanejkauan. Ma tikitakan ineskayo se tokni tlen itoka Ken. Ye kijtoa inantsin yokipiaya miak xiuitl, ik non, okinekiaya ualeua yas kitlajpaloti uan ualeua okinekiaya kiluis inmiuan ma mokaua itech inkalijtik. Pero inantsin nin tokni iuan isiua amo omouikayaj. Tokni Ken, amo okimatiaya tlen kichiuas pampa ma yolpakikan. Ye okinekiaya yetos yolmelajki iixpan Jehová. Ik non, opejki mokuayejyekoa itech tlen kijtoa Biblia. Ijkuakon okimatki Jehová okinekiaya ma yeto yolmelajki iuan isiua uan ma kiyolpakti. Ik non, okitemo tlen uelis kichiuaskia pampa isiua ma yolpaki. Satepan omotlapoui iuan isiua uan okiyekilui tleka omonekiaya kuali kitlapouiskia imonan. Uan tokni Ken noijki okitlapoui inantsin uan okiyekilui tleka omonekiaya kitlakaitas isiuamon (xiktlajtolti Génesis 2:24 *; 1 Corintios 13:4, 5).
IJKUAK SE TOKNI AKIN TLAYEKANA TECHCHIUILIA ITLAJ AMO KUALI
14. Saúl, ¿tlen okichiuili Jonatán?
14 Noijki ijkuak se tokni techchiuilia itlaj amo kuali uelis tikteititiskej tiyolmelajkej iixpan Jehová. ToTajtsin Dios okitlali Saúl ken ueyi tekiua, pero Saúl okualanki iuan ikone. Ye amo okajsikamatiaya tleka Jonatán okitlasojtlaya David. Ik non, ijkuak Jonatán okinekiaya kipaleuis David, Saúl sapanoa okualanki uan okipinati inmixpan miakej. Pero Jonatán okitlakaitak itajtsin. Ijkuakon okiteititi yolmelajkayotl iixpan Jehová uan noijki iixpan David, akin toTajtsin Dios okipejpenki ken ueyi tekiua itech ueyi altepetl Israel (1 Samuel 20:30-41).
15. ¿Tlen moneki ma tikchiuakan tla se tokni techchiuilia itlaj amo kuali?
15 Axkan tlayekankej mochijchikauaj pampa kuali kinchiuiliskej nochtin tokniuan itech tlanechikol. Pero ken titlajtlakolejkej, ualeua amo tikajsikamatij tleka kichiuaj seki tlamantli (1 Samuel 1:13-17). Tla se tonal techchiuiliaj itlaj amo kuali, ma tiyetokan tiyolmelajkej iixpan Jehová.
IJKUAK OUI PAMPA TIKCHIUASKEJ TLEN OTIKIJTOJKEJ
16. ¿Keman moneki tiyetoskej tiyolmelajkej iixpan Jehová uan amo titenexikolitaskej?
16 Saúl okinekiaya ijkuak ye mikiskia ma tlanauati Jonatán uan amo David (1 Samuel 20:31). Jonatán uelis yetoskia nexikoli uan ye kinekiskia tlanauatis. Pero ken okitlasojtlaya Jehová uan okinekiaya yetos yolmelajki, okichi ijkon ken okilui iyolikni David. Biblia kijtoa akinmej yolmelajkej iixpan Jehová uan kitlasojtlaj, kichiuaj tlen kijtoaj maski amo kinpaleuis tlen kichiuaskej (Salmo 15:4). Se neskayotl, tla tikijtoaj itlaj tiknemakaskej noso tikkoaskej, tikchiuaskej ijkon, maski oui. Maski timokualaniaj iuan tonamik, iuan tiyetoskej tiyolmelajkej tla tiktlasojtlaj Jehová (xiktlajtolti Malaquías 2:14, 16 *).
Tla timokauaj itlaj tiknemakaskej noso tikkoaskej, tikchiuaskej pampa tiyolmelajkej iixpan Jehová. (Xikita párrafo 16).
17. ¿Tlen otimomachti axkan?
17 Tla tiknekij tikchiuaskej ken Jonatán, moneki tiyetoskej tiyolmelajkej maski titlajyouiskej. Ik non, ma tiyetokan tiyolmelajkej inmixpan tokniuan maski ualeua techchiuiliskej itlaj amo kuali. Ijkon tikyolpaktiskej Jehová, uan noijki tiyolpakiskej (Proverbios 27:11). Tikneltokaj ye nochipa techmaluis. Chikome timomachtiskej itech oksekimej tlen noijki oyoltokaj ijkuak okatka David. Tikitaskej ken sekimej okatkaj yolmelajkej iixpan Jehová, pero oksekimej amo. Uan tikitaskej tlen techmachtia inneskayo.
^ [1] (Párrafo 9). Otikinpatilijkej intoka.
^ párr. 10 1 Samuel 19:2, 4 kijtoa: “Ken Jonatán ikone Saúl sapanoa okitlasojtlaya David, Jonatán okilui David: ‘Notajtsin, Saúl, mitstemojtok pampa mitsmiktis. Nimitstlatlaujtia ximomalui mostla kualkan, uan moneki tias kanin amo ikaj mitsajsis uan ompa ximotlati’. Ijkuakon, Jonatán kuali okitlapoui Saúl itech David. Ye okilui: ‘Tekiua amo moneki tlajtlakolchiuas ika motekipanojka David, pampa motech amo otlajtlakolchi uan tlen yokichi omitspaleui’”.
^ párr. 13 Génesis 2:24 kijtoa: “Ik non, tlakatl kikauas itata uan inantsin, uan mosetilis iuan isiua, uan moneki mochiuaskej san se tlalnakayotl”.
^ párr. 16 Malaquías 2:14, 16 kijtoa: “Uan namejuan nankijtoaj: ‘¿Tleka ijkon?’. Ijkon pampa Jehová yokitak tlen opanok motech iuan mosiua tlen iuan otimonamikti ijkuak otikatka titelpochtli, akin te otikkajkaya, maski ye mouan kajki uan mosiua pampa ijkon onanmokajkej. Pampa ne nikkokolia ma mokajkauakan iixpan tekiuajkej’, kijtoa Jehová iTajtsin Dios Israel, ‘uan akin kitlatia itlaken ika neteuilistli’, kijtoa Jehová akin kinyekana soldados. ‘Uan moneki nanmomaluiskej itech iespíritu, uan amo moneki nantlakajkayauaskej’”.
