Akinmej tetlapouiaj iTekiuajkayo toTajtsin Dios kijtouaj

Okimatki tlen omonekiaya kichiuas

JESÚS kinmixmati ichkauan (Juan 10:14). Tla ikaj yolkuali, yolyamanki uan kineki kichiuas tlen kuali, uelis yetos iuan ichkauan Jesús. Se siuatl tlen chanti Bélgica okimatki tlen omonekiaya kichiuas uan tejuatsin noijki uelis tikmatis. Ye kijtoua:

“Ijkuak iTlaixpantijkauan Jehová otechtlajpalokoj, amo kuali onimomachiliaya uan oniknekiaya nimomiktis. Onechyolpakti ijkuak onechiluijkej satepan tlamis nochi ouijkayotl pero amo onechpakti ijkuak okijtojkej toTajtsin Dios ijkon kichias. Yikipia kanaj chikueyi xiuitl amo oniaya teopan uan amo onechpaktiaya tlen ompa okichiuayaj. Pero onikajsikamatki melauak tlen okijtojkej iTlaixpantijkauan Jehová uan amo uelis tiyolpakiskej tla amo techpaleuia toTajtsin Dios”.

“San seki tonal onechtlajpalojkej iTlaixpantijkauan Jehová. Pero amo kuali onimomachiliaya. Itech se tonal onikchichinaya ome cajetillas cigarros uan opejki noijki niktekitiltia drogas. Ijkuak oixpoliuik nokoltsin oniknekiaya iuan nimotlapouis, ik non, opejki nikchiua naualotl. ¡Opejki nitlajyouia! San noselti onikatka, ik non, nochipa ijkuak yinikochis onechmomojtiaya amo kuali ejekamej. Ijkon opanok miak metstli, onimomojtiaya ijkuak yotlayouatoka porque onikatka noselti”.

“Se tonal onia itech ojtli kanin amo okachi oniaya uan onikitak okichijchijtokaj se kali. Onechtlajtlachialti miakej ompa otekipanojtokaj. Satepan onikitak okichijchijtokaj se kali kanin monechikoskiaj iTlaixpantijkauan Jehová. Onechilnamikti ijkuak iTlaixpantijkauan Jehová onechtlajpalouayaj uan onikijto tla nochtin kichiuaskiaj ken yejuan kuali tiyetoskiaj”.

“Oniknekiaya oksepa manechtlapouitij nokalijtik, ik non, onimotlapoui iuan se iTlaixpantijka Jehová tlen ompa otekipanojtoka. Oniktlatlaujti toTajtsin Dios, opanok majtlaktli tonal iuan tokni tlen otekipanojtoka onechtlajpaloto. Onechyole oksepa manimomachti Biblia uan onikilui kema. ¡Sapanoua oniyolpakik! Porque oniknekiaya nimouikas inmiuan akinmej yolpakij uan motlasojtlaj uan ijkon opanok”.

“Opejki nochipa nimonechikoua, opanok eyi semana uan ayakmo onitlachichinaya. Onikintlamotlak amochmej tlen tlajtoua itech astrología noijki discos tlen kipia tlakuikalmej tlen amo kipaktiaj toTajtsin uan amo kuali ejekamej opejki nechkaua. Opejki nikchiua tlen Jehová kipaktia uan eyi metstli satepan opejki nitetlapouia kuali tlajtolmej. Opanok chikuase metstli onimoapolakti uan ome tonal satepan opejki nitlapaleuia ken precursora auxiliar”.

“Niktlasojkamatilia Jehová yonechpaleui. Axkan nikmati tlen moneki nikchiuas. Nikita itoka Jehová ken se chikauak tepamitl kanin ye nechmaluia (Proverbios 18:10). Onimomachiliaya ken salmista ijkuak okijkuilo Salmo 84:10, ye okijto: ‘¡Porque niyetos se tonal kanin kajki moteokal okachi kuali uan amo ken mil tonalmej oksekan niyetos! Onikpejpenki niyetos kanin kajki ikaltlatsakuil ikal noDios uan amo nichantis itech mantajkalmej kanin chantij akinmej kichiuaj tlen amo kuali’”.

Nin siuatl okimatki tlen omonekiaya kichiuas porque okatka yolyamanki. Noijki kimatis tlen moneki kichiuas akin mochijchikaua kixmatis toTajtsin Dios uan yolyamanki.