Moneki ma tikixmatikan Jehová

¿TIKPIAJ tlen okachi ipati? Tla amo tikixmatij toTajtsin Dios, kijtosneki amo. ¿Tleka ijkon tikijtouaj? Miakej kijtouaj yokinpaleui ijkuak omomachtijkej itech Biblia akin toTajtsin Dios.

Jehová otechmakak Biblia uan kineki ma tikixmatikan. Akin okijkuilo salmo okijto: “Nochtin ma kimatikan te motoka Jehová, san te okachi tiUeyititok ipan nochi tlaltikpak”. ToTajtsin Dios kimati tiyolpakiskej tla tikixmatij. “Ne Jehová nimoDios, ne akin nimitsmachtia para kuali xiyeto”. ¿Ken techpaleuia tikixmatiskej Jehová? (Salmo 83:18; Isaías 48:17).

Techpaleuia para ma titlaxikokan ijkuak titlajyouiaj, ma tikchiakan satepan kuali tiyetoskej uan amo ma timotekipachojtokan. Ijkuak tikixmatij toTajtsin Dios techpaleuia ma tikajsikamatikan okseki tlamantli tlen axkan miakej kintekipachoua. ¿Tlen kintekipachoua?

¿Tleka tiyoltokej?

Maski onka tecnología miakej ok motlajtlaniaj: ¿Tleka nikan tikatej? ¿Tlen techpanos satepan? ¿Tleka tiyoltokej? Amo tiyolpakij tla amo tikmatij. Miakej ijkon kinpanoua. Kanaj itech xiuitl 1997 ompa Alemania miakej okintlajtlanijkej uan sekimej okijtojkej amo kimatij tleka yoltokej. Xamo ik kanin tichanti miakej ijkon mokuayejyekouaj.

Tla amo tikmatij tleka tiyoltokej, amo tikmatiskej tlen tikchiuaskej. Miakej kineltokaj para yolpakiskej moneki kipiaskej miak tomin, pero amo melauak kinpaleuia ma yolpakikan. Akinmej amo kimatij tlen kichiuaskej, ayakmo kineki yoltoskej. Ijkon okipanok se ichpochtli, periódico tlen itoka International Herald Tribune okijto: “Okipiaya miak tomin uan okichiuaya tlen okinekiaya”. Maski okipiaya miak tlamantli, omomachiliaya iselti uan amo oyolpakiaya, ik non, okonik miak pajtli para ma miki. Xamo tikinmixmati oksekimej tlen noijki ijkon yokinpanok.

Sekimej kijtouaj tlen kimatij ixtlamatkej uelis techpaleuis ma tikmatikan ken uelis tiyolpakiskej. Se amochtli tlen okichijchijkej ompa Alemania tlen itoka Die Woche okijto: “Maski ciencia techpaleuia ika seki tlamantli, amo techpaleuia ma tikixmatikan toTajtsin Dios. Maski miakej kineltoka evolución uan física cuántica amo kinpaleuia nion kinyolchikaua”. Maski techpaleuia tlen kimatij ixtlamatkej para ma tikajsikamatikan ken mochiua seki tlamantli, amo techpaleuia ma tikmatikan tleka tiyoltokej nion tlen tikchiuaskej. Tla san yetoskia tlen kimatij ixtlamatkej, miak tlamantli amo tikajsikamatiskiaj. Ik non, periódico tlen itoka Süddeutsche Zeitung okijto: “Tinochtin tikneki ikaj ma techyekana”.

San toTajtsin Dios kinamiki techyekanas, ye kimati tleka tiyoltokej porque Ye otechchijchi. Biblia kijtoua Jehová okinchijchi achto tlakatl uan achto siuatl para ma momiaktilikan itech tlaltikpak uan ma kimaluikan. Yejuan omonekiaya tetlasojtlaskej ken toTajtsin Dios, yetoskej ixtlamatkej uan yolmelajkej. Ijkuak tikajsikamatij tleka otechchijchi Jehová, okachi tiyolpakij (Génesis 1:26-28).

¿Tlen uelis tikchiuas?

Tla ayamo tikmati tleka nikan tikatej, Biblia kijtoua moneki kuali xikixmati Jehová. Jesús okijto: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis”. Noijki moneki timochijchikauas titetlasojtlas uan xikchiua nochi tlen moneki para tiyetos ijkuak tlanauatis iTekiuajkayo toTajtsin Dios. Ijkon tiyolpakis uan tikchixtos satepan kuali tiyetoskej. San ijkon tikmatis tlen achto omitstekipachouaya (Juan 17:3; Eclesiastés 12:13).

¿Ken techpaleuia tikmatiskej? Ma tikitakan tlen okipanok Hans. * Achto amo kuali okixmatiaya toTajtsin Dios uan tlen okineltokaya amo okipaleuiaya. Ye okitekitiltiaya drogas, oauilnemiaya, okichiuaya tlen amo kuali uan okipaktiaya motos. Ye okijto: “Onimomachiliaya noselti uan amo oniyolpakiaya”. Ijkuak Hans okipiaya 25 xiuitl, opejki momachtia Biblia porque okinekiaya kixmatis toTajtsin Dios. Ijkuak opejki mouika iuan Jehová uan okajsikamatki tleka oyoltoka, ayakmo okichi tlen amo kuali uan omoapolakti ken iTlaixpantijka Jehová. Kanaj diez xiuitl yitetlapouijtok. Ye okijto: “Okachi tiyolpakij ijkuak tikixmatij uan tiktekichiuiliaj Jehová”.

Pero miakej amo san kintekipachoua tleka tiyoltokej. Ken axkan panotok miak tlamantli tlen amo kuali miakej ok itlaj motlajtlania.

¿Tleka ijkon opanok?

Ijkuak panoua tlen amo kuali miakej motlajtlaniaj: ¿Tleka ijkon opanok? Tla tikmatij tleka ijkon opanok techpaleuis kuali ma timomachilikan. Pero tla amo tikmatij, kichiuas ma timoyolkokokan uan ma timotekipachokan. Xikita tlen okipanok se siuatl tlen itoka Bruni.

“Yikipia seki xiuitl oixpoliuik notakotsin tlen omotokayotiaya Susanne. Ne onikneltokaya toTajtsin Dios, ik non, onikitato teopixki para ma nechyolseui. Ye onechilui toTajtsin Dios okiuikak iluikak para ma yeto se ángel. Non sapanoua onechyolkoko uan noijki opejki nikkokolia toTajtsin Dios”. Miak xiuitl omoyolkokojtoka Bruni. Ye okijto: “Satepan se iTlaixpantijka Jehová onechititi ika Biblia amo moneki nikkokolis toTajtsin Dios porque Susanne amo okiuikakej iluikak. Ye omokoko porque tinochtin titlajtlakolejkej uan tiixpoliuij. Notakotsin moseuijtok uan kichixtok Jehová ma kiyoliti. Noijki onimomachti toTajtsin Dios otechchijchi para ma tiyoltokan nochipa itech xochitlali uan ayamo miak poliui ijkon kichiuas. Ijkuak onikajsikamatki Jehová techtlasojtla, opejki iuan nimouika uan oksepa opejki niyolpaki” (Salmo 37:29; Hechos 24:15; Romanos 5:12).

Miakej tlajyouiaj porque itlaj amo kuali panotikisa, onka guerras, apistli uan tlaxixini. Bruni omoyolseui ijkuak omomachti Jehová amo techtlajyouiltiaj, amo okinekiayaj ijkon ma techpano, ye kineki kiyektlalis nochi. Tlen axkan panotok techititia tikatej “itech iksemi tonatijmeh”. Ayakmo miak poliui para kuali tiyetoskej (2 Timoteo 3:1-5; Mateo 24:7, 8).

¿Ken tikixmatiskej toTajtsin Dios?

Hans uan Bruni okineltokayaj toTajtsin Dios, pero amo okachi okixmatiayaj. Ijkuak opejkej momachtiaj Biblia para kixmatiskej Jehová, okajsikej tlen okitemouayaj, okinpaleui ma moyolseuikan uan ma kichiakan tlen toTajtsin Dios yokijto kichiuas. Miakej iTlaixpantijkauan Jehová noijki ijkon yokinpanok.

Tla tiknekij tikixmatiskej Jehová moneki timomachtiskej Biblia, ompa techiluia akin ye uan tlen kineki ma tikchiuakan. Itech achto siglo sekimej ijkon okichijkej. Lucas akin okijkuilo Evangelio, techtlapouia tlen okichijkej akinmej ochantiaya Berea, “okintitlankeh n Pablo iwa Silas mawiah kan altepetl de Berea. [...] Ika miak pakílistli okiselijkeh itlajtol Totajtsi Dios. Ixmostla okiamapoaya itlajkuilol Dios para kitaskeh kox milák tlan Pablo iwa n Silas okimiliayah” (Hechos 17:10, 11).

Itech achto siglo akinmej okichiuayaj ken Cristo omonechikouayaj (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Axkan noijki ijkon kichiuaj. ITlaixpantijkauan Jehová monechikouaj para momachtiskej uan kinpaleuiskej oksekimej ma momachtikan ken mouikaskej iuan Jehová uan ken yolpakiskej ijkuak kitekichiuiliskej. Noijki, akinmej yikin monechikouaj kitaj ken iTlaixpantijkauan Jehová mochijchikauaj para kichiuaskej ken toTajtsin Dios. Ik non, tla inmiuan timonechikos, mitspaleuis okachi kuali xikixmati Jehová (Hebreos 10:24, 25).

¿Timokuayejyekoua sapanoua oui tikixmatis Jehová? Xamo kema. ¿Pero noijki ijkon timomachilia ijkuak itlaj tikneki tikchiuas? Ximokuayejyeko ken moyejyektlaliaj akinmej motlalouaj. Se tlakatl tlen chanti Francia uan itoka Jean-Claude Killy, okitlanki se medalla de oro, ye okijto tlen moneki kichiuas akin motlaloua tla kineki tlatlanis: “Achto, moneki timoyektlalis majtlaktli xiuitl. Noijki nochipa moneki timokuayejyekojtos ken timotlalos uan moneki nochipa ijkon tikchiuas”. ¡Majtlaktli xiuitl moneki timoyektlalis para timotlalos san diez minutos! Okachi kuali ma timochijchikauakan tikixmatiskej Jehová, porque non techpaleuis kuali ma timomachilikan uan ma tikchiakan tlen yokijto kichiuas.

Okachi ma timouikakan iuan Jehová

Tinochtin tikneki tikpiaskej tlen moneki para kuali tiyetoskej. Ik non, tla amo tikmati tleka tiyoltok uan tikneki tikmatis tleka titlajyouiaj, ximomachti Biblia para tikixmatis Jehová. Tla ijkon tikchiuas mitspaleuis nochipa kuali xiyeto.

¿Ajsis tonal ijkuak tikmatiskej nochi tlen Jehová mokuayejyekoua? Akinmej yiuejkika kitekichiuilijtokej ok kintlajtlachialtia tlen momachtiaj itech Jehová. Ijkuak okachi timomachtijtiaskej okachi tiyolpakiskej, tikitaskej ken techpaleuia uan okachi timouikaskej iuan toTajtsin Dios. Ma tikijtokan ijkon ken okijkuilo Apóstol Pablo: “¡Milák, kema weyi iteiknomatilis Dios, iwa kema weyi iixtlamatilis! Iwa iajsikamatilis, amaka weleti kiteajsikamatiltia tlan Dios kichiwa, nion amaka kajsikamati tlan kichiwa nion kenomi kichiwa. Noso, ‘¿akin weleti kajsikamati itlayejyekolis n Toteko?, noso ¿akin okiixtlamachti?’” (Romanos 11:33, 34).

[Nota]

[Tlen moijtoua]

Miakej ok motlajtlaniaj: ¿Tleka nikan tikatej? ¿Tlen techpanos satepan? ¿Tleka tiyoltokej?

[Tlen moijtoua]

“Ijkuak onikajsikamatki Jehová techtlasojtla, opejki iuan nimouika”

[Tlen moijtoua]

“Okachi tiyolpakij ijkuak tikixmatij uan tiktekichiuiliaj Jehová”