¿Techpaleuia tlen ika timoyolpaktiaj?
¿Techpaleuia tlen ika timoyolpaktiaj?
“Yika, xikmatikah tlanón kipaktia n Toteko” (EFES. 5:10)
1, 2. (1) ¿Tlen textos kiteititiaj Jehová kineki matiyolpakikan? (2) Jehová techkauilia matikchiuakan miak tlamantli, ik non, ¿tlen uelis tikchiuaskej ijkuak timajxiliaj?
BIBLIA kijtoua seki tlamantli tlen kiteititia Jehová amo san kineki matiyoltokan, ye kineki melauak matiyolpakikan. Ik non, Salmo 104:14, 15 kijtoua: “Ye kichiua [...] tlali makitemaka tlakuali, vino tlen kiyolpaktia tlakatl, chiauak tlen kichiua maixpetlani uan pan tlen kichikaua iyolo tlakatl tlen ixpoliui”. ToTajtsin Dios techmaka xinachtli, chiauak uan vino para matikpiakan tlen tikkuaskej. Vino amo san techpaleuia, noijki kichiua matiyolpakikan (Ecl. 9:7; 10:19). Nin techmachtia Jehová kineki “matiyetokah ika pakílistli” porque techmaka miak tlamantli (Hech. 14:16, 17).
2 Ik non, amo moneki timokuayejyekoskej akinmej tikchiuaj ken Cristo tikchijtokej itlaj tlen amo kuali ijkuak timoyolpaktiaj ika seki tlamantli. Ijkuak tikinmitaj “totomeh non patlantinemih” uan “kenomi moskaltiah n xochimeh” techpaleuiaj matiyolpakikan uan kuali matimomachilikan (Mat. 6:26, 28; Sal. 8:3, 4). Tla kuali tikatej uan amo timokokouaj matimotlasojkamatikan porque “non techtliokolia toTajtsin Dios” (Ecl. 3:12, 13). Ik non, ijkuak timajxiliaj matikchiuakan itlaj tlen kiyolpaktis.
Kuali matikpejpenakan tlen ika timoyolpaktiskej
3. ¿Tleka tlatlamantli timoyolpaktiaj?
3 Axkan tikitaskej, akin kuali mouika iuan Jehová kimati uelis tikpejpenaskej tlen ika timoyolpaktiskej, pero moneki kuali tikpejpenaskej. Ijkuak timoyolpaktiaj panoua ijkon ken ijkuak itlaj tikkuaj, itech seki altepemej kikuaj seki tlamantli tlen tejuan amo techpaktia noso amo tikkuaskiaj. Xamo sekimej tokniuan tlen chanti itech okseki altepemej, moyolpaktiaj ika seki tlamantli tlen tejuan amo techpaktia tikchiuaskej. Ijkon panoua maski tokniuan chanti kanin tejuan tikatej. Sekimej kinpaktia motlaliskej uan itlaj kitlajtoltiskej, oksekimej okachi kinpaktia yaskej ipan bicicleta uan sekimej amo kinpaktia ijkon kichiuaskej. Ijkon ken amo techpaktia san se tlamantli tikkuaskej noijki amo san se tlamantli techpaktia tikchiuaskej (Rom. 14:2-4).
4. ¿Tleka moneki kuali tikpejpenaskej tlen ika timoyolpaktiaj? Xikyekijto.
4 Maski uelis tikpejpenaskej tlen tikchiuaskej, non amo kijtosneki uelis timoyolpaktiskej ika tlen amo kuali. Ijkon ken yotikijtojkej, techpaktia tikkuaskej miak tlamantli. Pero ¿tikkuaskia itlaj tlen yoijtlakauik? Amo, porque tla ijkon tikchiuas uelis itlaj mitspanos uan timokokos. Ik non, maski uelis tikchiuaskej miak tlamantli, amo matimoyolpaktikan kanin motaj auilnemij, moteuiaj noso kanin uelis itlaj techpanos. Tla ijkon tikchiuaj, xamo ayakmo kuali timouikaskej iuan Jehová. Ken yotikitakej amo nochi techpaleuia, ik non, moneki tikitaskej kox kuali noso amo tlen ika timoyolpaktiaj (Efes. 5:10). Axkan tikitaskej ken uelis ijkon tikchiuaskej.
5. ¿Ken uelis tikmatiskej kox kipaktis Jehová tlen ika timoyolpaktiskej?
5 Kuali tiyetoskej tla timoyolpaktiaj ika tlen Jehová kita kuali. ¿Ken uelis tikmatiskej kox tlen tikchiuaskej kiyolpaktis toTajtsin Dios? (Sal. 86:11.). Moneki tikitaskej eyi tlamantli. Achto moneki tikitaskej tlen ika timoyolpaktiskej, keman ijkon tikchiuaskej uan akinmej inmiuan. Matikitakan ninmej eyi tlamantli.
¿Tleka nechpaktia?
6. ¿Tlen tlamantli tikixtopeuaj uan tleka?
6 Para kuali tikpejpenaskej tlen ika timoyolpaktiskej, moneki timotlajtlaniskej: ¿Tleka nechpaktia ijkon nimoyolpaktis? Noso ¿tlen tlamantli ompa mota? Uelis tikpejpenaskej tlen ika timoyolpaktiskej, pero matikilnamikikan onka seki tlamantli tlen moneki tikixtopeuaskej uan onka okseki tlamantli tlen moneki san tejuan tikijtoskej kox tikseliskej noso amo. ¿Tlen tlamantli moneki tikixtopeuaskej? Kanin mota noso kichiuaj tlen Biblia kijtoua amo kuali (1 Juan 5:19). Maski miakej kinpaktia moyolpaktiskej ika tlamantli tlen amo kuali ken: naualotl, pornografía, kanin moteuiaj, auilnemij uan kanin kinueyichiuaj amo kuali ejekamej, akinmej tikchiuaj ken Cristo moneki tikixtopeuaskej non tlamantli (1 Cor. 6:9, 10; xiktlajtolti Apocalipsis 21:8). Matimomaluikan para amo tikchiuaskej tlen amo kuali, ijkon tikteititiskej tiktlakamatij Jehová ijkuak techiluia: “Xiktlawelitakah nochi tlan amokuali” (Rom. 12:9; 1 Juan 1:5, 6).
7, 8. ¿Ken uelis tikmatiskej kox kipaktis Jehová tlen ika timoyolpaktiskej? Xikyekijto.
7 Axkan matikitakan seki tlamantli tlen moneki tejuan tikpejpenaskej kox tikchiuaskej noso amo, porque itech Biblia amo kijtoua. ¿Ken uelis tikmatiskej kox kipaktis toTajtsin Dios tlen ika timoyolpaktiskej? Moneki timoyekanaskej ika principios bíblicos (Prov. 4:10, 11). Tla ijkon tikchiuaj, totlalnamikilis amo techkuejsos uan kuali timomachiliskej (Gál. 6:5; 1 Tim. 1:19). ¿Tlen techpaleuis kuali matikpejpenakan tlen ika timoyolpaktiskej? Ijkuak tikkuaj itlaj tlen amo keman otikkuayaj titlajtlanij tlen okitlalilijkej, noijki ijkuak tikpejpenaskej tlen ika timoyolpaktiskej, moneki tikitaskej kox kuali noso amo tlen tikchiuaskej (Efes. 5:17).
8 Matikitakan se tlamantli. Tinochtin techpaktia tikitaskej ken mauiltiaj noso tejuan timauiltiskej uan non kuali kajki, pero uelis timotlajtlaniskej ¿nechpaktia ijkuak motlatlanij, mokojkouaj, ken iluichiuaj ijkuak tlatlanij noso kichiua maniktlasojtla noaltepe? Ijkon matimotlajtlanikan uan xamo tikitaskej amo timokuayejyekojtokej ken Jehová nion titetlasojtla ijkon ken tikinmiluiaj oksekimej. Tla tikchijtokej itlaj tlen amo kuali, san niman matikauakan (Is. 61:1; Gál. 5:19-21). Tla tikpejpenaj timoyolpaktiskej ika tlamantli tlen kuali uan tlen amo kixnamiki Biblia, kuali timomachiliskej (Gál. 5:22, 23; xiktlajtolti Filipenses 4:8).
¿Keman nikchiuas?
9. ¿Ken techpaleuis tla timotlajtlaniaj kox timajxiliskej para timoyolpaktiskej?
9 Noijki uelis timotlajtlaniskej: “¿Keman nikchiuas tlen nechpaktia?”. Moneki tikitaskej keman timoyolpaktiskej uan kox timajxiliskej ijkon tikchiuaskej. Ken yotikitakej, moneki kuali tikpejpenaskej tlen ika timoyolpaktiskej para amo ma kipia tlen amo kuali. Pero noijki miak ipati matimotlajtlanikan kox timajxiliskej para timoyolpaktiskej, porque ijkon tikteititiskej tlen okachi tikpatioitaj. Ik non, ¿tlen uelis tikchiaskej para amo timotonalpoloskej ijkuak timoyolpaktiaj?
10, 11. ¿Ken techpaleuia Mateo 6:33 matikitakan kox timajxiliskej para timoyolpaktiskej?
10 Matikilnamikikan tlen Jesús okijto: “Xiktlasojtla Moteko Dios ika nochi moyolo, ika nochi moalma, ika nochi motlalnamikilis iwa ika nochi mochikawalis” (Mar. 12:30). ¿Ken tikteititiaj tiktlasojtlaj Jehová? Ijkuak tikchiuaj tlen okijto Jesús: “Nomejwah moneki achto xikchiwakah tlan Dios nomechnawatia iwa xikchiwakah tlan Ye kimonekiltia. Iwa ijkó Dios nomechmakas nochi tlan nomechpolos” (Mat. 6:33). Nin techmachtia moneki tikitaskej kox tiuejkauaskej ijkuak tikchiuaskej tlen techpaktia.
11 Jesús amo san okijto “xikchiwakah tlan Dios nomechnawatia”. Ye okijto “achto xikchiwakah tlan Dios nomechnawatia”. Ye okimatiaya omonekiaya tikchiuaskej miak tlamantli porque moneki tikpiaskej tokalijtik, tlakuali, moneki timomachtiskej, titekipanoskej, timoyolpaktiskej uan tikchiuaskej okseki tlamantli. Pero achto moneki tiktemoskej iTekiuajkayo toTajtsin Dios uan tikchiuaskej tlen Jehová technauatia (1 Cor. 7:29-31). Tla timoyekanaj ika nin principio bíblico, amo timotonalpoloskej ijkuak timoyolpaktiaj uan nochipa timajxiliskej para tikchiuaskej tlen okachi ipati, tiktekichiuiliskej toTajtsin Dios.
12. ¿Ken techpaleuis Lucas 14:28 ijkuak tikitaskej kox timajxiliskej para timoyolpaktiskej?
12 ¿Keski horas tiuejkauaskej ijkuak timoyolpaktiskej? Para tikmatiskej moneki timokuayejyekoskej kox timajxiliskej (Luc. 14:28). Moneki kuali timokuayejyekoskej keski horas timoyolpaktiskej uan satepan uelis tikijtoskej kox tikchiuaskej noso amo. Tla tikitaj ayakmo timajxiliaj para tiaskej nechikolmej, titetlapouiskej uan timomachtiskej toselti noso iuan tofamilia, kijtosneki amo tikchijtokej tlen moneki (Mar. 8:36). Kuali tlen tikchijtokej tla tikitaj ijkuak timoyolpaktiaj techpaleuia kuali matimomachilikan uan timajxiliaj para tikchiuaskej tlen okachi ipati.
¿Akin iuan?
13. ¿Tleka moneki kuali tikinpejpenaskej akinmej inmiuan timoyolpaktiskej?
13 Noijki moneki timotlajtlaniskej: “¿Akin iuan nimoyolpaktis?”. Ijkuak timoyolpaktiaj, akinmej iuan timouikaj uelis techpaleuiskej kuali matimomachilikan uan matiyolpakikan, ik non, miak ipati kuali matikinpejpenakan. Ijkuak titlakuaj techpaktia tiyetoskej iuan toyolikniuan, noijki ijkuak itlaj tikchiuaj okachi tiyolpakij tla tikatej inmiuan. Ken tikitaj, tinochtin tiyolpakij ijkuak tikatej inmiuan oksekimej uan telpochmej okachi kinpaktia ijkon kichiaskej. Para uelis tiyolpakiskej, moneki kuali tikinpejpenaskej toyolikniuan uan amo timouikaskej iuan akinmej amo techpaleuiskej (2 Crón. 19:2; xiktlajtolti Proverbios 13:20; Sant. 4:4).
14, 15. (a) ¿Tlen techmachtia ijkuak Jesús okinpejpenki iyolikniuan? (b) ¿Tlen uelis timotlajtlaniskej ijkuak tikinpejpenaskej toyolikniuan?
14 Ijkuak tikpejpenaskej akinmej inmiuan timoyolpaktiskej moneki tikchiuaskej ken okichi Jesús. Ye opejki kintlasojtla nochtin desde ijkuak Jehová opejki tlachijchiua (Prov. 8:31). Uan ijkuak ouala nikan tlaltikpak okiteititi nochtin okintlasojtlaya (Mat. 15:29-37). Maski nochtin okinchiuiliaya tlen kuali uan inmiuan omouikaya, noijki okimatiaya amo uelis mouikaskia inmiuan nochtin. Ik non, san sekimej okinseliaya ken iyolikniuan. ¿Akinmej okinseliaya ken iyolikniuan? Ye okinmilui 11 iapóstoles : “Nomejwah de milajka notlakaikniwah tla nonkichiwah tlan nomechnawatia” (Juan 15:14; noijki xikita Juan 13:27, 30). Ken tikitaj, Jesús okinseliaya ken iyolikniuan akinmej okinekiayaj kichiuaskej ken ye uan kitekichiuiliskej Jehová.
15 Tejuan noijki moneki ijkon tikchiuaskej. Para tikmatiskej akin iuan timouikaskej, matimotlajtlanikan: “¿Kiteititia ika tlen kijtoua uan kichiua kitlakamati tlen kijtoua Jehová iuan Jesús? ¿Tlaneltoka ijkon ken ne uan moyekana ika principios bíblicos? ¿Nechpaleuis maniyeto niyolmelauak uan maniktemo achto iTekiuajkayo toTajtsin Dios?”. Tla moyolikni ijkon kichiua, uelis tikneltokas kuali nanmomachiliskej ijkuak nanyolpakiskej (xiktlajtolti Salmo 119:63; 2 Cor. 6:14; 2 Tim. 2:22).
¿Kuali tlen ika timoyolpaktiaj?
16. ¿Tlen moneki timotlajtlaniskej achto timoyolpaktiskej?
16 Yotikitakej eyi tlamantli tlen techpaleuis matikitakan tlen tikchiuaskej ijkuak timajxiliaj: moneki tikitaskej tlen ika timoyolpaktiskej, keman ijkon tikchiuaskej uan akinmej inmiuan. Ijkuak tikitaskej nin eyi tlamantli moneki timokuayejyekoskej kox Jehová kuali kitas tlen tikchiuaskej. Achto timoyolpaktiskej moneki timotlajtlaniskej ¿tleka nechpaktia ijkon nimoyolpaktis? Moneki tikitaskej tlen ika timoyolpaktiaj amo makixnamiki tlen kijtoua Biblia (Prov. 4:20-27). ¿Keman nikchiuas tlen nechpaktia? Amo moneki timotonalpoloskej ijkuak timoyolpaktiaj (1 Tim. 4:8). ¿Akin iuan nimoyolpaktis? Amo moneki timoyolpaktiskej iuan akinmej kichiuaj tlen toTajtsin Dios amo kipaktia (Ecl. 9:18; 1 Cor. 15:33).
17, 18. (a) ¿Ken uelis tikmatiskej kox timoyolpaktiaj ken kijtouaj principios bíblicos? (b) ¿Tlen moneki tikchiuas ijkuak tikpejpenas ken timoyolpaktis?
17 Tla yotimotlajtlanijkej nin eyi tlamantli uan tikitaj tlen ika timoyolpaktiskej kixnamiki tlen kijtoua Biblia, amo matikchiuakan porque amo techpaleuis. Pero tla nochipa timoyekanaj ika tlen kijtoua Biblia, kuali timomachiliskej uan tikueyichiuaskej Jehová ijkuak timoyolpaktiskej (Sal. 119:33-35).
18 Ijkuak timajxiliskej moneki tikitaskej ken timoyolpaktiskej, keman ijkon tikchiuaskej uan akinmej inmiuan. Nochipa matimochijchikauakan uan matikchiuakan tlen kijtoua nin principio bíblico: “Tla nontlakuah, noso nonkonih, noso itla ok se nonkichiwah, nochi xikchiwakah para nonkiweyijkachiwaskeh n Totajtsi Dios” (1 Cor. 10:31).
¿Tlen titlanankiliskia?
Ijkuak tikpejpenaskej tlen ika timoyolpaktiskej, ¿ken techpaleuiskej ninmej versículos?
• Proverbios 13:20
[Tlajtlanilmej tlen kiualika tlamachtil]
[Foto]
(Xikita amatlajkuilol tla tikneki tikitas ken mota)
✔Tleka
[Foto]
(Xikita amatlajkuilol tla tikneki tikitas ken mota)
✔Keman
[Foto]
(Xikita amatlajkuilol tla tikneki tikitas ken mota)
✔Akin
[Foto]
¿Tlen techmachtia tlen Jesús okichi ijkuak moneki tikpejpenaskej ken timoyolpaktiskej uan akinmej inmiuan?