ITECH metstli Junio xiuitl 1970 onikatka itech se ueyi kali kanin tlapajtiaj. Onikpiaya 20 xiuitl, onikatka soldado uan sapanoa onimokokoaya. Ijkon onikatka pampa onikpiaya se ueyi kokolistli uan onikatka itech se kali kanin tlapajtiaj tlen okatka itech altepetl Pensilvania (Estados Unidos). Ijkuak opanoaya tlajko hora, se tlakatl tlen okinmaluiaya akinmej mokokoaj onechitaya pampa kitas ken onikatka. Okatka san se telpochtli ken ne uan omotaya sapanoa omomojtiaya. Uan oniktlajtlani: “Amo keman yotikitak ijkuak ikaj miki, ¿melauak?”. Ye sapanoa omomojti uan onechnankili: “Amo keman”. Omotaya ken yinimikiskia, pero amo onimikik. Ik non namechtlapouis achitsin itech nonemilis.

Onimokoko itech guerra tlen omochi itech ueyi altepetl Vietnam ijkuak onikinpaleuiaya akinmej otlapajtiayaj. Sapanoa onechpaktiaya nikinpaleuis akinmej okinkokoayaj itech guerra uan akinmej omokokoayaj. Oniknekiaya niyetos se tepajti. Oniajsito ueyi altepetl Vietnam itech metstli julio xiuitl 1969. Ken yikin onikatka ompa, onechmakakej se semana pampa nitlaixmatis uan pampa ma nimomati, ompa okitekitiltiayaj okse hora uan sapanoa otonaya.

Satepan, oniajsito itech se ueyi kali kanin tlapajtiaj tlen okatka itech altepetl Dong Tam, ik kanin opanoaya aueyatl Mekong, ompa opejki nitekiti. San niman, ompa oajsitoj seki helicópteros tlen okinualikayaj akinmej okinkokojkej itech guerra uan akinmej yomikka. Ken sapanoa oniktlakaitaya noaltepe uan onechpaktiaya nitekitis, san niman opejki nitekiti. Otikinkalakiayaj akinmej omokokoayaj itech kalmej kanin okatka ejekatl uan ompa otikinpajtiayaj. Amo ueyi okatka, ik non, amo okachi kuali otitekitiayaj; pero nochtin otimochijchikauayaj pampa miakej tikinpajtiskiaj. Onikitaya itech helicópteros okatka miakej uejueyi bolsas tliliuik uan amo ikaj okintemouiaya. Onechiluijkej ompa okatkaj miakej soldados tlen omikej itech guerra tlen ayakmo ajsitokaj okatka intlalnakayo. Nochi non onikitak itech guerra.

Onikinmixmatki iTlaixpantijkauan Jehová ijkuak onikatka nitelpochtli. Nonantsin omomachti inmiuan, pero amo omoapolakti. Onechpaktiaya nikinkakis tlen okijtoayaj. Se tonal, notlakpata uan ne  otipanokej iyekapan se kali kanin omonechikoayaj iTlaixpantijkauan Jehová uan oniktlajtlani: “¿Tlen kichiuaj ompa?”. Ye onechnankili: “¡Nion ximokuayejyeko inmiuan tiyetos!”. Ken oniktlasojtlaya uan onikneltokiliaya, onikchi tlen onechilui, ik non ayakmo inmiuan onimotlapouiaya.

Ijkuak ayakmo onikatka itech ueyi altepetl Vietnam onikmachili omonekiaya niktemos toTajtsin Dios. Amo kuali onimomachiliaya. Omotaya ken amo ikaj okimatiaya tlen melauak opanotoka itech non altepetl. Miakej okijtoaya ken soldados tlen ochantiayaj itech ueyi altepetl Estados Unidos okinmiktiaya konemej itech ueyi altepetl Vietnam, uan noijki onikitaya ken miakej tlaltikpaktlakamej omonechikoayaj pampa okijtoayaj okinmiktiayaj selekkonemej.

Ken oniknekiaya nikajsis toTajtsin Dios, opejki nio itech miakej tlaneltokalismej. Ken oniktlasojtlaya toTajtsin Dios, amo onechpaktiaya tlen ompa onikitaya. Iksemi oniajsito itech se Kali kanin monechikoaj iTlaixpantijkauan Jehová tlen okatka itech Delray Beach itech ueyi altepetl Florida. Nikilnamiki okatka se tonal domingo metstli febrero xiuitl 1971.

Ijkuak ompa oniajsito, yitlamiskia tlapoualistli tlen ompa okitemakakej, ik non, onimoka itech tlamachtil ika Akin Tetlapouijtok. Amo nikilnamiki tlen otimomachtijkej, pero amo keman nikilkauas ken konemej okitemoayaj tlaxelolmej itech Biblias tlen okipiayaj. Sapanoa onechtlajtlachialtijkej. Ne san onitlakaktoka uan onitlachixtoka. Ijkuak yiniaskia, se tokni tlen okipiaya kanaj 80 xiuitl omotoki nonauak. Ye omotokayotiaya Jim Gardner. Okiuikaya se amochtli tlen omotokayotiaya La verdad que lleva a vida eterna, uan onechilui: “¿Mitspaktiskia tikselis nin amochtli?”. San niman otimokajkej timomachtiskiaj tonal jueves kualkan.

Onitekipanoaya itech se kali kanin okinpajtiayaj akinmej sapanoa omokokoaya itech altepetl Boca Ratón tlen okatka itech ueyi altepetl Florida, uan non tonal domingo tlen onia nechikol omonekiaya nitekitis itech yoak. Onipeuaya once itech yoak uan onitlamiaya hasta non kualkan. Ken amo okatka miak tekitl, opejki niktlajtoltia amochtli tlen onechmakak tokni. Se siuatl tlen noijki ompa otekitia omotoki nonauak uan onechkixtili amochtli, okitak iixko amochtli uan okijto: “Amo tiyetos itech non tlaneltokilistli, ¿melauak?”. Onikkixtili amochtli uan onikilui: “Yikin oniktlajtolti tlajko amochtli, pero uelis kema”. Siuatl oyajki, uan oniktlami oniktlajtolti non amochtli itech non yoak.

Ijkuak tokni Gardner oajsito non tonal jueves oniktlajtlani: “¿Tlen timomachtiskej?”. Ye onechnankili: “Amochtli tlen onimitsmakak”. Uan oniknankili: “Yoniktlajtolti”. Ijkuakon ye onechilui: “Kuali, san timomachtiskej achto tlamachtil”. Sapanoa onimotlajtlachialti ijkuak onechmachtijtoka itlaj yankuik tlen amo onikitaya. Onechtlajtlani ma nikintemo miakej tlaxelolmej itech Biblia Versión del  Rey Jacobo tlen onikpiaya. Axkan kema onimomachtijtoka akin melauak okatka toTajtsin Dios, Jehová. Non kualkan onimomachti eyi tlamachtilmej iuan tokni Jim. Nochi tonalmej jueves onimomachtiaya eyi tlamachtilmej. ¡Sapanoa onechpaktiaya! Uan ¡se ueyi tlateochiualistli ma nechmachti se tokni tlen poui itech tlapejpenalmej uan akin okixmatki tokni Russell!

Opanok seki kauitl uan opejki nitetlapouia iuan tlanechikol. Tokni Jim kuali onechpaleui ijkuak opejki nitetlapouia, pampa sapanoa oniuiuiyokaya, okachi ijkuak otitetlapouiayaj itech kalmej (Hechos 20:20). Mojmostla iuan onikisaya, uan satepan onechpaktiaya miak nitetlapouis. Axkan nikita tetlapouilistli ken se ueyi tlateochiualistli. ¡Pampa se ueyi tlateochiualistli titlapaleuiskej itech iteki toTajtsin Dios! (1 Corintios 3:9.)

Axkan namechtlapouis itlaj tlen onechpanok. Ijkuak opejki niktlasojtla Jehová (Apocalipsis 2:4). Nin tlasojtlalistli sapanoa nechpaleuia pampa ayakmo nikilnamikis tlen opanok itech guerra uan itech okseki ouijkayomej (Isaías 65:17).

Onka se tonal tlen nikilnamiki ika miak pakilistli. Itech xiuitl 1971. Notlakpata onechkixti itech kali kanin onechkauiliaya ma nimokaua. Ye amo okinekiaya nion se iTlaixpantijka Jehová ma chanti ompa. Amo onikpiaya miak tomin. Uan itech noteki onechtlaxtlauiayaj itech ome semanas uan yikin oniktlami notomin pampa onikmokouili notlaken pampa ika nitetlapouis. Oniknekiaya kuali nimotlakentis pampa ijkon nikueyichiuaskia Jehová. Maski onikpiaya achitsin tomin, okatka kanin kitlatia tomin itech altepetl Michigan, ik norte itech altepetl kanin onimoskalti. Ik non, seki tonalmej  onichanti itech nocarro. Onimaltiaya itech gasolineras.

Se tonal oniajsito kualkan itech kali kanin otimonechikoayaj pampa titetlapouiskiaj. Yikin oniualaya itech noteki. Oniketsalti nocarro ikuitlapan kali, ompa amo ikaj onechitaya. Ompa opejki nikilnamiki nochi tlen onikitak itech guerra tlen omochi itech ueyi altepetl Vietnam: Ken omijnekuia intlalnakayo tlaltikpaktlakamej ijkuak otlatlatokaj, ken sapanoa miak estli okatka. Noijki onikakiaya ken soldados onechtlajtlaniayaj: “¿Niyoltos? ¡Xinechpaleui!”. Ne onikmatiaya yejuan mikiskiaj, pero onimochijchikauaya pampa amo ma kimatikan ika ken omotaya noixko. Sapanoa onimoyolkoko.

Opejki nimotlatlaujtia uan noijki onichokak (Salmo 56:8). Uan opejki nikilnamiki yetos yolitilistli. San niman, kuali onikajsikamatki tlen kichiuas Jehová: Kitekitiltis yolitilistli pampa ayakmo tikilnamikiskej ouijkayomej ken tlen onikinmitak, uan kinyolseuis nochtin tlaltikpaktlakamej akinmej axkan tlajyouijtokej. ToTajtsin Dios oksepa kinyolitis nochtin uan kinmachtis pampa ma kixmatikan (Hechos 24:15). Onikmachili sapanoa onechtlasojtlaya Jehová. Tlen onikmachili oajsik itech noyolo. Ik non, sapanoa nikilnamiki non tonal. Itech non tonal hasta axkan nimochijchikaua pampa amo nikpolos non tlasojtlalistli tlen onikpixki inauak Jehová, okachi ijkuak nitlajyouia.

Tlaltikpaktlakamej kichiuaj miak tlamantli tlen amo kuali ijkuak onka se guerra, uan ne noijki ijkon onikchi. Ijkuak nimokuayejyekoa tlen kijtoaj seki tlaxelolmej nechpaleuiaj pampa amo ma nimoyolkoko. Achto, Apocalipsis 12:10, 11 ompa kijtoa ken Diablo yokitlanilijkej amo san ika nochi tlen kuali tlen tikchiuaj, noijki ika ieso ichkatsin. Okse tlaxelol Gálatas 2:20. Nin tlaxelol nechmachtia Jesucristo omikik “nopampa”. Jehová onechtlapojpolui ika ieso ikone. Ijkuak ijkon nimokuayejyekoa kichiua ma yeto ika yolseuilistli notlalnamikilis; uan nechyoleua pampa ma nikintlapoui oksekimej itech toTajtsin Dios akin sapanoa teiknomati (Hebreos 9:14).

Ijkuak nimokuayejyekoa itech tlen onechpanok, nikita kuali ken Jehová nochipa nechmaluia. Se neskayotl, ijkuak tokni Jim okimatki onichantitoka itech nocarro, san niman okilui se tokni akin okinkalotiaya tlaltikpaktlakamej. Kuali nikmatok Jehová okitekitilti tokni Jim uan non tokni siuatl pampa nikpias se kuajkualtsin kali kan nimokauaskia. ¡Jehová sapanoa yolkuali uan kuali kinmaluia itekipanojkauan!

Itech metstli mayo xiuitl 1971 onia itech ueyi altepetl Michigan. Achto niaskia ueyi altepetl Florida, onikintlali itech nocarro miakej amatlajkuilolmej pampa nitetlapouiskia ijkuak niaskia itech non altepetl. Pero itech tlajko ojtli onikintlami. San kanin onitetlapouiaya ika miak yolchikaualistli. Onitetlapoui kanin tsaktokej tlaltikpaktlakamej noijki onikinmakak amatlajkuilolmej tlaltikpaktlakamej tlen onikinmitaya kanin onimoseuiaya. Ok nimotlajtlania kox sekimej akinmej onikintlapoui okixmatkej Jehová (1 Corintios 3:6, 7).

Ijkuak yikin onimomachtijtoka Biblia amo onitetlapouiaya ika tlasojtlalistli. Ijkon okachi onechpanoaya iuan nokalchanejkauan. Ken sapanoa nikintlasojtla nokniuan John uan Ron, oniknekiaya ma kineltokakan tlen ne nikneltoka. Satepan onikinmilui ma nechtlapojpoluikan. Ok ayamo tlaneltokaj ijkon ken ne, pero niktlatlaujtia Jehová ma kinpaleui pampa ma tlaneltokakan. Axkan nitetlapouia ika tlasojtlalistli tlasojkamati pampa Jehová nechpaleuia (Colosenses 4:6).

Noyekuikalis iuan Jehová okachi ipati itech nonemilis. Pero noijki sapanoa nikintlasojtla oksekimej tlaltikpaktlakamej. Niktlasojtla miak nosiua Susan.  Oniknekiaya nimonamiktis iuan se siuatl ma nechpaleui pampa niktekichiuilis Jehová. Uan Susan sapanoa kitlasojtla Jehová. Se tonal ijkuak peua ninemi iuan, oniktlajpaloto ikalijtik itatajuan. Ompa onikitak ken omomachtijtoka Akin Tetlapouijtok ika ibiblia. Onechtlajtlachialti ijkuak onikitak ken okintemoaya nochi tlaxelolmej maski amo timomachtiskiaj itech tlanechikol. Onikitak ken sapanoa okipatioitaya mouikas iuan Jehová. Otimonamiktijkej itech metstli diciembre xiuitl 1971. Sapanoa nitetlasojkamati pampa nosiua nechpaleuia. Nechpaktia ken nechtlasojtla, pero okachi ken kitlasojtla Jehová.

Jehová otechtliokoli ome tokoneuan tlen yolkualmej, Jesse uan Paul. Jehová kinyekana uan kuali iuan mouikaj (1 Samuel 3:19). Non sapanoa techyolpaktia. Yejuan yikipiaj 20 xiuitl okachi kitekichiuilijtokej Jehová. Uan ijkon kichiuaj pampa kitlasojtlaj. Yejuan noijki omonamiktijkej uan okinpejpenkej kuali insiua pampa yejuan noijki kitlasojtlaj Jehová uan non niktlasojkamatilia (Efesios 6:6). Intoka Stephanie uan Racquel, sapanoa nikintlasojtla ken yetoskiaj nokoneuan.

Oniktekichiuili Jehová 16 xiuitl itech Rhode Island. Ompa nikinpia miakej noyolikniuan. Ok nikilnamiki tlayekankej tlen yolkualmej. Noijki nikintlasojkamatilia tlayekankej itech circuito pampa onechpaleuijkej. Se ueyi tlateochiualistli onitekitik iuan tokniuan tlen kitlasojtlaj miak Jehová. Itech  xiuitl 1987 otichantitoj itech ueyi altepetl Carolina del Norte pampa okachi titetlapouiskiaj. Ompa noijki tikinpiaj kuali toyolikniuan. * (Xikita tlajtoli tlen kiualika tlakxitlan.)

Itech metstli agosto xiuitl 2002, Susan uan ne otiajkej itech Betel tlen kajki itech altepetl Patterson itech ueyi altepetl Estados Unidos. Ompa onitekitiaya Kanin moyekana Tetlapouilistli uan Susan kanin kipaka tlakemitl. Ye sapanoa okipaktiaya iteki. Itech metstli agosto xiuitl 2005 opejki nitekiti iuan Cuerpo Gobernante tlen kipiaj iTlaixpantijkauan Jehová. Onimokuayejyekoaya amo uelis nikchiuaskia non tekitl. Susan noijki omotekipachoaya pampa kichiuaskia okse tekitl. Noijki ye amo okipaktiaya tlejkos itech avión. Pero axkan sapanoa tiktekitiltiaj. Susan sapanoa kipaleuia ijkuak kintlapouiaj tokniuan siuamej tlen innamik noijki poui itech Cuerpo Gobernante. Axkan ye sapanoa nechpaleuia, ik non, sapanoa niktlasojtla.

Kanin nitekiti nikinpia miakej tlaixkopinalmej, ijkuak nikinmita nikilnamiki sapanoa kuajkualtsin noyolilis. Jehová nechteochiua pampa amo nikilkaua ijkuak opejki niktlasojtla.