¡Xitlachixto!
“Maski uejkauas, ¡xitlachixto!” (HABACUC 2:3)
1, 2. ¿Tlen nochipa kichiuaj itekipanojkauan Jehová?
YIUEJKIKA Jehová okintemakak miakej tlajtolmej tlen satepan mochiuaskiaj. Uan itekipanojkauan nochipa kichiaj ma mochiuakan. Se neskayotl, Jeremías okijto babilonios kipojpoloskiaj Judá. Uan ijkon omochi itech xiuitl 607 achto itech xiuitl 1 (Jeremías 25:8-11). Teotlajtojki Isaías okijto Jehová kinpaleuiskia judíos tlen kisaskiaj itech ueyi altepetl Babilonia uan mokuepaskiaj inmialtepe. Uan noijki okijto melauak yolpakij nochtin akinmej tlachixtokej (Isaías 30:18). Teotlajtojki Miqueas noijki okimatiaya nochi mochiuaskia. Ik non, okijto ye nochipa tlachixtoskia (Miqueas 7:7). Uan noijki itekipanojkauan toTajtsin Dios omochixkej miak xiuitl pampa uelis ajsiskia Mesías tlen omoijto ualaskia (Lucas 3:15; 1 Pedro 1:10-12). *
2 Noijki tejuan tikchixtokej ma mochiua nochi tlen omoijto itech iTekiuajkayo toTajtsin Dios. Jesús ye ueyi Tekiua itech nin Tekiuajkayotl uan ayakmo miak poliui techmakixtis itech nochi tlamantli amo kuali. Uan ijkuak tlamis nochi tlen amo kuali, ye kinmixpolos akinmej amo yolkualmej uan kitlajtlamis nochi tlajyouilistli (1 Juan 5:19). Ken amo tikmatij keman tlamis nochi tlen amo kuali, moneki ma titlachixtokan.
3. Akinmej yiuejkika kichixtokej ma tlami nochi tlen amo kuali, ¿tlen uelis motlajtlaniaj?
3 Tiknekij itech Tlaltikpak ma mochiua itlanekilis toTajtsin Dios (Mateo 6:10). Pero tla yiuejkika tikchixtok ma tlami nochi tlen amo kuali, uelis timotlajtlania: “¿Ok moneki ma nitlachixto uan ma nimoyektlali?”.
¿TLEKA MONEKI MA TITLACHIXTOKAN UAN MA TIMOYEKTLALIKAN?
4. ¿Tleka moneki ma titlachixtokan uan ma timoyektlalikan?
4 Jesús okinnauati imachtijkauan ma tlachixtokan uan ma moyektlalikan. Uan miak ipati ma titlachixtokan ijkuak tikchiaj ma tlami nochi tlen amo kuali (Mateo 24:42; Lucas 21:34-36). Uan noijki ialtepe Jehová techilnamiktia ma titlachixtokan uan ma timoyektlalikan pampa ijkuak tlamis nochi tlen amo kuali. Noijki techiluia amo ma tikilkauakan Xochitlali tlen techmakaskej (xiktlajtolti 2 Pedro 3:11-13).
5. ¿Tleka moneki ma timoyektlalikan pampa ijkuak tlamis nochi tlen amo kuali?
5 Akinmej achto okichiuayaj ken Cristo omonekiaya ma tlachixtokan uan ma moyektlalikan pampa itonal Jehová. Pero axkan okachi moneki ma timoyektlalikan pampa ijkuak tlamis nochi tlen amo kuali. ¿Tleka? Pampa tlen okijto Jesús techititia ye yitlanauatijtok uan tikatej itech saiktlami tonalmej. Se neskayotl, axkan itech Tlaltikpak okachi onka ouijkayotl uan itech nochi Tlaltikpak motetlapouijtok itech Tekiuajkayotl. Nochi nin opejki mochiua itech xiuitl 1914 (Mateo 24:3, 7-14). Jesús amo okijto keski uejkauaskiaj ninmej tonalmej. Ik non, moneki ma timoyektlalikan pampa amo tikmatij keman tlamis nochi tlen amo kuali.
6. ¿Tleka tikijtoaj itech Tlaltikpak okachi mochiuas tlen amo kuali?
6 Axkan tonalmej itech Tlaltikpak okachi yetos tlajyouilistli. ¿Ken tikmatij? Pampa Biblia kijtoa tlaltikpaktlakamej okachi kichiuaskej tlen amo kuali “itech iksemi tonatijmeh” (2 Timoteo 3:1, 13; Mateo 24:21; Apocalipsis 12:12). Ik non, maski onka miak tlamantli amo kuali, tikmatij okachi mochiuas tlen amo kuali. Pero ¿kipia yetos sapanoa miak tlajyouilistli achto tlamis tlen amo kuali?
7. Ijkuak timokuayejyekoaj itech Mateo 24:37-39, ¿tlen timomachtiaj?
7 Miakej mokuayejyekoaj achto uits “weyi tlaijyowílistli” moneki yetos apistli, kokolistli uan guerras itech nochi altepemej (Apocalipsis 7:14). Pero amo ijkon panos. ¿Tleka? Pampa tla ijkon panoa itech nochi altepemej tlaltikpaktlakamej kitaskej melauak panotok tlen okijto Jesús. Uan noijki akinmej amo tlaneltokaj itech Biblia kimatiskiaj. Pero Jesús okijto miakej amo kimatiskiaj tikatej itech saiktlami tonalmej. Ye okijto kintlajtlachialtis ijkuak uits pampa yejuan amo itlaj kintekipachoa (xiktlajtolti Mateo 24:37-39). Ijkuak timokuayejyekoaj itech tlen okijto Jesús, ¿tlen timomachtiaj? Achto peuas ueyi tlajyouilistli, amo tikchiaskej ma mochiua okachi tlajyouilistli uan ijkon nochtin kimatiskej yitlamis tlen amo kuali (Lucas 17:20; 2 Pedro 3:3, 4).
Kuali tikmatij yitikatej itech saiktlami tonalmej itech nin Tlaltikpak kanin mota tlen amo kuali
8. ¿Tlen kuali tikmatij tiitekipanojkauan toTajtsin Dios?
8 Jesús okijto tlen panoskia itech saiktlami tonalmej pampa ijkon akinmej tlachixtokej ma kimatikan yitlamis nochi tlen amo kuali. Tiitekipanojkauan toTajtsin Dios titlachixtokej (Mateo 24:27, 42). Ik non, itech xiuitl 1914 ik tlayekapan, tikitaj ken mochijtok tlen okijto Jesús. Kuali tikmatij yitikatej itech saiktlami tonalmej itech nin Tlaltikpak kanin mota tlen amo kuali. Uan Jehová yikimati keman kitlajtlamis nochi tlen amo kuali.
9. ¿Tleka miak ipati ma titlachixtokan uan ma timoyektlalikan?
9 Miak ipati ma titlachixtokan uan ma timoyektlalikan. ¿Tleka? Achto, pampa tiknekij tiktlakamatiskej Jesús. Ome, kuali tikmatij yimochijtok tlen ye okijto panoskia itech saiktlami tonalmej. ¿Ken tikmatij? Amo pampa tikneltokaj san tlen techiluiaj. Ijkon tikneltokaj pampa kuali mota ken melauak mochijtok nochi tlen ijkuilitok itech Biblia.
¿KESKI KAUITL TIMOCHIASKEJ?
10, 11. 1) ¿Tleka Jesús okinmilui imachtijkauan ‘ma ijsatokah’? 2) ¿Tlen moneki tikchiuaskej tla ayamo ajsi tonal ijkuak tlamis nochi tlen amo kuali? (Xikita tlaixkopinal tlen ika peua tlamachtil.)
10 Miakej tiiTlaixpantijkauan Jehová yitikpiaj miak xiuitl tikchixtokej ma tlami nochi tlen amo kuali. Pero maski yitikpiaj miak xiuitl tiktekichiuilijtokej toTajtsin Dios noso yikin otipejkej, moneki titlachixtoskej uan timoyektlaliskej. Moneki kuali tiyetoskej ijkuak uits Jesús pampa kipojpolos nochi tlen kiyekantok Satanás. Ma tikilnamikikan Jesús okinmilui imachtijkauan ma tlachixtokan pampa amo okimatiayaj keman tlamis nochi tlen amo kuali. Uan noijki okinmilui: “Ni tlamochiwas kemi ijkuak se tlakatl yawi wejka, pero ijkuak ya oonewas, achto kinnajnawatijtewah itlakawah makimokuitlawilikah icha, kinmajmakatewa inteki iwa n kaltentlamokuitlawi kilia mayektlamokuitlawi. Yika nomejwah xiijsatokah, porke mach nonkimatih kemania ajsiki n tekowa de non kali, kox tiótlaki, tlajkoyuak noso kualka ijkuak tlakuika n kaxtil, amo kichiwa walkalakiki iwa nomechajsiki nonkochtokeh. Tlan nomejwah nomechilia, noiwa nochteh nikinmilia: Xiijsatokah” (Marcos 13:33-37).
San niman kitlajtlamiskej tlaneltokalistli tlen amo melauak
11 Ijkuak akinmej okichiuayaj ken Cristo okimatkej Jesús opejki tlanauatia itech xiuitl 1914, okajsikamatkej ayakmo miak poliui pampa tlamis nochi tlen amo kuali. Ik non, opejki moyektlaliaj. ¿Ken omoyektlalijkej? Opejki okachi tetlapouiaj. Itech Marcos 13, Jesús okijto nin tlakatl uelis uejkauaskia okachi. Pero maski san tlen tonal ualaskia, yejuan omonekiaya ma tlachixtokan. Nin techmachtia tla yitikpiaj miak xiuitl tikchixtokej ma tlami nochi tlen amo kuali, non amo kijtosneki ok poliui miak noso amo keman tikitaskej. Moneki titlachixtoskej.
12. 1) Teotlajtojki Habacuc ¿tlen okitlajtlani Jehová? 2) ¿Uan tlen okinankili?
12 Teotlajtojki Habacuc omochixki uan okintlapoui tlaltikpaktlakamej pampa kimatiskiaj kipojpoloskiaj altepetl Jerusalén. Achto kichiuaskia nin tekitl, oksekimej teotlajtojkej noijki ijkon otetlapouijkej miak xiuitl. Uan Habacuc okitaya tlaltikpaktlakamej okatkaj sapanoa amo yolkualmej. Ik non, ye okitlajtlani Jehová: “¿Keski kauitl, oh Jehová, moneki nitsajtsitos xinechpaleui, pero te amo tinechkaki?”. Maski Jehová amo okilui keman kipojpoloskiaj altepetl Jerusalén, okinauati ma tlachixto uan okilui: “¡Amo uejkauas!” (xiktlajtolti Habacuc 1:2 uan 2:3). *
13. 1) ¿Tlen uelis mokuayejyekoskia Habacuc? 2) Tla Habacuc ijkon mokuayejyekoskia, ¿tlen kipanoskia?
13 Ximokuayejyeko Teotlajtojki Habacuc ayakmo tlachixtoskia uan mokuayejyekoskia: “Yikipia miak xiuitl nikchia ma kipojpolokan Jerusalén. Uelis ok poliui miak kauitl, ik non, ayakmo nitetlapouis. Oksekimej ma kichiuakan”. Tla Habacuc ijkon mokuayejyekoskia, ¿tlen kipanoskia? Ayakmo kuali mouikaskia iuan Jehová. Uan tla amo moyektlaliskia ijkuak otlanki nochi, mikiskia.
14. ¿Ken timomachilis itech Xochitlali?
14 Ijkuak tiyetoskej itech Xochitlali tikitaskej ken yomochi nochi tlen Jehová okijto panoskia itech saiktlami tonalmej. Ijkuakon, ¿ken timomachilis? Sapanoa titlaneltokas itech Jehová uan kuali tikmatos kichiuas tlen yokijto (xiktlajtolti Josué 23:14). * Melauak tiktlasojkamatiliskej miak Jehová ijkuak kitlajtlamis nochi tlen amo kuali ijkuak omonekiaya uan pampa okinnauati itekipanojkauan ma tlachixtokan uan ma moyektlalikan (Hechos 1:7; 1 Pedro 4:7).
MA TITETLAPOUIKAN IJKUAK OK TIMOCHIXTOKEJ
¿Titetlapouia ken moneki? (Xikita párrafo 15)
15, 16. ¿Tleka moneki ma titetlapouikan?
15 Ialtepe Jehová nochipa techilnamiktia sapanoa miak ipati ma tiktekichiuilikan toTajtsin Dios. Non techpaleuis pampa nochipa tiktekichiuiliskej, uan okachi techpaleuis pampa amo tikilkauaskej moneki titetlapouiskej totoka. Nochi tlen Jesús okijto panoskia axkan tonalmej yimochijtok uan ayakmo miak poliui pampa tlamis nochi tlen amo kuali. Ik non, tikpatioitaj tiktekichiuiliskej Jehová uan titetlapouiskej kuali tlajtolmej itech Tekiuajkayotl (Mateo 6:33; Marcos 13:10).
16 Ayakmo miak poliui pampa kipojpoloskej nochi tlen kiyekantok Satanás. Ijkuak titetlapouiaj, tikinpaleuiaj tlaltikpaktlakamej ma momakixtikan. Ma tikitakan se neskayotl tlen techmachtis tleka miak ipati ma tikinpaleuikan oksekimej ma momakixtikan. Itech xiuitl 1945, se barco tlen okichijchijkej itech altepetl Alemania oapolaki uan miakej omikej. Se namiktilistli omomakixti uan satepan omochijkej iTlaixpantijkauan Jehová. Siuatl kilnamiki ijkuak barco oapolakiaya se siuatl chikauak otsajtsiaya pampa imaletas uan miak tlamantli patio tlen okiuikaya, oapolakiayaj. Pero oksekimej kuali okimatkej omonekiaya ma kinpaleuikan oksekimej ma momakixtikan. Axkan noijki miakej uelis mikiskej. Ik non, moneki ma titetlapouikan pampa tikmatij miakej uelis momakixtiskej. Tiknekij tikinpaleuiskej miakej ma momakixtikan, ik non, timochijchikauaj tikinpaleuiskej.
Xikteititi tikpatioita tetlapouilistli (Xikita párrafo 17)
17. ¿Tleka tikneltokaj san tlen tonal tlamis nochi tlen amo kuali?
17 Tikitaj nochi tlen kijtoa Biblia mochijtok uan ayakmo miak poliui pampa tlamis nochi tlen amo kuali. Ayakmo miak poliui pampa Naciones Unidas uan tekiuajkej kinekiskej kitlajtlamiskej tlaneltokalistli tlen amo melauak (Apocalipsis 17:16). ¿Moneki miak kauitl pampa ijkon ma mochiua? Amo. Ma tikilnamikikan toTajtsin Dios kichiuas tekiuajkej ma kinekikan kitlajtlamiskej tlaneltokalistli tlen amo melauak. Jehová uelis kichiuas san niman ma kinekikan uan ye kichiuas keman ye kinekis (Apocalipsis 17:17). Ayakmo miak poliui pampa ma tlami nochi tlen kiyekantok Satanás. Ik non, ma tikchiuakan ken okijto Jesús: “Ximotlachilikah; amo xiktlakuawakah nomoyolo ika tlan amo kuali, amo san xitlakuajtinemikah, amo xitlawantinemikah iwa amo xikkawilikah manomechtekipacho tlan onka itech nin tlaltíkpaktli. Porke Ne san nonkisaki itech neká tonati” (Lucas 21:34, 35; Apocalipsis 16:15). Ma titlachixtokan uan ma tiktekichiuilikan Jehová. Ma titlaneltokakan Jehová kinmakixtis akinmej tlachixtokej uan moyektlaliaj (Isaías 64:4).
18. ¿Tlen timomachtiskej chikome?
18 Ijkuak tikchiaj ma tlami nochi tlen amo kuali, ma tikchiuakan ken okijto Judas. Ye okijto ma tikchikauakan totlaneltokilis, ma tiktlatlaujtikan Jehová uan ma ‘tiyetokan itech itlasojtlalis toTajtsin Dios, ijkuak ok tikchiaj iteiknomatilis toTeko Jesucristo uan yolilistli tlen kajki toixpan tlen amo keman tlamis’ (Judas 20, 21, TNM). ¿Ken uelis tikteititiskej melauak tikchiaj tiyoltoskej itech Xochitlali? Nin chikome timomachtiskej.
^ párr. 1 Itech página 200 itech amochtli ¿Tlen melauak tlamachtia Biblia?, tikajsis miak tlamantli tlen omoijto itech Mesías uan ken omochi. Nin amochtli kichijchiuaj iTlaixpantijkauan Jehová.
^ párr. 12 Habacuc 1:2 kijtoa: “¿Keski kauitl, oh Jehová, moneki nitsajtsitos xinechpaleui, pero te amo tinechkaki? ¿Keski kauitl moneki nitsajtsitos xinechmakixti itech neteuilistli, pero te amo tinechmakixtia?”. Uan 2:3 kijtoa: “Pampa kochtemikilistli mochiuas itech kauitl tlen yomoijto mochiuas, uan totoka yaui hasta itlamian nochi, uan amo tekajkayauas. Maski uejkauas, ¡xitlachixto! Pampa melauak mochiuas. ¡Amo uejkauas!”.
^ párr. 14 Josué 23:14 kijtoa: “Axkan, ¡xikitakan!, ne yinimikis, uan namejuan kuali nankimatij ika nochi namoyolo uan ika nochi namoyolilis, nion se tlajtoli opoliuik itech nochi kuali tlajtolmej tlen okijto Jehová namoDios. Nochi melauak omochijkej. Nochi tlen okijto omochi”.
