IJKUAK onikpiaya chiknaui xiuitl ayakmo onimoskalti. Axkan yinikpia 43 xiuitl uan san niajsi se metro. Notatajuan onechiluijkej ma nitekiti pampa amo ma nimokuayejyeko tleka amo onimoskalti. Ik non, iyekapan nokalijtik opejki niknemaka tlakilotl. Ken tlachipauak kanin onitlanemakaya, miakej onechtlakouiliayaj.

Pero maski sapanoa onitekitiaya amo onechpaleuiaya ika nochi tlen onechtekipachoaya. Se neskayotl, ijkuak oniaya tienda amo oniajsiaya pampa nikitas tlen onka. Nochi okichijchijkej pampa akinmej uejkapantikej. Uan non onechyolkokoaya. Pero ijkuak onikpiaya 14 xiuitl, nonemilis omopatlak.

Se tonal ome iTlaixpantijkauan Jehová okikoatoj tlakilotl. Yejuan onechiluijkej uelis nechmachtiskej ika Biblia, uan onikseli. Onechmachtijkej ma nikita okachi kuali ma nimomachti itech Jehová uan amo tlen onechpanotoka. Nin sapanoa onechpaleui. Sapanoa nechpaktia tlen kijtoa Salmo 73:28, ijkuak peua kijtoa: “Nimotokis monauak [Jehová] non tlen okachi kuali”.

Ijkuakon iuan nokalchanejkauan otichantiayaj itech ueyi altepetl Costa de Marfil. Ompa miakej onechixmatiayaj uan yomomatkej onechitayaj. Pero se tonal otiajkej itech altepetl Burkina, uan nonemilis omopatlak. Tlaltikpaktlakamej san onechitayaj, ik non, san onimoka nokalijtik. Miakej semanas satepan onikilnamik onechpaktiaya nimomachtis itech Jehová. Pero ompa amo ikaj onechmachtiaya itech Jehová. Ik non, onikintlajkuilili iTlaixpantijkauan Jehová uan okititlankej se misionera tlen sapanoa yolkuali tlen itoka Nani. Ijkuak onechtlajpaloto oyaya ipan se moto.

Kanin onichantiaya itech ojtli okatka miak tlali, uan melauak oui pampa uelis ajsiskiaj nokalijtik. Uan ijkuak okiauiaya sapanoa otlasokitiaya. Nani miak uelta ouetski ijkuak oyaya nechtlajpaloti itech moto, pero amo keman omosotla. Se tonal onechilui iuan ma nimonechiko itech kali kanin omonechikoayaj. Amo onikmatiaya tlen nikiluis, pampa nikisaskia uan miakej nechitaskiaj. Uan noijki tla Nani nechuikaskia itech moto, okachi oui pampa kuali tiajsiskiaj. Pero onikilui kema niaskia. Sapanoa onechyolchika tlen satepan kijtoa tlaxelol tlen nechpaktia, ompa kijtoa: “Itech Jehová noTajtsin Dios nimopaleuia”.

 Nani uan ne miak uelta otiuetskej ijtik sokitl. Pero ken otechpaktiaya timonechikoskej amo otechtekipachoaya tla otiuetsiayaj. Itech ojtli miakej amo kuali onechitayaj. Pero ijkuak onikatka iuan tokniuan yejuan kuali onechseliayaj. Ik non, chiknaui metstli satepan onimoapolakti.

Kanin tlami tlaxelol tlen nechpaktia kijtoa: “Pampa nikijtos nochi tlen tikchiua”. Nin tlaxelol onechilnamiktiaya omonekiaya ma nitetlapoui, pero onikmatiaya sapanoa oui niaskia itech inkalijtik tlaltikpaktlakamej. Ijkuak opejki nitetlapouia, miakej tlaltikpaktlakamej uan konemej onechitayaj uan ouetskayaj ken oninejnemiaya. Nin sapanoa onechyolkoko. Sapanoa onechpaleui nikilnamikis yejuan uan ne sapanoa otiknekiayaj ma uiki Xochitlali.

Pampa uelis nitetlapouiskia onikmokouili se triciclo. Tla omonekiaya titlejkoskej se tepetl, akin iuan oniaya onechpaleuiaya. Uan tla otitemoayaj se tepetl ye noijki otlejkoaya itech triciclo. Achto melauak oui pampa nitetlapouiskia, pero yolik onikchi. Sapanoa onechpakti, ik non, itech xiuitl 1998 opejki nitekiti ken precursora.

Miakej onikinmachti ika Biblia uan naui omoapolaktijkej. Uan noijki se nokni omoapolakti. Nikmatis sekimej kema motokiaj iuan Jehová, non nechpaleuia ijkuak nimoyolkokoa. Se neskayotl, se telpochtli tlen oyaya universidad onikmachtiaya ika Biblia pero san ikaltempa. Satepan onikilui okse tokni tlakatl ma kimachti. Satepan nin telpochtli oyajki itech ueyi altepetl Costa de Marfil. Ijkuak onikpiaya paludismo onechmakakej se carta tlen okiualtitlankej de Costa de Marfil. Ompa okijtoaya telpochtli yitetlapouia. ¡Sapanoa oniyolpakik!

Pampa uelis nimopaleuis, sekimej tlaltikpaktlakamej tlen kinpaleuiaj akinmej mokokoaj, onechmachtijkej ma nitlajtsoma. Se akin onechmachtiaya okitak sapanoa nitekiti. Ik non, okijto uelis nechmachtiskia ma nikchiua xapo. Uan ijkon okichikej. Ik non, axkan itech nokalijtik nikchiua xapo pampa ika tlapakaskej uan xapo pampa ika maltiskej. Akinmej kitekitiltiaj sapanoa kinpaktia xapo uan kinmiluiaj oksekimej noijki ma kitekitiltikan. Ne niknemakati xapo uan nio ipan se moto tlen kipia eyi ruedas.

Pero nokuitlapan okachi nechkokoa. Ik non, itech xiuitl 2004 ayakmo onitekitik ken precursora. Pero ok nitetlapouia.

Tlaltikpaktlakamej kijtoaj nochipa niuetskatok. Uan melauak ijkon pampa sapanoa niyolpaki. ¿Tikmati tleka niyolpaki? Pampa nimotokis iuan Jehová non tlen okachi kuali pampa ne. (Nin techtlapouia Sarah Maiga.)