1, 2. ¿Tlen techmachtia Biblia itech tlasojtlalistli?

TLASOJTLALISTLI non tlen okachi kinextia Jehová (1 Juan 4:16). Uan Jesús kichiua ken iTajtsin. Jesús achto okichijchijke itech nochi tlen onka uan sapanoa miak xiuitl yikajki iuan toTajtsin Dios itech iluikak. Ik non, kuali kimati Jehová sapanoa tetlasojtla (Colosenses 1:15). Jesús nochipa kinextia tlasojtlalistli itech iluikak uan noijki okinexti ijkuak ouala nikan Tlaltikpak. Ik non, kuali tikmatij Jehová uan Jesús nochipa tlanauatiskej ika tlasojtlalistli.

² Yiuejkika, se tlakatl okitlajtlani Jesús tlen tlanauatil okachi ipati. Jesús okinankili: “‘Xiktlasojtla Moteko Dios ika nochi moyolo, ika nochi moalma iwa ika nochi motlalnamikilis’. Ye nin tlanawátili non okachi tlayakantok iwa okachi weyi kijtosneki. Iwa onka ok se tlanawátili non kimoiknitia iwa kijtoa: ‘Xiktlasojtla mokni kemi te timotlasojtla’” (Mateo 22:37-39).

3. ¿Akinmej moneki tikintlasojtlaskej?

 ³ Miak ipati ma tikintlasojtlakan nochtin. Jesús okijto ma tiktlasojtlakan Jehová uan oksekimej. Pero ¿akinmej moneki tikintlasojtlaskej? Nochtin akinmej touan katej. Se neskayotl, tla yotimonamiktijkej, moneki tiktlasojtlaskej tonamik. Noijki moneki tikintlasojtlaskej tokniuan itech tlanechikol uan akinmej tikintlapouiaj ika Biblia. Itech nin tlamachtil tikitaskej ken uelis tikintlasojtlaskej nochtin yejuan.

4. Ken nochtin akinmej yomonamiktijkej tlajtlakolejkej, ¿uelis yolpakiskej itech innamiktilis?

⁴ Ijkuak Jehová okinchijchi Adán uan Eva, ye okinnamikti. Ijkon Jehová okichijchi namiktilistli. Ye okinekiaya Adán uan Eva ma yolpakikan uan ma kitemitikan Tlaltikpak ika inkoneuan (Génesis 1:27, 28). Pero ijkuak okixnamikej Jehová okipolojkej pakilistli. Uan ken tinochtin tiuitsej itech Adán uan Eva, ik non, tinochtin titlajtlakolejkej uan timikij (Romanos 5:12). Ken nochtin akinmej yomonamiktijkej tlajtlakolejkej, ¿uelis yolpakiskej itech innamiktilis? Kema. Akinmej yomonamiktijkej uelis yolpakiskej. ¿Tleka? Pampa Jehová kuali kinyekana ika Biblia (xiktlajtolti 2 Timoteo 3:16, 17).

5. ¿Tleka miak ipati tlasojtlalistli itech namiktilistli?

⁵ Biblia kijtoa pampa kuali yetos namiktilistli, moneki yetos tlasojtlalistli. Tlatitlanil Pablo okijto ken monextia tlasojtlalistli tlen melauak, ye okijto: “Akin tetlasojtla, kimati texikoa; semi yolyámanki iwa amo xikojmiki; amo xankuatl nion moweyilia. Amo tlawijwikaltia nion kitemoa san tlan ye kipaktia; amo kimati kualani nion tekokolia. Amo paki ijkuak kinmita oksikimeh tlaijyowiah por intlajtlakol, yej paki ijkuak pankisa tlan milák. Akin tetlasojtla nochi kijyowia, nochi kineltoka, kimati moyekchia iwa nochi kixikoa. N tlasojtlálistli ayik tlamis” (1 Corintios 13:4-8). Tla akinmej yomonamiktijkej kichiuaj ijkon ken okijto Pablo, uelis yolpakiskej.

6, 7. 1) Ijkon ken kijtoa 1 Corintios 11:3, ¿akin tlayekana itech se kalchanejke? 2) ¿Ken moneki kiyekanas isiua tlakatl akin kichiua ken Cristo?

⁶ Jehová yokijto akin tlayekanas itech se kalchanejke. Pablo okijto: “Cristo Ye n tlayákanki, itech nochi tlakatl non kitlakita. Iwa n teokich ye akin kiyakana isiwa, ijkó kemi Dios kinawatia Cristo” (1 Corintios 11:3). Tlakatl tlayekana itech se kalchanejke. Pero nin amo kijtosneki uelis kintlajyouiltis inkalchanejkauan. Jehová kineki ma kintlasojtla inkalchanejkauan. Noijki, Jehová kinmaka se kuali neskayotl pampa ye nochipa kiyekana Jesús ika tlasojtlalistli uan amo san itech motekipachoa. Ik non, Jesús kipaktia kitlakamatis Jehová. Ye okijto: “Ne niktlasojtla Notajtsi” (Juan 14:31). Tla Jehová amo kitlasojtlaskia Jesús, ye amo keman ijkon kijtoskia.

⁷ Biblia kijtoa tlakatl kiyekana isiua. Pero noijki kijtoa tlakatl moneki kuali kimaluis isiua (1 Pedro 3:7). ¿Ken uelis kichiuas? Moneki kitas uan kimakas nochi tlen kipoloa. Biblia kijtoa: “Tlakatl non yotimonamikti,  xiktlasojtla mosiwa, ijkó kemi Cristo otechtlasojtlak tejwah non Dios okimpéjpenki iwa omotemakti para makimiktikah por tejwah” (Efesios 5:25). Kema, Jesús melauak okintlasojtlaya imachtijkauan uan omikik pampa ma momakixtikan. Tla se tlakatl kichiua ken Jesús uan kitlasojtla isiua. Isiua okachi kitlasojtlas, kitlakaitas uan kipaleuis (xiktlajtolti Tito 2:3-5).

8. ¿Ken moneki tikinmitaskej tokniuan?

⁸ Itech nochi Tlaltikpak katej miakej tokniuan tlen kitekichiuiliaj Jehová. ¿Ken moneki tikinmitaskej? Biblia kijtoa moneki tikintlasojtlaskej nochtin tlaltikpaktlakamej, pero okachi tokniuan tlen tlaneltokaj (Gálatas 6:10; xiktlajtolti Romanos 12:10). Tlatitlanil Pedro okijto tla tiktlakamatij toTajtsin Dios, tikintlasojtlaskej tokniuan ika nochi toyolo. Uan noijki okijto miak ipati ma timotlasojtlakan (1 Pedro 1:22; 4:8).

9, 10. ¿Tleka san sekan tikatej tiitekipanojkauan Jehová?

⁹ Tiitekipanojkauan Jehová amo ken oksekimej tlaltikpaktlakamej. ¿Tleka? Pampa tejuan tikintlasojtlaj tokniuan ika nochi toyolo. Noijki, tiktlasojtlaj Jehová uan tiktlakamatij itlanauatiluan. Ik non, ye techmaka iespíritu  santo. Nin espíritu, chikaualistli tlen okachi ueyi itech nochi semanauak uan techpaleuia ma tiyetokan san sekan iuan nochtin tokniuan itech nochi Tlaltikpak (xiktlajtolti 1 Juan 4:20, 21).

¹⁰ Tlatitlanil Pablo okijto miak ipati ma timotlasojtlakan. Ye okijto: “Ximokemelokah ika nochi tlan nomechpalewis iwa xiteiknomatikah, xiktechiwilikah tlan kuali, ximotsikitsintilikah, xiyetokah nonyolyamankeh iwa xitexikokah. Xitexikokah iwa ximotlapojpolwikah. Iwa tla se nomokni onomechchiwili itla amo kuali, xiktlapojpolwikah, ijkó kemi Cristo onomechtlapojpolwi. Iwa tlan okachi ipati, iwa weyi kijtosneki: ximotlasojtlakah iwan oksikimeh, porke n tlasojtlálistli, ye tlan techyekseitilia” (Colosenses 3:12-14). Akinmej tikchiuaj ken Cristo san sekan tikatej pampa timotlasojtlaj maski tlatlamantli toaltepe. Tiyolpakij miak pampa tikmachiliaj nin tlasojtlalistli.

11. ¿Tlen kiteititia tikpiaj tlaneltokalistli tlen melauak?

¹¹ TiiTlaixpantijkauan Jehová timotlasojtla uan san sekan tikatej. Nin kiteititia tikpiaj tlaneltokalistli tlen melauak. Jesús okijto: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:34, 35). Uan tlatitlanil Juan okijkuilo: “Weletis tikitas akin ikone n Totajtsi Dios, iwa akin ikone n diablo. Akin amo kichiwa tlan kuali, nion kitlasojtla ikni, amo ikone Dios. Nomejwah yononkikakeh desde ijkuak ononkineltokakeh n Cristo, iwa otechilijkeh: matimosepantlasojtlakah” (1 Juan 3:10, 11). Kuali mota tiiTlaixpantijkauan Jehová melauak tikchiuaj ken Cristo pampa timotlasojtlaj uan san sekan tikatej. Noijki, toTajtsin Dios otechpejpenkij pampa titetlapouiskej itech iTekiuajkayo itech nochi Tlaltikpak (Mateo 24:14).

12, 13. 1) ¿Tlen kichijtokej axkan “senmiaktikeh tlaltikpaktlakah”? 2) ¿Ken yetoskej satepan “senmiaktikeh tlaltikpaktlakah”?

¹² Axkan sapanoa miakej iTlaixpantijkauan Jehová pouij itech “senmiaktikeh tlaltikpaktlakah”. Ninmej tlaltikpaktlakamej uitsej itech miakej altepemej uan kipaleuiaj iTekiuajkayo toTajtsin Dios. Biblia kijtoa yejuan “akimeh yopanokeh itech n weyi tlaijyowílistli, yejwah yokimpakeh intlakenwah iwa okinmistayaltijkeh ika iesso n Ichkatsi”. Nin kijtosneki tlaneltokaj itech imikilis Jesús. Kitlasojtlaj Jehová uan nochipa kiueyichiuaj uan noijki kitlasojtlaj Jesús (Apocalipsis 7:9, 14, 15).

¹³ San niman, toTajtsin Dios kitlajtlamis nochi tlen kiyekantok Satanás itech “weyi  tlaijyowílistli” (Mateo 24:21; xiktlajtolti Jeremías 25:32, 33). * Pero ken Jehová sapanoa kintlasojtla itekipanojkauan, ye kinmaluis uan kinkauilis ma yoltokan itech Xochitlali. Kichiuas tlen okijto yikipia kanaj 2,000 xiuitl, “kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli”. ¡Ximokuayejyeko ken sapanoa kualtsin yetos tonemilis ijkuak ayakmo yetos tlen amo kuali, tlajyouilistli nion mikilistli! (Apocalipsis 21:4).

14. ¿Keski tlaltikpaktlakamej pouij itech “senmiaktikeh tlaltikpaktlakah” axkan?

¹⁴ Ijkuak opejkej saiktlami tonalmej itech xiuitl 1914, san okatkaj kanaj 5,000 itekipanojkauan Jehová. Maski otlajyouijkej, yejuan akinmej okichiuayaj ken Cristo tlen okichiayaj yaskej iluikak otetlapouijkej pampa okintlasojtlayaj tlaltikpaktlakamej uan toTajtsin Dios okinpaleui ika iespíritu santo. Pampa ijkon okichijkej, axkan monechikoaj “senmiaktikeh tlaltikpaktlakah” tlen kichiaj yoltoskej nochipa itech Xochitlali. Kanaj 8 millones iTlaixpantijkauan Jehová poui itech “senmiaktikeh tlaltikpaktlakah”. Nochtin yejuan monechikoaj itech kanaj 115,400 tlanechikolmej itech nochi Tlaltikpak. ¡Uan ok miakej monechikojtokej! Se neskayotl, itech metstli septiembre xiuitl 2013 hasta agosto xiuitl 2014 omoapolaktijkej kanaj 275,500 tlaltikpaktlakamej. Nin kijtosneki 5,300 tlaltikpaktlakamej omoapolaktijkej sejse semana.

15. ¿Tlen techpaleuia ma titetlapouikan?

¹⁵ Sapanoa miakej tlaltikpaktlakamej kikakij kuali tlajtolmej itech Tekiuajkayotl. Pampa uelis titetlapouiskej, techpaleuiaj miak toamatlajkuiloluan tlen katej ika kanaj 700 tlatlamantli tlajtolmej. Se neskayotl, revista Akin Tetlapouijtok moxexeloa itech nochi Tlaltikpak. Sejse metstli mochijchiuaj kanaj 52 millones ika 247 tlatlamantli tlajtolmej. Noijki, yomochijchijkej kanaj 200 millones amochmej ¿Tlen melauak tlamachtia Biblia? Ika kanaj 250 tlatlamantli tlajtolmej.

16. ¿Tleka okachi moskaltia ialtepe Jehová?

¹⁶ Ialtepe Jehová okachi moskaltia pampa titlaneltokaj itech Jehová uan tikneltokaj ye otlanauati ma kijkuilokan Biblia (1 Tesalonicenses 2:13). Maski Satanás techkokolia uan techtlajyouiltia, tejuan kuali timouikaj iuan Jehová (2 Corintios 4:4).

17, 18. ¿Tlen kineki Jehová ma tikchiuakan ijkuak tlaltikpaktlakamej amo techkakij ijkuak tikintlapouiaj?

¹⁷ Ijkuak titetlapouiaj, sekimej kuali techkakij pero oksekimej amo. ¿Tlen kineki Jehová ma tikchiuakan? Maski san tlen kichiuaskej tlaltikpaktlakamej, ye kineki ma tikchiuakan tlen kijtoa Biblia. Se neskayotl, Colosenses 4:6 kijtoa moneki titlajtoskej nochipa ika tlakaitalistli. Uan ken tikintlasojtlaj nochtin, moneki tikintlakaitaskej ijkuak tikintlapouiskej itech tlen tikneltokaj (1 Pedro 3:15).

¹⁸ Maski tlaltikpaktlakamej kualanij ijkuak tikintlapouiaj uan amo kinekij techkakiskej, tejuan tikchiuaj ken Jesús uan tikintlasojtlaj. Biblia kijtoa ijkuak akinmej okikokoliayaj Jesús opejkej kiuijuikaltia, ye amo okinnankili. Uan ijkuak okitlajyouiltijtoka, “ye  amo okimiliaya kimokopilis, yej nochi okikawaya imak Dios” (1 Pedro 2:23). Ik non, ijkuak tlaltikpaktlakamej amo kuali techselia, tikteititiaj yolyamanilistli uan amo timomakuepaj. Okachi kuali, timochijchikauaj pampa tikinchiuiliskej tlen kuali (1 Pedro 3:8, 9).

19. ¿Ken moneki tikinmitaskej akinmej techkokoliaj?

¹⁹ Tla tiyolyamankej, tiktlakamatiskej nin tlanauatil tlen okijto Jesús: “Noiwa yononkikakeh tlan yomijto: ‘Xiktlasojtla non mitstlasojtla, iwa xikkokoli non mitskokolia’. Pero Ne nomechilia: Xikintlasojtlakah akimeh nomechkokoliah, iwa xiktlajtlanilikah Dios makintiochiwa akimeh nomechtotojtokah. Ijkó nomejwah nonyetoskeh ipilwah n Totajtsi Dios non kajki ilwikak. Ye kichiwa makisa n tonati impa non kichiwah tlan kuali iwa kichiwah tlan amo kuali. Iwa kualtitlani n kiawitl impa n kualteh tlakah iwa n tlakah non amo kualteh” (Mateo 5:43-45). Kema, moneki tikintlasojtlaskej akinmej techkokoliaj maski san tlen tlamantli techtoktiskej.

20. ¿Keman motlasojtlaskej nochtin tlaltikpaktlakamej uan nochtin kitlasojtlaskej Jehová? (Xikita tlaixkopinal tlen ika peua tlamachtil.)

²⁰ Nochipa moneki tikteititiskej tiktlasojtlaj Jehová uan nochtin tlaltikpaktlakamej. Maski sekimej techkokoliaj uan amo techkakij ijkuak tikintlapouiaj, tikinpaleuiaj ijkuak moneki. Tlatitlanil Pablo okijkuilo: “Amaka itla xikwikilikah, yej ximotlasojtlakah non nochteh; porke akin kitlasojtla itlakaikni, ika noni yokichi tlan kijtoa n tlanawatílistli. Porke n tlanawatílistli kijtoa: ‘Amo ximomekati, amo xiteichtakamikti, amo xitlachteki, amo xitlakajkayawa, amo xikelewi tlan amo moaxka’. Nochteh ninteh iwa n oksikimeh tlanawátilteh mochiwah san se, iwa ye ni tlan kijtosneki: ‘Xiktlasojtla mokni kemi te timotlasojtla’. Akin kimati tetlasojtla, amo kinchiwilia tlan amokuali n oksikimeh. Yika akin milák tetlasojtla, ika noni ya kichijtok nochi tlan kijtoa n tlanawátili” (Romanos 13:8-10). Satanás kichiua tlaltikpaktlakamej ma mokokolikan, pero tejuan tikintlasojtlaj nochtin (1 Juan 5:19). Ijkuak Jehová kixpolos Satanás uan demonios uan ijkuak kitlajtlamis nochi tlen amo kuali, ijkuakon nochtin motlasojtlaskej uan nochtin kitlasojtlaskej Jehová. ¡Nin yetos se ueyi tlateochiualistli!