¿Moneki tiktlaxtlauas impuestos?

Miakej amo kinpaktia kitlaxtlauaskej impuestos, kijtouaj tomin tlen tekiuajkej kololouaj amo kuali kitekitiltiaj. Oksekimej amo kineki kitlaxtlauaskej porque tomin kitekitiltiaj para kichiuaskej tlen amo kuali. Ijkon mokuayejyekouaj akinmej chantij itech se altepetl tlen kajki Oriente Medio, yejuan kijtouaj: “Amo tiktlaxtlauaskej tlamantli tlen ika kinmiktiaj tokoneuan”.

Miakej ijkon mokuayejyekouaj. Se tlakatl hindú tlen omotokayotiaya Mohandas Gandhi amo okinekiaya kitlaxtlauas impuestos, ye okijto: “Akinmej kinpaleuiaj tekiuajkej para makipiakan tlen ika kinmiktiskej oksekimej, tlajtlakolchiuaj. Nochtin akinmej kitlaxtlauaj impuestos, kinpaleuiaj tekiuajkej para makichiuakan tlen amo kuali”.

Ixtlamatki Henry David Thoreau tlen oyoltoka siglo diecinueve okijto ye amo okitlaxtlauaya impuestos porque ika okitlaxtlauayaj guerras. Ye okijto: “¿Moneki tikkauiliskej se tekiua ma techilui tlen moneki tikpejpenaskej maski amo tiknekij? Tla moneki tikchiuaskej tlen techiluiaj, ¿tleka tikpiaj totlalnamikilis?”.

Biblia techmachtia moneki tikpiaskej kuali totlalnamikilis, ik non, akinmej tikchiuaj ken Cristo tikneki tikmatiskej tlen tikchiuaskej (2 Timoteo 1:3). Biblia techiluia tekiuajkej uelis kololoskej impuestos, ompa kijtoua: “Nochteh n tlakah moneki makintlakitakah n tekiwajkeh. Porke amo onka se tekiwa non Dios amo okitlali, porke nochteh n tekiwajkeh non axa tlanawatijtokeh, Dios okintlali. Yika, nomejwah xikintlakitakah n tekiwajkeh amo san para amo makualanikah, yej por nonkimatokeh ijkó moneki nonkichiwaskeh. Ika noni nomejwah nonkitlaxtlawah impuestos; porke n tekiwajkeh kichijtokeh n tekitl non Dios okinmák makichiwakah. Xiktlaxtlawakah nochi tlan moneki nonkitlaxtlawaskeh. Xiktlaxtlawakah impuestos” (Romanos 13:1, 5-7).

Tokniuan tlen ochantiayaj itech achto siglo, okitlaxtlauayaj impuestos maski okimatiayaj non tomin okitekitiltiayaj ijkuak omoteuiayaj. Axkan tiiTlaixpantijkauan Jehová noijki ijkon tikchiuaj. a Pero, ¿tleka tiktlaxtlauaj impuestos tla tikmati kitekitiltiaj para kichiuaskej tlen amo kuali? ¿Moneki tiktlaxtlauaskej impuestos maski tikmatij amo kuali kitekitiltiaj tomin?

Ken moneki tikitaskej impuestos

Itech achto siglo, impuestos tlen okitlaxtlauayaj tokniuan, tekiuajkej okitekitiltiayaj ijkuak omoteuiayaj. Ik non, Gandhi uan Thoreau okijtojkej amo okinekiayaj kitlaxtlauaskej impuestos.

Tokniuan tlen okichiuayaj ken Cristo okitlaxtlauayaj impuestos porque okitlakamatiayaj tlen kijtoua Romanos capítulo 13, noijki porque okimatiayaj ijkon omonekiaya kichiuaskej uan amo porque itlaj kinchiuiliskiaj (Romanos 13:5). Ik non, totlalnamikilis techiluia moneki tiktlaxtlauaskej impuestos maski kitekitiltiaj para kichiuaskej tlen amo kuali. Para tikajsikamatiskej nin, moneki tikmachtiskej totlalnamikilis, ijkon techiluis tlen tikchiuaskej uan tlen amo.

Ken okijto Thoreau tinochtin tikpiaj totlalnamikilis pero amo nochipa techpaleuia para tikyolpaktiskej toTajtsin Dios. Ik non, moneki kuali tikmachtiskej uan ijkon techpaleuis matikchiuakan tlen kuali. Para timokuayejyekoskej ken toTajtsin Dios, ualeua moneki tikpatlaskej ken timokuayejyekouaj porque Ye okachi ixtlamatki (Salmo 19:7). Ik non, moneki tikinmitaskej tekiuajkej ken Jehová kinmita ¿ken kinmita Ye?

Pablo okijto “tekiwajkeh kichijtokeh n tekitl non Dios okinmák makichiwakah” (Romanos 13:6). Nin kijtosneki yejuan kitlaliaj tlanauatilmej para kuali matiyetokan uan kitemaka okseki tlamantli tlen techpaleuia. Maski miakej tekiuajkej kichiuaj tlen amo kuali, tlapaleuiaj para matikinpiakan escuelas, mayetokan akinmej techmaluiskej uan akinmej techpaleuiskej ijkuak panoua seki tlamantli. ToTajtsin Dios kimati tekiuajkej amo nochipa kichiuaj tlen kuali pero kinkauilijtok matlanauatikan. Ik non, Ye kineki matiktlaxtlauakan impuestos tlen tekiuajkej kitlajtlanij.

ToTajtsin Dios amo nochipa kinkauilis tekiuajkej matlanauatijtokan. Ijkuak kitlalis iTekiuajkayo kinmachiuas nochtin tekiuajkej tlen axkan katej uan kiyektlalis nochi tlen yokijtlakojkej (Daniel 2:44; Mateo 6:10). Ken axkan ayamo tlanauatia toTajtsin Dios ok moneki tikintlakamatiskej uan tiktlaxtlauaskej impuestos.

¿Tlen uelis tikchiuaskej tla ok timokuayejyekouaj tlajtlakoli tiktlaxtlauaskej impuestos porque amo kuali kitekitiltia non tomin? Ualeua moneki tiaskej okachi tlakpak para okachi kuali tikitaskej nochi tlen onka. Ijkon panoua iuan toTajtsin Dios, Ye amo mokuayejyekoua ken tejuan, matikilnamiktokan Ye okachi ixtlamatki uan kimati tleka ijkon technauatia, tla ijkon tikchiuaj, okachi amo oui timokuayejyekoskej ken Ye. ToTajtsin Dios okilui Isaías makijkuilo: “Ijkon ken iluikak okachi ueyi uan amo ken tlaltikpak, ijkon noojuiuan okachi uejueyij uan amo ken namoojuiuan uan nokuayejyekoluan okachi uejueyij uan amo ken namokuayejyekoluan” (Isaías 55:8, 9).

¿Moneki nochipa titetlakamatiskej?

Maski Biblia technauatia matiktlaxtlauakan impuestos non amo kijtosneki tikchiuaskej nochi tlen tekiuajkej technauatiskej. Jesús okijto amo nochipa moneki ijkon tikchiuaskej. Ijkuak sekimej judíos okitlajtlanijkej Jesús kox kipaktiskia toTajtsin Dios makitlaxtlauilikan impuestos tekiua Romano, ye okinnankili: “Xikmakakah n César tlan iaxka n César, iwa xikmakakah Dios tlan iaxka n Dios” (Marcos 12:13-17).

Tekiuajkej tlanauatiaj makichijchiuakan tomin uan kijtouaj kech ipati. Ik non, toTajtsin Dios technauatia matikinkopilikan intomin ijkuak tiktlaxtlauaj impuestos. Jesús otlamachti amo uelis tikinmakaskej tekiuajkej tlen iaxka toTajtsin Dios ken tonemilis nion amo uelis tikinueyichiuaskej. Ijkuak tekiuajkej technauatiaj itlaj tlen toTajtsin Dios amo kipaktia “tejwah tikpiah tiktlakitaskeh tlan Dios kijtoa iwa amo tlan kijtoah n tlakah” (Hechos 5:29).

Xamo sekimej tokniuan amo kuali momachilia ijkuak kitlaxtlaua impuestos porque amo kuali kitekitiltiaj non tomin. Maski ijkon panoua, tiktlaxtlauaj impuestos uan amo tikinmiluiaj tekiuajkej tlen kichiuaskej ika non tomin. Ijkon tikchiuaj porque tikmatij toTajtsin Dios satepan tlayektlalis. Tikchiaj ijkuak Jesús ualtlanauatis uan tlayektlalis, ye okijto: “Notekiwajyo amo kajki itech nin tlaltíkpaktli” (Juan 18:36).

Kuali tiyetoskej tla tiktlakamatij tlen kijtoua Biblia

Okachi kuali tiyetoskej tla tiktlakamatij tlen kijtoua Biblia uan tiktlaxtlauaj impuestos. Tla ijkon tikchiuaj, tekiuajkej amo itlaj techchiuiliskej uan amo timomojtijtoskej (Romanos 13:3-5). Noijki tla tikintlakamatij intlanauatiluan tekiuajkej, tikueyichiuaskej toTajtsin Dios uan totlalnamikilis amo techkuejsos. Sekimej amo kitemakaj impuestos maski kipiaj miak tomin pero tejuan tiktemakaj maski amo miak tikpiaj porque tikmatij toTajtsin Dios techmakas tlen moneki. David okijto: “Ne onikatka nitelpochtli, uan yoniueuejtik, pero amo onikitak makikauakan akin yolmelauak, nion ikoneuan makitemokan pan” (Salmo 37:25).

Tla tikajsikamatij uan tiktlakamatij tlanauatil tlen kijtoua moneki tiktlaxtlauaskej impuestos, kuali timomachiliskej. Porque toTajtsin Dios amo kita totlajtlakol ijkuak tekiuajkej amo kuali kitekitiltiaj tomin tlen tiktemakaj, ijkon panoua ijkuak itlaj tiktlaxtlauaj, amo totlajtlakol ken kitekitiltia tomin akin tiktlaxtlauiaj. Achto momachtiskia Biblia, se tlakatl tlen itoka Stelvio omochijchikauaya kipatlas ken otlanauatiayaj tekiuajkej ik sur ompa Europa. Satepan ayakmo ijkon okichi, ye okijto: “Onikajsikamatki amikaj uelis tlayektlalis, kichiuas kuali matiyetokan uan nochtin kuali matimouikakan. San iTekiuajkayo toTajtsin Dios uelis techpaleuis matikchiuakan tlen kuali”.

Tla tejuan noijki tikmakaj “Dios tlan iaxka n Dios”, tikitaskej ijkuak Ye kitlalis iTekiuajkayo nikan tlaltikpak uan kiyektlalis nochi tlen tekiuajkej yokijtlakojkej uan tlen amo kuali kichiuaj.

[Nota]

[Tlen moijtoua]

Matikilnamiktokan toTajtsin Dios okachi ixtlamatki uan kimati tleka ijkon technauatia, tla ijkon tikchiuaj, okachi amo oui timokuayejyekoskej ken Ye

[Tlen moijtoua]

Tla tiktlaxtlauaj impuestos, totlalnamikilis amo techkuejsos uan tikneltokaskej toTajtsin Dios techmakas tlen moneki

[Foto]

“Xikmakakah n César tlan iaxka n César, iwa xikmakakah Dios tlan iaxka n Dios”

[Foto]

Copyright British Museum