“Nochipa nonkitlakitaskeh notlajtol”

“Tla nomejwah nochipa nonkitlakitaskeh notlajtol, milák nonyetoskeh notlamachtijkawah. Iwa nonkixmatiskeh tlan milák, iwa tlan milák nomechmakixtis” (JUAN 8:31, 32).

¿Tlen kijtosneki tlen okijto Jesús? Ijkuak okijto “notlajtol”, kijtosneki tlen ye otlamachti. Pero ye okijto tlen otlamachtiaya amo okatka ye iaxka, okijto: “Notajtsi Akin onechaltítlanki onechnawati tlan moneki nikijtos iwa tlan moneki niktemachtis” (Juan 12:49). Ijkuak okitlatlaujti iTajtsin okilui: “Motlajtol ye tlan milák”. Ik non, ijkuak otlamachtiaya miak uelta okijto tlen toTajtsin Dios yokinmiluijka itekipanojkauan (Juan 17:17; Mateo 4:4, 7, 10). ¿Ken kiteititiaj nochipa kitlakaitaj itlajtol Jesús, akinmej melauak kichiuaj ken ye? Tlen kineltokaj uan tlen kichiuaj nochipa moyekanaj ika iTlajtol toTajtsin Dios porque kineltokaj non “tlan milák”.

Tlen okichijkej akinmej opejkej kichiuaj ken Cristo. Pablo akin okinmijkuilo okachi miakej cartas noijki okipatioitaya Biblia ijkon ken Jesús. Ye okijto: “Nochi tiotlajkuíloli Dios otlanawati makijkuilokah” (2 Timoteo 3:16). Noijki tlakamej tlen otlamachtiayaj itech tlanechikol okinmilui nochipa ma tlamachtikan “tlan milák kijtoa n kualitlájtoli” non okinmachtijkej (Tito 1:7, 9). Noijki okinmilui akinmej okichiuayaj ken Cristo: “Ximomaluikan para ijkon amo ‘nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati, porke yejwah amo kitemachtiah itlajtol Cristo, yej san tlan kiyejyekoliah n tlaltikpaktlakah’” (Colosenses 2:8).

¿Axkan akinmej ijkon kichiuaj? Constitución dogmática sobre la divina revelación -tlen Vaticano okijto ma moijkuilo itech xiuitl 1965 uan poui itech Catecismo de la Iglesia Católica kijtoua: “Tlen tlamachtia teopan amo nochi kisa itech Biblia. Tlen kijtouaj sekimej uan tlen kijtoua Biblia moneki tiktlakamatiskej uan tikchiuaskej”. Revista Maclean’s kijtoua se ministra tlen okatka ompa Toronto (Canadá) okijto: “¿Tleka moneki timoyekanaskej ika tlen okijto se tlakatl yikanaj 2,000 xiuitl? Tlen tejuan titlamachtiaj tikneltokaj kuali kajki, ik non, amo timoyekanaj ika tlen kijtoua Biblia nion tlen otlamachti Jesús, porque tlamo ayakmo techneltokiliskej”.

Amochtli New Catholic Encyclopedia kijtoua tlen kichiuaj iTlaixpantijkauan Jehová: “Tlen kineltokaj uan tlen kichiuaj nochipa kikixtiaj itech Biblia”. Ijkuak se iTlaixpantijka Jehová otetlapouijtoka, se tlakatl tlen chanti Canadá okilui: “Yinikmati akinmej namejuan”. Ye okimajpilui Biblia uan okilui: “Amochtli tlen tikpixtok kiteititia tiiTlaixpantijka Jehová”.