IJKUAK Jesús okatka nikan tlaltikpak okichiuaya ken iTajtsin. Ye okijto: “Amitla nikchiwa san tlan Ne nikneki. Ne sanwel nikijtoa tlan Notajtsi Dios onechmachti”, noijki okijto: “Porke nochipa nikchiwa tlan Ye kipaktia” (Juan 8:28, 29; Colosenses 1:15). Tla tiknekij tikmatiskej ken kinmita toTajtsin Dios siuamej, moneki timomachtiskej ken okinmitaya Jesús.

Akinmej momachtiaj Evangelios, kajsikamatij Jesús amo okinmitaya siuamej ijkon ken oksekimej. ¿Tleka? ¿Ken kinpaleuia axkan siuamej tlen Jesús otlamachtiaya?

Jesús amo okinmitaya siuamej san para inmiuan motekas. Miakej teopixkej judíos ijkuak okinmitayaj siuamej san okinekiayaj inmiuan auilnemiskej. Ik non, siuamej omonekiaya mokuatlakentiskej uan amo motlapouiskej inmiuan tlakamej. Pero Jesús amo okijto amo inmiuan ma mouikakan uan makinxelokan. Ye okijto tlakamej kuali mamonauatikan uan makintlakaitakan siuamej (Mateo 5:28).

Noijki Jesús okinmilui: “Akin kikajkawa isiwa iwa monamiktia iwan ok se, nin tlakatl san kimomekatijtok iwa tlajtlakolchijtok inawak non achto isiwa” (Marcos 10:11, 12). Jesús amo omokuayejyekouaya ijkon ken teopixkej, yejuan okijtouayaj tlakamej uelis mokajkauaskej inmixpan tekiuajkej “san por ayakmó kuali mowikah” (Mateo 19:3, 9). Judíos amo kuali okajsikamatiayaj tlen kijtosneki auilnemilistli. Yejuan amo okitayaj ken auilnemilistli ijkuak omotekayaj iuan se siuatl tlen amo okatka insiua. Teopixkej okijtouayaj san siuamej auilnemij uan tlakamej amo. Se tlakatl akin momachtia Biblia kijtoua: “Ijkuak Jesús okijto tlakatl noijki omonekiaya kintlakamatis tlanauatilmej ijkon ken siuatl, okiteititi kinpatioita siuamej”.

Tlen otlamachti axkan noijki kinpaleuia siuamej: Kanin monechikouaj iTlaixpantijkauan Jehová, siuamej mouikaj iuan tlakamej uan kuali momachiliaj porque kimatij yejuan kintlakaitaj. Tlakamej tlen kichiuaj ken Cristo kinpatioitaj siuamej, porque Biblia kijtoua: “Noiwa n tenantsitsinteh xikinyeknonotsa kemi yetoskia mona, iwan ichpokameh xikinnonotsa ika moyolo chipawak kemi yetoskiah moweltiwah” (1 Timoteo 5:2).

Jesús okinmachti siuamej. Teopixkej amo okinekiayaj kinmachtiskej siuamej. Pero Jesús okinmachtiaya tlen melauak uan okinmiluiaya makijtokan tlen omokuayejyekouayaj. Amo okijto san moneki tekipanoskej inkalijtik. Ijkon okiteititi ijkuak okikauili María makikaki tlen otlamachtijtoka (Lucas 10:38-42). Ijkuak oixpoliuik Lázaro, Marta, ikni María, okijto seki tlamantli tlen okiteititi ye noijki omomachtiaya tlen okijto Jesús (Juan 11:21-27).

Jesús okipatioitaya kinmachtis siuamej. Judías okipatioitayaj kipiaskej se inkone chokotsin porque satepan uelis kichiuskia miak tlamantli, ken yetoskia se profeta. Ik non, ijkuak se siuatl okilui Jesús “miak yolpakílistli kipia n siwatl non omítspixki”, ye opejki kimachtia uan okilui okachi ipati matitetlakamatikan (Lucas 11:27, 28). Ijkon okiteititi siuamej uelis kichiuaskej okseki tlamantli uan amo san kinpiaskej inkoneuan (Juan 8:32).

Tlen otlamachti axkan noijki kinpaleuia siuamej: Kanin monechikouaj iTlaixpantijkauan Jehová, siuamej tlanankiliaj uan kuali kinkakij. Ijkuak katej miakej noso amo, akinmej tlayekanaj kintlakaitaj siuamej uan kinmitaj ken “tenameh yekmilajkameh” (Tito 2:3). Noijki tetlapouiaj kuali tlajtolmej (Salmo 68:11; xikita recuadro  “¿Pablo okijto siuamej amo matlajtokan?”, kajki itech página 9).

Jesús okinpatioitaya siuamej. Yiuejkika okachi okinpatioitayaj chokotsitsintin. Amochtli Talmud okijtouaya: “Yolpakij akinmej kinpiaj chokotsitsintin pero tepinati akinmej kinpiaj takotsitsintin”. Sekimej tetajmej okitayaj oui kipiaskej se ichpochtli porque omonekiaya kitemoliskej akin iuan monamiktis uan noijki kimakaskej tomin ijkuak monamiktiskia, noijki amo uelis kinmaluiskia itatajuan ijkuak yikipiaskiaj miak xiuitl.

Jesús okipatioitaya se takotsin ijkon ken se chokotsin. Ik non, okiyoliti itakotsin Jairo ijkon ken okiyoliti ichokotsin se siuatl tlen oixpoliuik inamik, tlen ochantiaya Naín (Marcos 5:35, 41, 42; Lucas 7:11-15). Noijki okipajti se siuatl tlen “yokiwikaya májtlaktli iwa n chikweyi xiwitl ika kokólistli” uan okitokayoti “siwatl non walewatok de Abraham”, nin tlajtoli amo okachi okixmatiayaj judíos (Lucas 13:10-16). Tlen okijto okiteititi kintlasojtla uan kinpatioita siuamej uan noijki okipatioitaya kuali omouikayaj iuan toTajtsin Dios (Lucas 19:9; Gálatas 3:7).

Tlen otlamachti axkan noijki kinpaleuia siuamej: Sekimej tlen chantij Asia kijtouaj, tikiskaltis se takotsin, yetoskia ken tikmaluiskia se xochitl tlen amo moaxka. Pero tetajmej akinmej kichiuaj ken Cristo amo ijkon mokuayejyekouaj. Kintlasojtlaj uan kinmaluiaj nochtin inkoneuan, takotsitsintin noso chokotsitsintin, kinmachtiaj uan ijkuak mokokoua kinpajtiaj.

Jesús okinneltokiliaya siuamej. Ijkuak se juez Judío oteixkomakaya uan omonekiaya tlajtos se siuatl, amo okineltokiliaya porque okitaya ijkon ken se tlakeuali. Ijkon okijtouaya historiador Josefo: “Tla se siuatl otlajtouaya ixpan se juez, amo ipati tlen okijtouaya porque okatka siuatl”.

¡Jesús amo ijkon okichiuaya! Ye okintitlanki sekimej siuamej makitematiltikan okiyolitijkej (Mateo 28:1, 8-10). Apóstoles amo okinneltokilijkej ninmej siuamej tlen okinmiluijkej porque nochtin okitakej ken okimiktijkej (Mateo 27:55, 56, 61; Lucas 24:10, 11). Pero Jesús okinpejpenki siuamej makitematiltikan okiyolitijkej, ijkon okiteititi okinpatioitaya uan okinneltokiliaya siuamej ijkon ken apóstoles (Hechos 1:8, 14).

Tlen otlamachti axkan noijki kinpaleuia siuamej: Tokniuan tlayekankej ijkon kiteititiaj ijkuak moneki kinkakiskej tlen mokuayejyekouaj tokniuan siuamej. Tlakamej akinmej yomonamiktijkej kiteititiaj kipatioitaj insiua ijkuak kuali kikakij (1 Pedro 3:7; Génesis 21:12).

Akinmej kichiuaj ken Cristo kinpatioitaj siuamej ijkon ken toTajtsin Dios okijto ijkuak okichijchi achto siuatl (Génesis 1:27, 28). Tlakamej akinmej kichiuaj ken Cristo uan yomonamiktijkej amo kintlajyouiltiaj insiua porque yejuan moyekanaj ika principios bíblicos uan non kichiua mayolpakikan (Efesios 5:28, 29).

Ijkuak Yelena opejki momachtia Biblia, inamik okitlajyouiltiaya pero ye amitlaj okijtouaya. Ye ijkon okichiuaya porque kanin omoskalti okintlajyouiltiayaj uan okinmichtekiayaj siuamej. Yelena kijtoua: “Biblia onechyolchika porque onimomachti kajki se Dios akin melauak nechtlasojtla, nechpatioita uan kitekipachoua tlen nechpanoua. Onikmatiaya tla nonamik peuaskia momachtis Biblia kipaleuiskia”. Ijkon opanok ijkuak inamik omoapolakti uan omochi iTlaixpantijka Jehová. Noijki kijtoua: “Axkan ayakmo nechtlajyouiltia uan otimomachtijkej moneki timotlapojpoluiskej. Principios bíblicos okipaleuijkej nonamik manechtlasojtla uan manechmalui” (Colosenses 3:13, 18, 19).

Amo san Yelena ijkon okipanok. Miakej siuamej tlen kichiuaj ken Cristo yolpakij porque innamik moyekana ika principios bíblicos. Yejuan kimachiliaj ken tokniuan tlakamej kinyolseuiaj, kintlakaitaj uan kinkauiliaj makijtokan tlen mokuayejyekouaj (Juan 13:34, 35).

Nochtin akinmej kichiuaj ken Cristo kimatij tlajtlakolejkej “porke nochi tlan Dios okichijchi oijtlakawik”. Pero kimatij tla kuali mouikaj iuan Jehová ajsis tonal uan ye kinmakixtis itech tlajtlakoli “iwa ijkó sansikah kipiaskeh weyílistli”. ¡Sapanoua kualtsin yetoskej tlakamej uan siuamej akinmej kinyekana toTajtsin Dios! (Romanos 8:20, 21).