Desde ijkuak onikatka nitsikitsin, nechpaktia nikitas nochi tlen onka. Onipaxalouaya iuan nofamilia ijtik kuajyo uan kanin kajki atl tlen kiyaualoua noaltepe Jyväskylä, ompa Finlandia. Noijki nechpaktiaj yolkamej. ¡Ijkuak onikatka nitsikitsin onechpaktiaya nikinnapalos noso nikinnauajtekis itskuintin uan mistomej! Ijkuak onimoskalti opejki nechyolkokoua ijkuak okintlajyouiltiayaj yolkamej. Ik non, opejki nitlapaleuia inmiuan akinmej okinmaluiayaj yolkamej. Ompa onikinmixmatki akinmej omokuayejyekouayaj ken ne.

Otimonechikouayaj uan miakej otikinmiluiayaj amo ma kintlajyouiltikan yolkamej uan ma kinmaluikan. Teixpan otikijtouayaj otlajtlakolchiuayaj akinmej okichiuayaj seki tlamantli ika inkuetlax yolkamej noso ijkuak okintekitiltiayaj para kimatiskiaj kox tepaleuiskia se pajtli. Satepan opejki tikchiuaj seki tlamantli para ayakmo ma kintlajyouiltikan yolkamej. Pero noijki otimouijtilijkej uan tekiuajkej otechtlajyouiltijkej. Miak uelta onechuikakej ixpan tekiuajkej uan onechtsakej.

Noijki onechyolkokuoaya tlen okinpanouayaj oksekimej. Ik non, opejki nitlapaleuia itech seki grupos ken Amnistía Internacional uan Greenpeace. Noijki onimochijchikauaya nikinpaleuis akinmej amitlaj okipiayaj uan akinmej oapismikiayaj.

Pero satepan onikitak amo uelis nikchiuaskia oksekimej ma kikauakan tlen amo kuali okichiuayaj. Ualeua ueli otikinpaleuiayaj oksekimej pero okseki tlamantli okachi omoouijtiliaya. Miakej sapanoua otlajyouiayaj uan amikaj okinpaleuiayaj. Melauak onechyolkokouaya nochi tlen opanouaya.

Nochipa san onimotekipachojtoka, ik non, opejki nimokuayejyekoua tlen kijtoua Biblia uan toTajtsin Dios. Achto yonimomachtijka iuan iTlaixpantijkauan Jehová uan onechpakti yejuan yolkualmej uan tetlasojtlaj, pero onikitaya oui nikpatlas nonemilis. Pero axkan okseki tlamantli onimokuayejyekouaya.

Oniktemo noBiblia uan opejki niktlajtoltia. Onechyolseui tlen ompa oniktlajtolti. Oniktlajtolti kanin kijtoua moneki tikinmaluiskej yolkamej. Proverbios 12:10 kijtoua: “Akin yolmelauak kinmaluia iyolkauan”. Noijki onikajsikamatki amo itlajtlakol toTajtsin Dios nochi tlen amo kuali panotok. Tinochtin titlajyouiaj porque amo tikchiuaj tlen toTajtsin Dios techiluia. Ijkuak onikmatki toTajtsin Dios sapanoua techtlasojtla uan kimati mochias, oajsik itech noyolo (Salmo 103:8-14).

Se tonal onikajsik se cupón tlen kipia amochtli ¿Tlen techmachtia Biblia? uan oniktitlanki para ma nechmachtikan. San niman onechtlajpalotoj ome iTlaixpantijkauan Jehová uan onechiluijkej kox oniknekiaya nimomachtis uan onikinmilui ma nechmachtikan. Noijki opejki nimonechikoua. Yolik oajsik itech noyolo tlen onimomachtijtoka.

Tlen onimomachtijtoka onechpaleui ma nikpatla nonemilis. Ayakmo onitlachichinak, ayakmo onitlauanki, okse tlamantli opejki nimotlakentia uan nitlajtoua uan noijki opejki nikintlakaita tekiuajkej (Romanos 13:1). Noijki ayakmo oniauilnenki ken achto onikchiuaya.

Pero oui onikitak ayakmo nipouis itech grupos tlen otlapaleuiayaj. Onimokuayejyekouaya amo kuali nikchiuaskia tla ayakmo inmiuan nitlapaleuiskia. Yolik opejki nimokuayejyekoua ken kineki Jehová. Onikajsikamatki san iTekiuajkayo uelis techpaleuis. Ik non, ika nochi noyolo opejki nikpaleuia iTekiuajkayo uan noijki opejki niktematiltia tlen kichiuas (Mateo 6:33).

Yiuejkika, ijkuak oniknekiaya nitlapaleuis onimokuayejyekouaya okatkaj akinmej yolkualmej uan akinmej amo, uan oniknekiaya ma kintlajyouiltikan tlen amo yolkualmej. Axkan ayakmo nitekokolia uan nitetlasojtla porque yinikmati tlen kijtoua Biblia (Mateo 5:44). Nikteititia nitetlasojtla ijkuak niktematiltia tlen kichiuas toTajtsin Dios. Niyolpaki ijkuak nikita akinmej tikintlapouiaj kimatij tlen kichiuas toTajtsin Dios uan yolpakij.

Axkan yonimoyolseui porque nikmatok san ye Jehová uelis kiyektlalis tlen techtlajyouiltia. Nikneltoka toTajtsin Dios kichiuas ayakmo ma titlajyouikan nion tejuan nion yolkamej uan noijki kiyektlalis tlaltikpak. Ika iTekiuajkayo kiyektlalis nochi tlen yokijtlakojkej itech nochi tlaltikpak (Isaías 11:1-9). Amo san niyolpaki porque yinikmati tlen kichiuas toTajtsin Dios. Noijki niyolpaki porque nikinpaleuia oksekimej ma kineltokakan. Axkan nikmatok san toTajtsin Dios uelis tlayektlalis.