1, 2. 1) ¿Tleka otlajyouijtoka tlanechikol tlen okatka Colosas? 2) ¿Tlen okinmilui Pablo tokniuan tlen okatkaj Colosas?

ITECH achto siglo, tlanechikol tlen okatka Colosas melauak otlajyouijtoka. Sekimej okijtoayaj omonekiaya kintlakamatiskej Tlanauatilmej tlen okinmijkuilo Moisés, ik non, tlanechikol oxexelitoka. Oksekimej okijtoayaj okatka se tlajtlakoli yolpakiskej itech innemilis. Pampa amo tlaneltokaskiaj ken yejuan, tlatitlanil Pablo okinmijkuilili se amatlajkuilol tokniuan tlen omonechikoayaj Colosas. Okinmilui: “Ximotlachilikah; amo kichiwa nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati, porke yejwah amo kitemachtiah itlajtol Cristo, yej san tlan kiyejyekoliah n tlaltikpaktlakah” (Col. 2:8).

² Tla tokniuan tlapejpenalmej mokuayejyekoskiaj “san tlan kiyejyekoliah n tlaltikpaktlakah” kixtopeuaskiaj tlen toTajtsin Dios okinmakak pampa ma momakixtikan (Col. 2:20-23). Pampa uelis kuali mouikaskiaj iuan toTajtsin Dios, Pablo okinmilui: “Xiktlalikah nomotlachialis itech tlan onka ilwikak, iwa amo itech tlan onka itech nin tlaltíkpaktli”  (Col. 3:2). Kema, tokniuan tlapejpenalmej omonekiaya mokuayejyekoskej itech ‘tlan okinchiaya ilwikak’ (Col. 1:4, 5).

3. 1) ¿Tlen kichiaj kiseliskej tokniuan tlapejpenalmej? 2) ¿Tlen timomachtiskej axkan?

³ Axkan tokniuan tlapejpenalmej noijki san mokuayejyekoaj itech iTekiuajkayo toTajtsin Dios tlen kajki iluikak uan noijki kichiaj tlanauatiskej iuan Cristo (Rom. 8:14-17). Pero ¿tlen moneki kichiuaskej akinmej mokauaskej itech Tlaltikpak? ¿Tlen kijtosneki pampa yejuan tlen okijkuilo Pablo? ¿Ken uelis mokuayejyekoskej itech “tlan onka ilwikak”? (Juan 10:16.) Maski Abrahán uan Moisés otlajyouijkej, nochipa okitekichiuilijkej toTajtsin Dios uan omokuayejyekojkej itech “tla onka ilwikak”. ¿Tlen techmachtia inneskayo?

4. Tokniuan tlen mokauaskej itech Tlaltikpak, ¿ken uelis mokuayejyekoskej itech tlen onka iluikak?

⁴ Maski sekimej tokniuan amo yaskej iluikak, kema uelis mokuayejyekoskej itech tlen onka iluikak. ¿Ken kichiuaskej? Moneki okachi motekipachoskej itech Jehová uan iTekiuajkayo (Luc. 10:25-27). Ijkon okichi Cristo uan tejuan noijki moneki ijkon tikchiuaskej (1 Ped. 2:21). Itech achto siglo miakej omokuayejyekoayaj tlen amo kuali, itech tomin uan tlen onka itech Tlaltikpak, axkan miakej noijki ijkon mokuayejyekoaj (xiktlajtolti 2 Corintios 10:5). Ma tikchiuakan ken Jesús, ma titlachixtokan uan ma timomaluikan pampa amo ma moijtlako totlaneltokilis.

5. ¿Ken uelis tikmatiskej kox timokuayejyekoaj itech tomin uan tlen onka itech Tlaltikpak?

⁵ ¿Techijtlakojtok tlen oksekimej mokuayejyekoaj itech tomin uan tlen onka itech Tlaltikpak? ¿Ken uelis tikmatiskej tlen tiktlasojtlaj? Ma tikitakan tlen timokuayejyekoaj uan tikchiuaj. Jesús okijto: “Kan kajki tlan momejwah nonkimoliah ipati, ompa kajki nomoyolo” (Mat. 6:21). Pampa tikmatiskej tlen tikpiaj itech toyolo moneki timoyejyekoskej. Ma timotlajtlanikan: “¿Nochipa nimokuayejyekojtok itech tomin, nikpias se kuali tekitl noso nikpias nochi tlen nikneki? ¿Noso nimochijchikaua pampa amo niknekis miak tlamantli, uan nimokuayejyekoa itech iTekiuajkayo toTajtsin Dios?” (Mat. 6:22). Jesús okijto tla timochijchikauaj pampa tikpiaskej miak tlamantli, uelis moijtlakos totlaneltokilis (Mat. 6:19, 20, 24).

6. ¿Tlen uelis tikchiuaskej pampa amo ma tikchiuakan ken tlaltikpaktlakamej?

⁶ Ken titlajtlakolejkej uelis tikchiuaskej tlen amo kuali (xiktlajtolti Romanos 7:21-23). Tla amo tikpiaj iespíritu santo Jehová uelis tikchiuaskej tlen amo kuali. Ken “ilwimeh kan tlatlakualo, nion matitlawantinemikah, amo matikchijtinemikah tlan amo kuali kiyoltilana tokuerpo” (Rom. 13:12, 13). Pampa amo ma techyoltilana nochi tlen kichiuaj tlaltikpaktlakamej moneki timokuayejyekoskej itech tlen onka iluikak. Pero nochi nin melauak oui. Ik non tlatitlanil Pablo okijto: “niknajnawatia nokuerpo iwa niktoktia manechtlakita” (1 Cor. 9:27). Tla tiknekij tikyolpaktiskej toTajtsin Dios, moneki tiknauatiskej totlalnakayo. Axkan ma timomachtikan tlen okichijkej Abrahán uan Moisés (Heb. 11:6).

7, 8. 1) ¿Tlen okinpanok Abrahán uan Sara? 2) ¿Itech tlen omokuayejyekoaya Abrahán?

⁷ Ijkuak Jehová okilui Abrahán ma kinuika ikalchanejkauan itech altepetl Canaán, ye ika nochi iyolo okitlakamatki. Jehová okichi se tlajtolsenkaualistli iuan Abrahán pampa ye melauak otlaneltokaya uan otetlakamatiaya, okilui: “Nikchiuas xiyeto se ueyi altepetl uan nimitsteochiuas” (Gén. 12:2). Pero opanok miak xiuitl iuan Abrahán uan Sara amo okinpiayaj inkoneuan. ¿Omotlajtlanijkej kox Jehová okilka tlen okinmilui kichiuaskia? Uan noijki uelis oui kinkauaskiaj inkalchanejkauan uan inkalijtik tlen okipiayaj Ur, se ueyi altepetl tlen okatka Mesopotamia. Pampa uelis ajsiskiaj Canaán onejnenkej kanaj 1,600 kilómetros, ijkuak oajsikej ochantikej itech mantajkalmej, amo okipiayaj tlakuali uan noijki okatkaj miakej tlen okichiuayaj tlen amo kuali (Gén. 12:5, 10; 13:18; 14:10-16). Pero amo omokuayejyekojkej mokuepaskej inkalijtik (xiktlajtolti Hebreos 11:8-12, 15).

⁸ Abrahán amo omokuayejyekoaya itech tlen onka itech Tlaltikpak, ye nochipa otlaneltokak itech Jehová (Gén. 15:6). Omokuayejyekoaya itech tlen onka iluikak: san omokuayejyekoaya itech tlen okilui toTajtsin Dios. Uan Jehová okiteochi pampa otlaneltokak. Satepan oksepa okilui: “‘Xiajkotlachia, nimitstlatlaujtia, xitlachia iluikak, uan xikinpoa sitlalimej, tla ueli tikinpoa’. Uan okilui: ‘Ijkon mochiuaskej moxuiuan’” (Gén. 15:5). ¡Jehová amo keman okilka! Ijkuak kitaskia iluikak kilnamiktiskia tlen toTajtsin Dios okilui kichiuaskia. Uan oajsik tonal ijkuak Abrahán uan Sara okipixkej inkone tlen melauak okichiayaj (Gén. 21:1, 2).

9. ¿Ken uelis tikchiuaskej ken Abrahán?

⁹ Ijkon ken Abrahán, tejuan tikchixtokej ma mochiua tlen Jehová okijto (2 Ped. 3:13). Tla amo timokuayejyekojtokej itech tlen onka iluikak, uelis timosotlauaskej uan ayakmo tiktekichiuiliskej Jehová ika nochi toyolo. ¿Otimochijchika pampa titekitis ken precursor noso pampa okachi tiktekichiuilis toTajtsin Dios? Tla ijkon, kuali tlen otikchi. Pero ¿uan axkan? Xikilnamiki Abrahán, ye nochipa okitekichiuili Jehová uan omokuayejyekoaya itech “altepetl non kuali yektlakxilitok iwa ayik wetsis”, uan omokuayejyekoaya itech nochi tlateochiualismej tlen kiseliskia (Heb. 11:10). “Abraham okineltokak, yika Dios okitak kemi se tlakatl yolchipawak.” (Rom. 4:3.)

10. ¿Ken okipiaya inemilis Moisés ijkuak okatka telpochtli?

¹⁰ Moisés noijki san omokuayejyekoaya itech tlen onka iluikak. Ijkuak okatka telpochtli okimachtijkej ijkon ken se egipcio tlen okachi ixtlamatki. Ye kuali okimachtijkej, pampa itech non tonalmej Egipto okatka se ueyi altepetl, uan noijki Moisés okatka se ikalchanejka faraón. Ika nochi tlen okimachtijkej ye okatka se tlakatl “non kuali oixtlamatia itech nochi tlan okijtoaya iwa tlan okichiwaya” (Hech. 7:22). Ika nochi tlen okimachtijkej ye uelis kichiuaskia miak tlamantli tlen miak ipati itech Egipto. Pero ye san omokuayejyekoaya kichiuas itlanekilis toTajtsin Dios.

11, 12. 1) ¿Tlen okachi okipatioitaya Moisés? 2) ¿Ken okiteititi okachi okipatioitaya tlen okimatiaya itech Jehová?

 ¹¹ Ijkuak Moisés okatka konetsintli okiskalti Jokébed akin okatka inantsin, uan uelis tikijtoskej okitlapoui itech inTajtsin Dios hebreos. Moisés okachi okipatioitaya tlen okimatiaya itech Jehová. Ik non, amo okiseli tomin uan tekitl tlen uelis kipiaskia (xiktlajtolti Hebreos 11:24-27). Tlen okimachtijkej itech Jehová ijkuak okatka konetsintli, uan itlaneltokilis okipaleui pampa ma mokuayejyeko itech tlen onka iluikak.

¹² Maski egipcios okimachtijkej Moisés ye amo okitemo tomin nion ma kixmatikan itech Egipto. Ken kijtoa Biblia, “amo okinek makinotsakah ikone ichpoch n rey de Egipto. Yej okinek sansikah makitlaijyowiltikah iwan ipilwah n Dios, iwa amo san kech tonati mopaktijtinemis itech inmelewilis n tlajtlákoli”. Uan seki xiuitl satepan, tlen okimatiaya itech Jehová okipaleui ma kiyekana altepetl Israel.

13, 14. 1) ¿Tlen omonekiaya kichiuas Moisés achto kinmakixtiskia israelitas? 2) Ijkon ken Moisés, ¿tlen moneki ma tikchiuakan?

¹³ Moisés okitlasojtlaya Jehová uan altepetl Israel, akinmej okatkaj tlakeualmej itech Egipto. Ijkuak okipiaya 40 xiuitl okineltokaya uelis kinmakixtiskia israelitas (Hech. 7:23-25). Pero Jehová okimatiaya ayamo uelis kinmakixtiskia. Omonekiaya kipias yolyamanilistli, kixikoskia nochi, amo niman kualaniskia uan kuali monauatiskia (Prov. 15:33). Pampa kixikoskia nochi ouijkayotl tlen kipanoskia omonekiaya kipias nochi ninmej tlamantli. Ik non, 40 xiuitl otekitik ken tlajpixki.

¹⁴ Okipaleui miak tlen omomachti ken tlajpixki. Uan Biblia kijtoa Moisés “ye akin okachi okatka yolyamanki itech nochi tlakamej tlen okatkaj ipan Tlaltikpak” (Núm. 12:3). Yolyamanilistli okipaleui pampa amo mokualaniskia iuan israelitas, pampa sejse yejuan tlatlamantli omokuayejyekoayaj uan otlajyouiayaj (Éx. 18:26). Noijki tiknekij tikpiaskej toyelis ken Moisés pampa tikxikoskej “weyi tlaijyowílistli” uan uelis tiyoltoskej itech xochitlali (Apoc. 7:14). ¿Kuali timouikaj iuan nochtin, noijki iuan akinmej san niman kualanij? Tlatitlanil Pablo okijto: “Xikintlakitakah nochteh, xikintlasojtlakah n tokniwah” (1 Ped. 2:17).

15, 16. 1) ¿Tleka miak ipati ma timokuayejyekokan itech tlen onka iluikak? 2) ¿Tleka miak ipati ma tikpiakan kuali toyelis?

¹⁵ Axkan tikatej “itech iksemi tonatijmeh [kanin onka] miak tlaijyowílistli” (2 Tim. 3:1). Ik non, pampa ma yeto chikauak totlaneltokilis uan ma tiijsatokan, moneki ma timokuayejyekokan itech tlen onka iluikak (1 Tes. 5:6-9). Ma tikitakan eyi tlamantli kanin uelis ijkon tikchiuaskej.

¹⁶ Toyelis: ¿Tleka miak ipati ma tikpiakan kuali toyelis? Pedro okiyekijto: “Kuali xinemikah inmixpah non amo kineltokah Dios, porke [...], yejwah kitaskeh nochi tlan kuali nonkichiwah iwa kiweyijkachiwaskeh Dios” (1 Ped. 2:12). Tla titekititokej, timomachtijtokej, timoyolpaktijtokej noso titetlapouijtokej nochipa ma tikueyichiuakan Jehová ika toyelis. Tinochtin titlajtlakolchiuaj (Rom. 3:23). Pero tla ‘timochijchikawa itech totlaneltokalis”, uelis tikxikoskej uan amo tikchiuaskej tlen kineki totlalnakayo (1 Tim. 6:12).

17. ¿Ken uelis tikchiuaskej ken Cristo? (Xikita tlaixkopinal tlen ika peua tlamachtil.)

 ¹⁷ Kuali ma timokuayejyekokan: Pampa kuali tikpiaskej toyelis moneki noijki kuali ma timokuayejyekokan. Tlatitlanil Pablo okijto: “Xikpiakah nomotlayejyekolis ijkó kemi Cristo okípixki, ijkuak owala itech nin tlaltíkpaktli” (Filip. 2:5). ¿Ken omokuayejyekoaya Cristo? Okatka yolyamanki. Uan non okipaleui ma kitekichiuili Jehová ika nochi iyolo. Nochipa okinekiaya kintlapouis oksekimej itech Tekiuajkayotl (Mar. 1:38; 13:10). Noijki okipatioitaya moyekanas ika iTlajtol toTajtsin Dios (Juan 7:16; 8:28). Kuali omomachtiaya tlen okijtoaya, ik non, itech otlajto, okijto melauak tlen ompa moijtoa uan okiyekijto tlen kijtosneki. Tla tiknekij tikchiuaskej ken ye, moneki timomachtiskej Biblia uan titetlapouiskej ika yolpakilistli uan yolyamanilistli.

18. ¿Ken uelis titlapaleuiskej itech tekitl tlen otechmakak Jehová?

¹⁸ Tlapaleuilistli tlen tiktemakaj: Jehová kineki itech “itoka n Jesús, mamotlankuaketsakah nochteh akimeh kateh ilwikak, akimeh nemih ipan tlaltíkpaktli” (Filip. 2:9-11). Maski Jesús kipia se ueyi tekitl itech iluikak, ika yolyamanilistli ye noijki kitlakamati iTajtsin. Uan tejuan noijki ijkon moneki tikchiuaskej (1 Cor. 15:28). Ik non, ma titlapaleuikan itech iteki Jehová uan ma “[t]ikinmachtikah nochteh n tlaltikpaktlakah” (Mat. 28:19). Uan noijki ma tikinpaleuikan nochtin tlaltikpaktlakamej uan noijki tokniuan (Gál. 6:10).

19. ¿Tlen techyoleua nin tlamachtil?

¹⁹ Melauak tiktlasojkamatiliaj Jehová pampa techpaleuia ma timokuayejyekokan itech tlen onka iluikak. Ijkuak ijkon timokuayejyekoaj “ika miak yolchikawálistli matimotlelokah” (Heb. 12:1). Ma tiktekichiuilikan Jehová ika nochi toyolo. Tla ijkon tikchiuaj ye techmakas miakej tlateochiualismej (Col. 3:23, 24, TNM).