1. 1) ¿Tlen kimatij itekipanojkauan Jehová? 2) ¿Tleka axkan miak ipati? 3) ¿Tlen timomachtiskej axkan?

ITEKIPANOJKAUAN Jehová kimatij nochi kuali kisa ijkuak kinmachtiaj tlen kichiuaskej. Se neskayotl, ijkuak Abrahán omoteui iuan akinmej okikokoliayaj okinuikak tlakamej tlen kuali okinmachtijkej ken moteuiskej, ijkon okimakixti Lot (Génesis 14:14-16). Ijkuak okatka ueyi tekiua David, noijki okatkaj sekimej tlakamej tlen omomachtijkej kitlakuikiliskej Jehová (1 Crónicas 25:7). ¿Tleka miak ipati nin? Achto pampa axkan moneki timoteuiskej iuan Satanás uan nochi tlen kiyekana (Efesios 6:11-13). Uan noijki pampa timochijchikauaj tikueyichiuaskej Jehová, ijkuak tikintlapouiaj oksekimej tlaltikpaktlakamej (Hebreos 13:15, 16). Ijkon ken itekipanojkauan Jehová kuali omomachtiayaj, noijki axkan tejuan moneki kuali timomachtiskej pampa kuali tikchiuaskej toteki. Itech tlanechikol, tlayekankej kipiaj se tekitl tlen okinmakak Jehová, kinmachtiskej oksekimej (2 Timoteo 2:2). Axkan timomachtiskej seki tlamantli tlen oksekimej tlayekankej kichiuaj pampa kinmachtiskej oksekimej.

2. Ijkuak se tlayekanki kimachtis se tokni, ¿tlen uelis kichiuas uan tleka?

² Se tlayekanki ijkon ken se tlakatl akin tlatoka. Achto kitokas xinachtli  uelis kitlalilis abono pampa kuali ma moskalti tlen kitokas. Noijki ijkuak se tlayekanki kimachtis se tokni, uelis kiluis seki tlaxelolmej tlen uelis kipaleuiskej. ¿Tleka? Pampa ijkon uelis kichiuas tlen satepan momachtis (1 Timoteo 4:6).

3. 1) Ijkuak tlayekanki motlapouis iuan tokni, ¿ken uelis kitekitiltis Marcos 12:29 uan 30? 2) ¿Tlen uelis panos ijkuak tokni kikakis tlayekanki kitlatlaujtia Jehová ma kipaleui?

³ Tla titlayekanki, miak ipati xikmati ken tlen melauak kipaleuijtok itech tlen mokuayejyekoa uan tlen kimachilia tokni. Uelis tikmatis ken kipaleuijtok tla tiktlajtoltia Marcos 12:29, 30 (xiktlajtolti). Ijkuakon uelis tiktlajtlanis ken kipaleuia itech inemilis ijkuak omotemakak iixpan Jehová. Nin uelis kichiuas ximotlapouikan itech ken uelis nankitekichiuiliskej Jehová ika nochi namoyolo. Noijki uelis timotlatlaujtis iuan tokni uan uelis tikiluis Jehová ma kimaka espíritu santo pampa tokni uelis kichiuas tekitl tlen nankimakaskej. Uelis ijkuak kikakis tiktlatlaujtia Jehová ma kipaleui tokni, ye okachi kinekis tekitis itech tlanechikol.

4. 1) ¿Tlen tlapoualismej tlen katej itech Biblia uelis kinpaleuis tokniuan? 2) ¿Tlen kichiaj tlayekankej ijkuak kimachtiaj se tokni?

⁴ Ijkuak peuas tikmachtis se tokni, xiktlapoui itech seki neskayomej tlen katej itech Biblia tlen techmachtiaj tleka miak ipati ma tikinpaleuikan oksekimej, ma tiyetokan tiyolyamankej uan noijki totech ma tlaneltokakan (1 Reyes 19:19-21; Nehemías 7:2; 13:13; Hechos 18:24-26). Ninmej tlamantli miak ipati, ijkon ken abono tlen kitlaliliaj tlen kitokaj. Ninmej tlamantli kichiuas tokni san niman ma mochikaua itlaneltokilis. Se tokni tlen chanti itech ueyi altepetl Francia kijtoa ijkuak kimachtijtok se tokni ye kineki ma kipejpena tlen kichiuas ika tlen kijtoa Biblia. Ye kijtoa kitemoa seki tlaxelolmej tlen ika uelis kitas nochi tlamantli kuali tlen kipia Biblia (Salmo 119:18). ¿Tlen okseki tlamantli uelis kichiuaskej tlayekankej pampa kinpaleuiskej tokniuan okachi ma kitlasojtlakan Jehová?

5. 1) ¿Tleka miak ipati ma motlapouikan iuan tokni itech tlen kineki kichiuas? 2) ¿Tleka miak ipati tlayekankej ma kinmachtikan ijkuak ok telpokatsitsintin? (Xikita tlajtoli tlen kiualika tlakxitlan.)

⁵ Xiktlajtlani tokni tlen kineki kichiuas satepan. Tla amo kimati tlen kichiuas, xikpaleui pampa ma kipejpena tlen uelis kichiuas satepan. Ika miak pakilistli xikilui seki tlamantli tlen tejuatsin otiknekiaya tikchiuas uan ken melauak otiyolpakik ijkuak otikchi. Nin amo oui se kichiuas uan kinpaleuia tokniuan. Víctor se tlayekanki uan precursor tlen chanti itech ueyi altepetl África kijtoa tleka miak ipati ijkon ma tikchiuakan. Ye kijtoa ijkuak okatka telpochtli se tlayekanki okitlajtlani tlen okinekiaya kichiuas. Nin okichi okachi ma kipatioita kitekichiuilis toTajtsin Dios. Miakej tlayekankej noijki kijtoaj miak ipati ma kinmachtikan oksekimej ijkuak ok telpokatsitsintin, ken ijkuak kipiaj 13 noso 14 xiuitl. Uelis kinmakaskej seki tekitl itech tlanechikol. ¿Tleka miak ipati tlayekankej ma kinmachtikan ijkuak ok telpokatsitsintin? Pampa nin kinpaleuis ma mokuayejyekokan tlen kinekij kichiuaskej uan amo ma motekipachokan ijkuak moskaltijtiuij noso itlaj okse tlamantli kinyoltilana (xiktlajtolti Salmo 71:5, 17). * (Xikita tlajtoli tlen kiualika tlakxitlan.)

6. ¿Tlen okichi Jesús pampa kinmachtiskia oksekimej?

⁶ Pampa tokni okachi ma kineki tekitis itech tlanechikol, amo san moneki tikiluis tlen moneki ma kichiua. Moneki tikyekiluis tleka moneki ma kichiua. Nin tlen Jesús okichi ijkuak okinmachti oksekimej. Ye okinmilui itlatitlaniluan ma tetlapouikan. Pero achto okinmilui tleka omonekiaya ijkon kichiuaskej. Ye okinmilui: “Notajtsi onechmaktili nochi para Ne manitlanawati itech ilwikak iwa itech tlaltíkpaktli. Axa, xiwiah iwa xikinmachtikah nochteh n tlaltikpaktlakah” (Mateo 28:18, 19). ¿Ken uelis titlamachtis ijkon ken Jesús?

7, 8. 1) ¿Ken uelis tlayekankej kichiuaskej ken Jesús? 2) ¿Tleka miak ipati ma tikiluikan kuali tlen okichi? 3) ¿Tlen tlamantli uelis kinpaleuis tlayekankej pampa ma kinmachtikan oksekimej? (Xikita recuadro tlen itoka “ Ken uelis tikinpaleuiskej oksekimej.”)

 ⁷ Ijkuak tikiluis tokni ma kichiua itlaj, noijki moneki tikiluis ika Biblia tleka miak ipati ijkon ma kichiua. Ijkon tikmachtis miak ipati ma kichiua nochi pampa kijtoa Biblia, uan amo pampa ikaj kiluia. Se neskayotl, tla tikiluia tokni ma kiyektlali ikaltempa Kali kanin timonechikoaj pampa ma yeto chipauak, uelis tiktlajtoltilis Tito 2:10. Xikyekilui tla tlachipauak okachi kuali kitaskej tlen tejuan titetlapouiaj. Noijki uelis tikiluis ma mokuayejyeko ken uelis kinpaleuis akinmej yikipiaj xiuitl pampa amo ma yeto siauak kanin tikalakij. Nin kipaleuis ma motekipacho itech oksekimej uan amo san ma kintlakamati tlanauatilmej. Ijkuak ye kitas ken oksekimej tokniuan mopaleuiaj ika tekitl tlen kichiua, sapanoa yolpakis kinpaleuis oksekimej.

⁸ Uan noijki xikilui kuali tekitl tlen okichi. ¿Tleka miak ipati ijkon ma tikchiuakan? Pampa ijkon okachi kuali kitekichiuilis Jehová. Tikiluiskej kuali tlen kichiua, ken tiktlaliliskiaj atl se xochitl pampa kuali ma moskalti (xikita Mateo 3:17).

9. 1) ¿Tlen panoa itech seki uejueyij altepemej? 2) ¿Tleka sekimej telpokamej amo okachi kipatioitaj okachi kitekichiuiliskej Jehová?

⁹ Itech uejueyij altepemej kanin onka tomin, miakej tlayekankej kitaj oui kinmiluiskej tokniuan tlen kipiaj 20 noso 40 xiuitl okachi ma tekitikan itech tlanechikol. Itech 20 uejueyij altepemej otikintlajtlanijkej sekimej tokniuan tlen yiuejkika tekitij ken tlayekankej, tleka ijkon kinpanoa miakej tokniuan. Miakej okijtojkej ijkuak ninmej tokniuan okatkaj telpokamej intatajuan amo okinmiluiayaj okachi ma kitekichiuilikan Jehová. Uan ijkuak sekimej tokniuan kema okinekiayaj kitekichiuiliskej Jehová, intatajuan okinmiluiayaj okachi ma momachtikan pampa uelis kipiaskej tomin. Ik non, miakej amo okachi okipatioitayaj kitekichiuiliskej Jehová (Mateo 10:24).

10, 11. 1) ¿Ken uelis tlayekanki ajachitsin kichiuas se tokni ma kipatla tlen mokuayejyekoa? 2) ¿Tlen tlaxelolmej uelis kipaleuiskej tokni uan tleka? (Xikita tlajtoli tlen kiualika tlakxitlan.)

¹⁰ Sapanoa oui tikpaleuiskej se tokni tlen amo keman okipatioitak okachi tlapaleuis itech tlanechikol. Pero uelis tikchiuaskej tla timochijchikauaj uan amo timosotlauaj. Ma timokuayejyekokan itech akin tlatoka. Pampa se mili kuali ma moskalti moneki ajachitsin ma kimelauakan. Noijki tejuatsin ajachitsin uelis tikpaleuis se tokni ma kipatla tlen mokuayejyekoa pampa uelis okachi tekitis itech tlanechikol. ¿Ken uelis tikchiuas?

¹¹ Achto moneki tikxelos kauitl pampa kuali iuan timouikas. Xikilui tokniuan itech tlanechikol kipatioitaj. Iuan ximotlali uan xikilui seki tlaxelolmej tlen uelis kipaleuiskej ma mokuayejyeko yomotemakak pampa kitekichiuilis Jehová (Eclesiastés 5:4; Isaías 6:8; Mateo 6:24, 33; Lucas 9:57-62; 1 Corintios 15:58; 2 Corintios 5:15; 13:5). Ximochijchikaua  pampa tikmatis tlen kipia itech iyolo, uan uelis tiktlajtlanis: “¿Tlen otikilui Jehová ijkuak otimotemakak? ¿Tlen okimachili Jehová ijkuak otimoapolakti?” (Proverbios 27:11). “¿Tlen okimachili Satanás?” (1 Pedro 5:8.) ¿Tleka miak ipati xikintlajtoltikan seki tlaxelolmej? Pampa tlaxelolmej sapanoa uelis kipaleuiskej uan uelis ajsiskej itech iyolo (xiktlajtolti Hebreos 4:12). * (Xikita tlajtoli tlen kiualika tlakxitlan.)

12, 13. 1) ¿Tlen okichi Eliseo ijkuak Elías okimachtiaya? 2) ¿Ken Jehová okiteochi Eliseo?

¹² Telpochtli, tokniuan itech tlanechikol kinekij xikinpaleui. ¿Tlen mitspaleuis kuali xiktekichiuili Jehová? Pampa tikmatiskej ma tikitakan ineskayo se itekipanojka toTajtsin Dios: Eliseo.

¹³ Yikipia kanaj tres mil xiuitl, teotlajtojki Elías okilui telpochtli Eliseo ma kipaleui. Eliseo san niman okijto kipaleuiskia. Okiteititi okatka yolmelajki uan okichi tekitl tlen omonekiaya pampa teotlajtojki Elías (2 Reyes 3:11). Itech chikuase xiuitl Elías okimachti Eliseo. Ijkuak Elías yikitlamiskia tekitl tlen okipiaya itech altepetl Israel, Elías okilui Eliseo axkan ayakmo kipaleuiskia. Pero eyi uelta Eliseo okilui Elías: ‘Amo nimitskauas’. Ye okinekiaya nochipa kipaleuis Elías. Uan pampa okatka yolmelajki Jehová okiteochi. ¿Ken okiteochi? Okikauili ma kita ken okiuikaya Elías ika se chikauak ejekatl (2 Reyes 2:1-12).

14. 1) ¿Ken uelis telpokamej noijki kichiuaskej ken Eliseo? 2) ¿Tleka miak ipati telpokamej ma kichiuakan tekitl tlen kinmakaj?

 ¹⁴ ¿Ken uelis tikchiuas ken Eliseo? Xikseli nochi tekitl tlen mitsmakaskej, maski mota amo ipati. Xikilnamiki tlayekanki akin mitsmachtijtok moyolikni. Xikilui melauak tikpatioita tlen ye kichiua uan tikneki okachi ma mitsmachti. Uan okachi xikteititi tiyolmelajki uan xikchiua tlen mitsiluiaj. ¿Tleka? Pampa ijkon tlayekankej kimatiskej Jehová kineki xikseli okachi tekitl itech tlanechikol (Salmo 101:6; xiktlajtolti 2 Timoteo 2:2).

15, 16. 1) ¿Ken okiteititi Eliseo okitlakaitaya akin okimachti? (Xikita tlaixkopinal tlen ika peua tlamachtil.) 2) ¿Tleka oksekimej teotlajtojkej otlaneltokayaj itech Eliseo?

¹⁵ Ineskayo Eliseo noijki techmachtia miak ipati xikintlakaita tlayekankej. Satepan okintlajpalotoj sekimej teotlajtojkej tlen okatkaj itech altepetl Jericó, Elías uan Eliseo oyajkej itech aueyatl Jordán. Ijkuakon Elías okikitski itlaken ken teotlajtojki uan okikimilo uan okiuitek atl, uan atl omotlajkoxelo uan ijkon opanokej itlajkotia aueyatl. Ijkuak onejnentiayaj Eliseo kuali okikakiaya tlen Elías okitlapouiaya. Eliseo amo keman omokuayejyeko yokimatiaya miak. Ijkuak ika chikauak ejekatl Jehová okiuikak Elías, Eliseo omokuepki itech aueyatl Jordán. Okiuitek atl ika itlaken Elías uan okitlatlaujti Jehová. Uan oksepa atl omotlajkoxelo (2 Reyes 2:8-14).

¹⁶ Achto milagro tlen okichi Eliseo noijki okatka ken tlen okichi Elías. ¿Tlen techmachtia nin? Eliseo amo omokuayejyeko okse tlamantli kichiuas san pampa axkan ye okipiaya chikaualistli. Ye okichi ijkon ken Elías. Ijkon okiteititi okitlakaitaya Elías. Uan nin okichi oksekimej teotlajtojkej ma tlaneltokakan itech Eliseo (2 Reyes 2:15). Itech 60 xiuitl Eliseo otekitik ken iteotlajtojki Jehová, uan maski Elías okichi seki milagros, Eliseo okichi miakej milagros. ¿Tlen techmachtia nin neskayotl?

17. 1) ¿Ken uelis telpokamej kichiuaskej ken Eliseo? 2) Satepan, ¿tlen uelis kichiuaskej telpokamej?

¹⁷ Tla itech tlanechikol mitsmakaj okachi tekitl, amo ximokuayejyeko okse tlamantli tikchiuas tekitl. San moneki tikpatlas tekitl ijkuak kipaleuis tlanechikol noso ijkuak ialtepe Jehová techiluia ma tikchiuakan. Amo keman moneki tikchiuas san pampa te ijkon tikneki. Xikilnamiki Eliseo okichi ijkon ken Elías. Ijkon okiteititi okitlakaitaya akin okimachti. Uan nin okichi oksekimej teotlajtojkej itech ma tlaneltokakan. Noijki ijkon, tla tikchiua ijkon ken kijtoa Biblia uan ken omitsmachtijkej tlayekankej, te tikteititis tikintlakaita. Uan noijki tokniuan motech tlaneltokaskej (xiktlajtolti 1 Corintios 4:17). Ijkuak okachi tikmatis uelis tikpatlas seki tlamantli tlen kipaleuis tlanechikol pampa ma kichiua ken ialtepe Jehová, tlen nochipa nejnentok. Uan satepan Jehová mitspaleuis ijkon ken okipaleui Eliseo. Uan uelis tikchiuas okseki tlamantli tlen akinmej omitsmachtijkej amo ueli okichijkej (Juan 14:12).

18. ¿Tleka miak ipati ma tikinmachtikan tokniuan itech tlanechikol?

¹⁸ Tikchiaj ika nochi tlen axkan otimomachtijkej tlayekankej ma moyolchikauakan uan ma kixelokan kauitl pampa kinmachtiskej oksekimej. Uan noijki ma kinmiluikan miakej tokniuan ma momachtikan ken kimaluiskej tlanechikol. Nin kichiuas nochi tlanechikolmej ma mochikauakan. Uan techpaleuis sejse tejuan amo ma timoxelokan itech tlen okachi kualtsin panotok.