Tejuan se tlaneltokalistli tlen kajki itech nochi Tlaltikpak uan tlen amo moneloa iuan okseki tlaneltokalismej. Toteki moyekana itech ueyi altepetl Estados Unidos. Pero tiiTlaixpantijkauan Jehová tikatej itech nochi Tlaltikpak. Uan itech nochi Tlaltikpak tikatej kanaj 8 millones uan titlamachtiaj ika Biblia itech kanaj 230 uejueyij altepemej. Ijkon tiktlakamatij tlen okijto Jesús: “Uan ninmej kuali tlajtolmej itech Tekiuajkayotl motetlapouis itech nochi Tlaltikpak pampa ma kimatikan nochi uejueyij altepemej” (Mateo 24:14, Traducción del Nuevo Mundo, [TNM]).

Maski san kanin tichantij, tinochtin tikintlakamatij tekiuajkej uan tlanauatilmej, pero amo timokajkalakiaj itech política. Ijkon tiktlakamatij tlen okijto Jesús: “Yejwah [...] ayakmó de nin tlaltíkpaktli”. Ik non, amo timokajkalakiaj itech política nion tiauij guerra (Juan 15:19; 17:16). Ik non, itech Segunda Guerra Mundial miakej iTlaixpantijkauan Jehová okintsakej, okintlajyouiltijkej uan noijki miakej okinmiktijkej. Se alemán tlen okatka teopixki okijto: “Uelis tikijtoskej san yejuan [iTlaixpantijkauan Jehová] amo okintlakamatkej seki tlanauatilmej pampa intlalnamikilis amo okinkauiliaya, ijkuak otlanauatiaya Nazis”.

Pero nin amo kijtosneki amo timotlapouiaj iuan oksekimej tlaltikpaktlakamej. Se tonal ijkuak Jesús okitlatlaujti toTajtsin Dios okijto itech imachtijkauan: “Amo nimitstlatlaujtia xikinkixti de itech nin tlaltíkpaktli” (Juan 17:15). Ik non, titekitij, titlakoaj uan timomachtiaj ijkon ken nochtin tlaltikpaktlakamej.