Achto peuas itlaj tikchiuas, uelis timotlajtlania: “¿Ken nechpaleuis tlen nikchiuas?”. ¿Amo kuali tla noijki ijkon timotlajtlaniaj itech tlatlaujtilistli? Amo. Miak ipati ma tikmatikan ken techpaleuia tlatlaujtilistli. Job noijki omotlajtlani: “Tla niknotsas, ¿nechnankilis?” (Job 9:16).

Itech okse tlamachtil otikitakej tlatlaujtilistli amo san kipia kitas iuan tlaneltokalistli uan noijki amo san se pajtli. Akin melauak toTajtsin Dios techkaki ijkuak tiktlatlaujtiaj. Tla tiktlatlaujtiaj itech tlen ye kineki, ye melauak techkakis. Uan noijki techyoleua itech ma timotokikan (Santiago 4:8). ¿Uan tlen panos tla nochipa tiktlatlaujtiaj? Ma tikitakan.

Ijkuak itlaj mitstlajyouiltia, ¿tikmachilia sapanoa timotekipachoa? Biblia techiluia ijkuak ijkon techpanos moneki ‘ixmostla ma timotiotsajtsilijtokah’ uan noijki ‘ma tikilikah Toteko tlan tiknekih’ (1 Tesalonicenses 5:17; Filipenses 4:6). Uan Biblia kijtoa akinmej kiluia ma kinpaleui: “Iyolsewilis Dios, non amaka weleti kajsikamati, kimokuitlawis [kimaluis] nomoyolo iwa nomotlayejyekolis” (Filipenses 4:7). Okachi kuali timomachiliskej ijkuak tikiluiskej Jehová nochi tlen tikpiaj itech toyolo uan nochi tlen techtekipachoa. Uan Biblia noijki kijtoa: “Xiktlali motlamamal ipan Jehová, uan ye mitspaleuis” (Salmo 55:22).

Itech nochi Tlaltikpak miakej tlaltikpaktlakamej kipiaj yolseuilistli ijkuak motlatlaujtiaj. Hee Ran, se siuatl tlen chanti itech ueyi altepetl Corea del sur, kijtoa: “Maski sapanoa nitlajyouijtok, ijkuak itech nimotlatlaujtia nikmachilia nechkixtilia itlaj tlen sapanoa etik uan ueli nikchiua okseki tlamantli”. Cecilia,  akin chanti itech ueyi altepetl Filipinas, kijtoa: “Sapanoa nimotekipachoa pampa kuali ma yetokan nochpokauan. Uan noijki nikmaluia nonantsin, akin ayakmo nechixmati pampa mokokoa. Tlatlaujtilistli nechpaleuia pampa ayakmo okachi ma nimotekipacho uan noijki ma nikchiua okseki tlamantli. Nikmati Jehová nechpaleuis kuali ma nikinmalui”.

¿Itlaj sapanoa mitstekipachoa, sapanoa timomaluia pampa amo timikis noso itlaj amo kuali omitspanok? Tla tiktlatlaujtia toTajtsin Dios akin sapanoa techyolseuia, ayakmo itlaj mitstekipachos. Biblia kijtoa toTajtsin Dios “nochipa techyolchikawa ijkuak titlaijyowiah” (2 Corintios 1:3, 4). Se neskayotl, se tonal ijkuak Jesús sapanoa omotekipachoaya  “omotlankuáketski iwa opé motiotsajtsilia”. ¿Tlen opanok satepan? “Ijkuakó okimonextili se ángel de ilwikak non okiyolchikawako” (Lucas 22:41, 43). Nehemías, okse tlakatl yolmelajki, noijki otlajyoui pampa sekimej tlaltikpaktlakamej tlen amo yolkualmej okinekiayaj ayakmo ma kichiua itlanekilis Jehová. Ye okitlatlaujti toTajtsin Dios ma kiyolchikaua. Tlen opanok satepan techmachtia toTajtsin Dios okipaleui ayakmo ma momojti uan ma kichiua tlen okinauati (Nehemías 6:9-16). Reginald, akin chanti itech ueyi altepetl Ghana, kijtoa: “Ijkuak nimotlatlaujtia uan okachi ijkuak itlaj nechtlajyouiltia, nikmachilia ken akin niktlapouijtok uelis nechpaleuis, nikiluia nochi tlen nechpanoa, uan ye nechiluia amo ma nimomojti”. Tla tiktlatlaujtiaj toTajtsin Dios ye melauak techyolseuis.

Tlen tikpejpenaskej tikchiuaskej uelis kipatlas tonemilis noso innemilis tokalchanejkauan. ¿Tlen uelis tikchiuaskej pampa kuali tikpejpenaskej tlen tikchiuaskej? Biblia kijtoa: “Tla seme de nomejwah amo kipia ixtlamatílistli, makitlajtlanili Dios. Ye nomechmakas miak ixtlamatílistli iwa amo nomechixtokilis” (Santiago 1:5). Tla tiktlatlaujtiaj ma techmaka ixtlamatilistli, toTajtsin Dios ika iespíritu santo techpaleuis kuali ma tikpejpenakan tlen tikchiuaskej. Pampa Jesús okijto: “Nomotajtsi non kajki ilwikak nomechmakas n Espíritu Santo tla nonkitlajtlaniliskeh” (Lucas 11:13).

Uan noijki Jesús achto kichiuaskia seki tlamantli okitlatlaujti toTajtsin Dios ma kipaleui. Ijkuak okinpejpenki 12 itlatitlaniluan “Jesús [...] omotiotsajtsilito interojyúali” (Lucas 6:12).

Ijkon ken Jesús, axkan noijki miakej kuali momachiliaj ijkuak kitaj ken toTajtsin Dios kinpaleuia kuali ma kipejpenakan tlen kichiuaskej. Regina, akin chanti itech ueyi altepetl Filipinas, techiluia sapanoa miak tlamantli amo kuali okipanok. Ijkuak omikik inamik omonekiaya ma tekiti pampa kinpaleuiskia ikalchanejkauan, satepan ayakmo okipiaya tekitl uan omonekiaya iselti kinmiskaltis iichpokauan. ¿Tlen okipaleui kuali ma kipejpena tlen kichiuas? Ye kijtoa: “Ika tlatlaujtilistli nimopaleuia itech Jehová”. Kwabena, akin chanti itech ueyi altepetl Ghana, techiluia tleka kitlatlaujtia toTajtsin Dios ma kipaleui: “Onikpiaya se kuali tekitl, onikinchijchiuaya kalmej, pero satepan onikpolo noteki. Ijkuak onimokuayejyeko tlen uelis nikchiuaskia, nochipa oniktlatlaujti Jehová ma nechpaleui kuali ma nikpejpena tlen nikchiuas. Nikneltoka Jehová onechpaleui ma nikajsi se tekitl tlen onechpaleui ma nikpia tlen moneki uan noijki ma nikueyichiua”. Tejuatsin noijki uelis tiktlatlaujtis toTajtsin Dios ma mitspaleui tla itlaj kichiua ayakmo okachi xiktekichiuili.

San otikijtojkej seki tlamantli ken uelis mitspaleuis tlatlaujtilistli. (Tla tikneki tikmatis okachi, xikita recuadro tlen itoka “ Ken mitspaleuia tlatlaujtilistli”.) Tla tikneki timopaleuis ika tlatlaujtilistli, achto moneki tikixmatis toTajtsin Dios uan nochi tlen ye kijtoa kichiuas. ¿Tleka amo timotlapouia iuan se iTlaixpantijka Jehová pampa ma mitspaleui ximomachti Biblia? * Ijkon uelis timotokis iuan akin kikaki tlatlaujtilistli (Salmo 65:2).