Onineski itech altepetl Paddington, Londres (Inglaterra), ompa miakej chantij. Onichantiaya iuan nonantsin uan eyi nokniuan siuamej tlen onechyekanayaj. Notajtsin otlauanaya, ik non, amo nochipa otikitayaj.

Ijkuak onikatka nitakotsin, nonantsin onechmachti ma nimotlatlaujti ijkuak yinikochiskia. Onikpiaya se Biblia, san okipiaya Salmos uan ijkuak onikintlajtoltiaya onitlakuikaya. Se tonal oniktlajtolti: “ Ajsis tonal ayakmo tlanesis”. Non amo onechkauiliaya nikochis, san onimokuayejyekouaya tlen techpanos satepan. Onikijtouaya: “Tla san para non tiyoltokej. ¿Tlen nikchiua nikan?” ¡Oniknekiaya niyoltos!

Oniknekiaya nikmatis tlen kichiuaj akinmej tetlajchiuiaj. Ik non, oniknekiaya nimotlapouis iuan akinmej yoixpolikej, iuan noyolikniuan, otiayaj kanin kintokaj akinmej yoixpolikej. Noijki otimonechikouayaj para tikinmitaskej películas tlen temomojtijkej, non otechpaktiaya tikchiuaskej.

Yikin onikpiaya 10 xiuitl uan yonikchiuaya tlen amo kuali. Opejki nitlachichina uan san niman onechpakti, satepan opejki nikchichina marihuana. Ijkuak onikpiaya 11 xiuitl onikyeko alcohol uan maski amo onikueliliaya, onechpaktiaya nitlauanas. Onechpaktiaya nikakis tlatsotsonali uan nimijtotis, ualeua oniaya kanin omijtotiayaj. Youak san ichtaka onikisaya uan sapanoua kualkan onimokopaya para amikaj nechitas. Miak uelta onikochiaya uan ayakmo oniaya escuela uan ijkuak oniaya, san onitlauanaya.

Amo kuali calificaciones onikpiaya ijkuak yiniktlamiskia escuela. Nonantsin amo okimatiaya nochi tlen amo kuali onikchiuaya, ik non, omoyolkoko uan okualanki. Otimokualanijkej uan onikijto oksekan nichantiti, onia iuan nonovio tlen omotokayotiaya Tony, ye okatka rastafari. Ye otlachtekiaya, okinemakaya drogas uan sapanoua okipaktiaya tlateuis. Yikin onikpiaya 16 xiuitl uan onikpixki se nokonetsin.

Onichantiaya kanin siuamej inselti okinmiskaltiayaj inkoneuan, ompa onikinmixmatki iTlaixpantijkauan Jehová. Akinmej tlapaleuiaj kanin onichantiaya onechpaleuijkej ompa ma nichantiti. Ome siuamej iTlaixpantijkauan Jehová nochipa oualayaj para kinmachtiskej sekimej siuamej, se tonal onikkak tlen okinmiluiayaj porque oniknekiaya nikinmititis yejuan amo tlamachtiaj tlen melauak. Pero yejuan onechnankiliaya ika Biblia nochi tlen onikintlajtlaniaya, melauak onechpaktiaya ken onechnankiliaya, ik non, onikijto noijki nimomachtis Biblia.

Tlen onimomachti ika Biblia okipatlak nonemilis. Onechyolchika nikmatis Jesús okijto akinmej yoixpolikej oksepa kinyolitiskej. Porque ijkuak onikatka nitakotsin onechmomojtiaya niixpoliuis (Juan 5:28, 29). Noijki onimomachti toTajtsin Dios kitekipachoua tlen nechpanoua (1 Pedro 5:7). Tlen kijtoua Jeremías 29:11 oajsik itech noyolo, ompa kijtoua: “Ne kuali nikmati tlen namotech nimokuayejyekojtok, ijkon kijtoua Jehová, nimokuayejyekoua itech yolseuilistli uan amo itech ouijkayotl para satepan namechmakas tlen okachi kuali”. Opejki nikneltoka ne uelis nichantis ipan tlaltikpak ijkuak mokopas se xochitlali (Salmo 37:29).

Ijkuak yikin onimonechiko ITlaixpantijkauan Jehová onechititijkej nechtlasojtlaj uan nochtin okatka yolkualmej (Juan 13:34, 35). ¡Amo ijkon onikitaya ijkuak oniaya teopan! ITlaixpantijkauan Jehová amo onechteneuayaj porque onikatka noselti uan onikpiaya se konetsintli, amo san okijtouayaj nechtlasojtlaj noijki onechititiayaj porque onechpaleuiayaj. Onikmachili yejuan okatkaj ken nofamilia.

Onikasijkamatki omonekiaya ayakmo nikchiuas tlen amo kuali uan nikchiuas tlen Jehová kipaktia. Oui onikmachili ayakmo nitlachichinas. Noijki onikasijkamatki seki tlakuikalmej onechyoliniayaj ma nitlachichina, ik non, onikpatlak tlen onikkakiaya. Ayakmo oniaya kanin omijtotiayaj porque ompa san otlauanayaj, ik non, opejki nikintemoua noyolikniuan tlen nechpaleuiskiaj ma nikyolpakti Jehová (Proverbios 13:20).

Tony noijki opejki momachtia Biblia iuan iTlaixpantijkauan Jehová. Ijkuak okinankialiayaj tlen okintlajtlaniaya opejki kineltoka omomachtijtoka tlen melauak uan opejki kipatla miak tlamantli: ayakmo omouikaya iuan iyolikniuan tlen otlateuiayaj, ayakmo otlachtekiaya uan ayakmo otlachichinaya. Otikajsikamatkej tla otiknekiayaj tiktekichiuiliskej Jehová omonekiaya timonamiktiskej ixpan tekiuajkej uan ijkon san sekan tikiskaltiskiaj tokone, ik non, itech xiuitl 1982 otimonamiktijkej.

Nikilnamiki onitlatemouaya itech revista Akin Tetlapouijtok uan ¡Ma titlachixtokan! * para nikitas ken sekimej opejkej kichiuaj tlen kuali uan ne noijki ijkon nikchiuaskia. Tlen oniktlajtoltiaya onechyolchikauaya para amo ma nimosotlaua uan ma nikchiua tlen kuali. Nochipa oniktlatlaujtiaya Jehová ma nechpaleui uan itech julio xiuitl 1982 Tony uan ne otimoapolaktijkej.

Ijkuak opejki nimouika iuan Jehová onechpaleui kuali ma niyeto. Yotikitakej Jehová techpaleuia ijkuak techpanoua itlaj tlen amo kuali, ye techmaluis uan amo keman techkauas tla tejuan nochipa tikneltokaj (Salmo 55:22).

Tiyolpakij porque otikinpaleuijkej ome tokoneuan ma mouikakan iuan Jehová. Axkan okachi niyolpaki porque noxuiuan noijki mochijchikauaj mouikaskej iuan Jehová.

Axkan kuali nikochi porque ayakmo nimomojtia, axkan yinikmati tlen panos satepan uan ayakmo nechmomojtia niixpoliuis. Axkan Tony tlayekanki itech circuito uan sejse semana tikintlajpalotiuij tokniuan para tikinyolchikauaskej. San sekan titetlapouiaj iuan tokniuan uan tla akinmej techkakij kineltokaj Jesús topatka omotemakak, yejuan noijki yoltoskej nochipa.