Uelis mitspaleuis tlen ompa kijtoua, porque Biblia iTlajtol toTajtsin Dios uan kinyolseuia akinmej moyolkokouaj (2 Corintios 7:6). Maski Biblia amo se amochtli tlen kijtoua ken timopajtiskej, miakej yokinpaleui amo mamomiktikan. Tlen ompa kijtoua noijki uelis mitspaleuis.

•  ¿Tlen techiluia Biblia matikchiuakan?

•  Biblia kijtoua sekimej okinekiayaj mikiskej

•  ¿Tlen versículos uelis mitspaleuiskej amo ximomikti?

•  ¿Ken uelis tikpaleuis moyolikni tla kineki momiktis?

•  ¿Tla yotikchi itlaj para timomiktis?

• ● Xikijto tlen tikmachilia.

   Biblia kijtoua: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokouaj” (Proverbios 17:17).

   Tlen kijtosneki: Ijkuak sapanoua timotekipachouaj, tiknekij ikaj matechpaleui.

   Tla amikaj tikiluia ken timomachilia, uelis okachi titlajyouis. Pero timoyolseuis tla ikaj tikiluia tlen mitstekipachoua uan uelis mitspaleuis.

   Ijkin xikchiua: Niman ikaj iuan ximotlapoui. a Noijki uelis mitspaleuis tla tikijkuilos ken timomachilia.

• ● Xikitati tepajti.

   Biblia kijtoua: “Akimeh amo mokokoah mach kinekih se tepajti, yej non mokokoah” (Mateo 9:12).

   Tlen kijtosneki: Ijkuak timokokouaj tiknekij timopajtiskej.

   Tla tikneki timomiktis kijtosneki amo kuali timomachilia uan amo timokuayejyekoua ken moneki. Ijkuak timokokouaj amo tipinauaj, ik non, amo moneki tipinauas tla tikneki timomiktis. Tepajti uelis mitspaleuis.

   Ijkin xikchiua: San niman xikitati tepajti, ye uelis mitspaleuis.

• ● ToTajtsin Dios mitspatioita.

   Biblia kijtoua: “Monamakah mákuili tototsitsinteh san ika ome tomi. Pero maya ijkó, n Totajtsi Dios amo kinmilkawa nion seme de yejwah. [...] Yika amo ximawikah, porke nomejwah okachi miak nomopati ke n tototsitsinteh” (Lucas 12:6, 7).

   Tlen kijtosneki: Dios mitspatioita.

   Xamo timomachilia moselti pero toTajtsin Dios kimati ken timomachilia uan mitspatioita. Salmo 51:17 kijtoua toTajtsin amo kixtopeuas akin moyolkokoua. Ye mitstlasojtla uan kineki xiyolto.

   Ijkin xikchiua: Xikita itech Biblia toTajtsin Dios mitstlasojtla. Noijki uelis titlatemos itech revista Akin Tetlapouijtok, núm. 3, 2018.

• ● Xiktlatlaujti toTajtsin Dios.

   Biblia kijtoua: “Nochi tlan nomechtekipachoah, xiktlalikah imak Dios, porke Ye nomechmokuitlawia” (1 Pedro 5:7).

   Tlen kijtosneki: ToTajtsin Dios kineki xikilui tlen mitstekipachoua uan tlen tikmachilia.

   ToTajtsin Dios uelis mitspaleuis xitlaxiko uan mitsyolseuis (Filipenses 4:6, 7, 13). Ye kinpaleuia akinmej iuan mouikaj (Salmo 55:22).

   Ijkin xikchiua: Xiktlatlaujti toTajtsin Dios, xiknotsa ika itoka, Jehová uan xikilui tlen tikmachilia (Salmo 83:18). Xikilui mamitspaleui xitlaxiko.

• ● Xikilnamiki ken tiyetoskej satepan.

   Biblia kijtoua: “Tlan tejwah tikchiah, tikchiah ika totlaneltokalis, kemi se tépostli ankla” (Hebreos 6:19).

   Tlen kijtosneki: Tlen tikmachilia uelis kichiuas amo xikmati tlen tikchiuas ijkon ken ejekatl kiuika se barco. Pero uelis titlaxikos porque tikmati satepan kuali tiyetos.

   Tikneltokaj tlen toTajtsin Dios yokijto kichiuas (Revelación 21:4).

   Ijkin xikchiua: Xiktlajtolti tlen okachi kichiuas toTajtsin Dios itech amatlajkuilol Kuali tlajtolmej techmaka toTajtsin Dios, tlamachtil 5.

• ● Xikchiua tlen mitspaktia.

   Biblia kijtoua: “Akin yolpaki chikajtok” (Proverbios 17:22).

   Tlen kijtosneki: Tla tikchiua tlen mitspaktia, kichiuas kuali ximomachili uan xiyolpaki.

   Ijkin xikchiua: Xikchiua itlaj tlen sapanoua mitspaktia. Uelis tikinkakis tlakuikalmej, itlaj tiktlajtoltis noso tikchiuas okseki tlamantli. Noijki tiyolpakis tla tikinpaleuis oksekimej (Hechos 20:35).

• ● Ximomalui para amo timokokos.

   Biblia kijtoua: “Tla tiktekitiltiah tokuerpo iwa tikchijchikawah, okachitsi techpalewia” (1 Timoteo 4:8).

   Tlen kijtosneki: Tla tikchiuas ejercicio, kuali titlakuas uan tikochis, kuali timomachilis.

   Ijkin xikchiua: Ximotlaloti san kanaj 15 minutos.

• ● Xikilnamiki satepan ayakmo ijkon timomachilis.

   Biblia kijtoua: “¿Tleka ijkó nonkijtoah, iwa amo nonkimatih tlan tlamochiwas mostla?” (Santiago 4:14).

   Tlen kijtosneki: Tlen axkan techtekipachoua satepan ayakmo techtekipachos.

   Maski axkan titlajyouia xamo satepan ayakmo ijkon mitspanos, ik non, amo ximosotlaua (2 Corintios 4:8). Tlen axkan mitstekipachoua satepan moyektlalis, pero tla timomiktis amo itlaj tikyektlalis.

   Ijkin xikchiua: Itech Biblia kijtoua sekimej sapanoua omoyolkokouayaj uan okinekiayaj mikiskej, xiktlajtolti tlen okinpanok. Ompa tikitas satepan kuali omomachilijkej.

 Biblia kijtoua sekimej okinekiayaj mikiskej pero toTajtsin Dios amo okualanki, ye okinpaleui uan noijki kineki mitspaleuis.

Elías

•  ● ¿Akin okatka? Ye okatka se profeta yolchikauak pero noijki omoyolkoko. Santiago 5:17 kijtoua “Elías okatka se tlakatl kemi tejwah”.

•  ● ¿Tleka okinekiaya mikis? Elías okijto okatka iselti, omomojtiaya uan okijto amitlaj ipati. Ik non, okijto: “Jehová axkan xikchiua manimiki” (1 Reyes 19:4).

•  ● ¿Tlen okipaleui? Elías okilui toTajtsin Dios ken omomachiliaya. ¿Ken okipaleui Jehová? Okinextili omotekipachouaya itech uan okititi kipia chikaualistli, noijki okilui okipatioitaya uan okitlali ikaj para makipaleui.

•  ▸ Xiktlajtolti tlen okipanok Elías: 1 Reyes 19:2-18.

Job

•  ● ¿Akin okatka? Ye okitekichiuiliaya toTajtsin Dios, okipiaya tomin uan ifamilia.

•  ● ¿Tleka okinekiaya mikis? Job opejki kipanoua miak tlamantli tlen amo kuali. Okipolo tlen okipiaya, ikoneuan oixpolikej uan omokoko. Okijtojkej okatka itlajtlakol tlen okipanotoka. Job sapanoua omoyolkoko uan okijto okinekiaya mikis (Job 7:16).

•  ● ¿Tlen okipaleui? Okitlatlaujti Jehová uan omotlapoui iuan oksekimej (Job 10:1-3). Elihú okatka iyolikni uan okiyolchika, okipaleui makita tlen okipanotoka ken omonekiaya. Job okikauili Jehová makipaleui.

•  ▸ Xiktlajtolti tlen okipanok Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Akin okatka? Moisés okatka se profeta tlen okiyekanki altepetl Israel.

•  ● ¿Tleka okinekiaya mikis? Moisés okipiaya se tekitl tlen sapanoua oui, oksekimej okijtouayaj amo kuali okichiuaya iteki. Ik non, sapanoua osotlauaya uan okilui toTajtsin Dios okinekiaya mikis (Números 11:11, 15).

•  ● ¿Tlen okipaleui? Moisés okilui toTajtsin Dios ken omomachiliaya uan ye okilui oksekimej kipaleuiskiaj para amo sapanoua sotlauas.

•  ▸ Xiktlajtolti tlen okipanok Moisés: Números 11:4-6, 10-17.