Tlajtlakoli kijtosneki itlaj tlen tikchiuaj, tikmachiliaj noso timokuayejyekouaj uan kixnamiki itlanauatiluan Jehová (1 Juan 3:4; 5:17). Biblia kijtoua ikaj tlajtlakolchiua ijkuak kichiua itlaj tlen amo kuali noso ijkuak amo kichiua tlen moneki (Santiago 4:17).

 Ika tlajtoli tlen okijkuilojkej Biblia, tlajtoli “tlajtlakoli” kijtosneki ijkuak ikaj motlapololtia noso amo ueli okichi tlen okinekiaya. Biblia kijtoua sekimej soldados “amo omotlapololtiayaj” ijkuak okitlamotlayaj se tetl. Tla tiktlajtolkopaskiaj ijkon ken ijkuilitok tikijkuiloskiaj “amo otlajtlakolchiuayaj” (Jueces 20:16, Nueva Biblia Española). Ik non, ijkuak ikaj tlajtlakolchiua kijtosneki amo kichiua tlen toTajtsin Dios tlanauatia.

 Ken toTajtsin Dios okichijchi nochi tlamantli, san ye kinamiki techiluis tlen moneki tikchiuaskej (Apocalipsis 4:11). Noijki tejuan tikiluiskej tlen otikchijkej (Romanos 14:12).

¿Uelis amo titlajtlakolchiuaskej?

 Amo, Biblia kijtoua “porke nochteh otlajtlakolchijkeh, iwa okimopolilijkeh iweyijkachiwalis Dios” (Romanos 3:23; 1 Reyes 8:46; Eclesiastés 7:20; 1 Juan 1:8). ¿Tleka ijkon techpanoua?

 Achto, Adán uan Eva amo otlajtlakolchiuayaj, porque toTajtsin Dios okinchijchi ken ye (Génesis 1:27). Pero satepan opejkej tlajtlakolchiuaj porque amo okitlakamatkej akin okinchijchi (Génesis 3:5, 6, 17-19). Ijkuak okinpixkej inkoneuan okinpanoltilijkej tlajtlakoli uan non yetoskia ken se kokolistli (Romanos 5:12). Ijkon ken okijto tekiua David: “Yonikpiaya tlajtlakoli ijkuak onineski” (Salmo 51:5).

¿Onka se tlajtlakoli tlen okachi ueyi?

 Kema. Biblia kijtoua akinmej ochantiayaj Sodoma “okatkaj amo yolkualmej uan sapanoua otlajtlakolchiuayaj” (Génesis 13:13; 18:20). Ma tikitakan eyi tlamantli tlen kiteititia ikaj sapanoua tlajtlakolchiua.

1.   ¿Tlen okichi? Biblia kijtoua sapanoua tlajtlakolchiua akin auilnemi, kinueyichiua teotsitsintin, tlachteki, tlauana, tlakajkayaua para tlachtekis, temiktia uan tetlajchiuia, nin amo kuali tikchiuaskej (1 Corintios 6:9-11; Apocalipsis 21:8). Biblia kijtoua non sapanoua tlajtlakoli. Pero ualeua timotlapololtiaj, ken ijkuak ikaj tikyolkokouaj (Proverbios 12:18; Efesios 4:31, 32). Pero Biblia techiluia ma timomaluikan, tlamo satepan uelis titlajtlakolchiuaskej (Mateo 5:27, 28).

2.   ¿Tleka okichi? Miakej tlajtlakolchiuaj porque amo kixmatij itlanauatiluan toTajtsin Dios (Hechos 17:30; 1 Timoteo 1:13). Biblia kijtoua amo kuali tlen yejuan kichiuaj pero noijki kijtoua tlen kinpanos akinmej kixmatij itlanauatiluan pero amo kinekij kitlakamatiskej (Números 15:30, 31). Biblia kijtoua akin yikimati tlen amo kuali pero kichiua, “amo yolkuali” (Jeremías 16:12).

3.   ¿Keski uelta okichi? Biblia kijtoua sekimej se uelta tlajtlakolchiuaj pero oksekimej nochipa (1 Juan 3:4-8). ToTajtsin Dios kinmixpolos akinmej amo kikauaj tlajtlakoli maski yikimatij tlen kuali (Hebreos 10:26, 27).

 Akinmej tlajtlakolchiuaj xamo moyolkokouaj. Tekiua David okijkuilo: “Amo ueli nikilkaua notlajtlakoluan; ken itlaj tlen sapanoua etik, nikita sapanoua etik” (Salmo 38:4). Pero tlen kijtoua Biblia techyolchikaua: “Ximoyolkopakan, porque toTajtsin Dios namechtlapojpoluis; ye namechiknomati. Akinmej amo yolkualmej ayakmo ijkon ma mokuayejyekokan uan ayakmo ma kichiuakan tlen achto okichiuayaj” (Isaías 55:7, Traducción en lenguaje actual).