Espíritu santo kijtosneki ichikaualis toTajtsin Dios (Miqueas 3:8; Lucas 1:35). ToTajtsin Dios ika iespíritu santo noso ichikaualis kichiua tlen ye kineki uan kanin ye kineki (Salmo 104:30; 139:7).

 Itech Biblia, tlajtoli “espíritu” kisa itech tlajtolmej rúaj (ika hebreo) uan pnéuma (ika griego). Ninmej tlajtolmej kijtosneki ichikaualis toTajtsin Dios noso iespíritu santo (Génesis 1:2). Pero ualeua, noijki motekitiltia itech okseki tlamantli, ken:

•   Ijkuak timijyotiaj (Habacuc 2:19; Apocalipsis 13:15).

•   Ijkuak ejeka (Génesis 8:1; Juan 3:8).

•   Chikaualistli tlen kichiua ma tiyoltokan tejuan uan noijki yolkamej (Job 34:14, 15).

•   Ken mokuayejyekoua se tlakatl (Números 14:24).

•   Tlen amo mota, ken toTajtsin Dios uan ángeles (1 Reyes 22:21; Juan 4:24).

 Nochi nin tlamantli tejuan amo ueli tikitaj pero tikitaj tlen kichiuaj. Noijki ijkon, iespíritu toTajtsin Dios “ijkon ken ejekatl, amo mota, amo ueli tikitskiskej uan chikauak” (Diccionario expositivo de palabras del Antiguo y del Nuevo Testamento exhaustivo, de William E. Vine).

 Itech Biblia kineskayotia iespíritu santo toTajtsin Dios ken “imauan” noso “imajpiluan” (Salmo 8:3; 19:1; Lucas 11:20; noijki xikita Mateo 12:28). Ijkon ken ijkuak ikaj tekipanoua ika imauan uan imajpiluan, toTajtsin Dios ika iespíritu santo, yokichi miak tlamantli, ken:

•   Ijkuak okichijchi nochi tlen onka (Salmo 33:6; Isaías 66:1, 2).

•   Ijkuak okichi ma kijkuilokan Biblia (2 Pedro 1:20, 21).

•   Ijkuak okichi sekimej itekipanojkauan ma kichiuakan milagros uan ma tetlapouikan (Lucas 4:18; Hechos 1:8; 1 Corintios 12: 4-11).

•   Ma kichiuakan tlen kuali akinmej kitlakamatij (Gálatas 5:22, 23).

Espíritu santo amo se tlakatl

 Ijkuak Biblia kijtoua espíritu santo ken “imauan”, “imajpiluan” uan noijki ika “mijyotia” toTajtsin Dios, kiteititia espíritu santo amo se tlakatl (Éxodo 15:8, 10). Ijkuak ikaj tekipanoua, imauan amo san inselti moliniaj, tokuatitix kichiua ma molinikan uan noijki san sekan ma tekipanokan. Noijki ijkon panoua ika iespíritu santo toTajtsin Dios, kichiua tlen ye kineki (Lucas 11:13). Noijki, Biblia kineskayotia espíritu santo ken atl uan okseki tlamantli tlen amo yoltok, ken ijkuak titlaneltokaj uan okachi tikixmatij. Nin techpaleuia ma tikajsikamatikan espíritu santo amo se tlakatl (Isaías 44:3; Hechos 6:5; 2 Corintios 6:6).

 Biblia kijtoua toTajtsin Dios itoka Jehová uan iKone itoka Jesucristo, pero amo kanaj kijtoua kox espíritu santo kipia itoka (Isaías 42:8; Lucas 1:31). Se tonal, Esteban otlachixki iluikak uan san okitak toTajtsin Dios uan iKone, pero amo ikaj okse okitak. Biblia kijtoua: “Pero Esteban tentok de Espíritu Santo, oajkotláchixki ilwikak iwa okitak iweyijkachiwalis Dios, noiwa okitak n Jesús moketok ik iyekma n Totajtsi Dios” (Hechos 7:55). ToTajtsin Dios ika iespíritu santo okichi Esteban ma kinmita.

 Sekimej kijtouaj: Espíritu santo se dios uan poui itech se Trinidad. Ijkon kijtouaj seki Biblias, ken Torres Amat uan Reina-Valera itech 1 Juan 5:7, 8.

 Tlen melauak: Biblia tlen itoka Torres Amat kijtoua itech 1 Juan 5:7, 8: “Eyi tlatematiltiaj ompa iluikak: ToTajtsin Dios, Tlajtoli uan Espíritu Santo uan ninmej eyi san se mochiuaj. Uan yejuan eyi tlatematiltiaj tlaltikpak”. Sekimej ixtlamatkej okajsikamatkej amo ijkon okijkuilo tlatitlanil Juan, ik non, kijtouaj amo moneki yetos itech Biblia. Bruce M. Metzger, akin momachtia Biblia, okijto: “Ninmej tlajtolmej amo melauak uan amo moneki yetos itech Nuevo Testamento” (Un comentario textual al nuevo testamento griego).

 Sekimej kijtouaj: Biblia kijtoua espíritu santo yetoskia ken se tlakatl, ik non, moneki ijkon tikneltokaskej.

 Tlen melauak: Ualeua Biblia kijtoua espíritu santo yetoskia ken se tlakatl pero amo kijtosneki melauak se tlakatl. Ijkon panoua ika ixtlamatilistli, mikilistli uan tlajtlakoli (Proverbios 1:20; Romanos 5:17, 21). Biblia ualeua kijtoua tlajtlakoli teyoltilana, tlaixneki uan temiktia (Mateo 11:19; Lucas 7:35; Romanos 7:8, 11).

 Itech Evangelio tlen okijkuilo Juan, ompa Jesús okijto espíritu santo tlapaleuia. Otechyekilui ken tlapaleuia espíritu santo, okijto kiteititiskia, tlayekanaskia, tlajtoskia, tlakakiskia, kinmachtiskia imachtijkauan tlen melauak, ye kiueyichiuaskia uan itlaj kinmakaskia. Sekimej kijtouaj Juan ijkon okijkuilo porque espíritu santo se dios (Juan 16:7-15). Pero non amo melauak. Tlajtoli griego amo ken español, ik non, ijkuak itlaj kinekij kijtoskej amo kitekitiltiaj se pronombre para tlakatl, siuatl noso ok itlaj. Ijkon okichi Juan, ijkuak okijto tikpiaj akin techpaleuia (paráklētos) kipia se pronombre para tlakatl. Pero ijkuak okijkuilo tlajtoli “espíritu” okijkuilo ika se pronombre neutro Pneuma uan okitlajtolkopkej ken espíritu uan amo kipia se pronombre (Juan 14:16, 17).

 Sekimej kijtouaj: Espíritu santo se dios porque ijkuak moapolaktiaj kijtoua “ika itoka espíritu santo”.

 Tlen melauak: Ualeua ijkuak Biblia kijtoua “ika itoka”, kijtosneki itlaj kichiua noso ichikaualis (Deuteronomio 18:5, 19-22; Ester 8:10). Ika español ualeua tikijtouaj “ika itoka tlanauatil”, pero non amo kijtosneki tlanauatil se tlakatl. Ik non, ijkuak ikaj moapolaktia “ika itoka” espíritu santo, kijtosneki kajsikamati tlen ueli kichiua espíritu santo uan ken kichiua tlen kineki toTajtsin Dios (Mateo 28:19).

 Sekimej kijtouaj: Imachtijkauan Jesús uan tlatitlanilmej okineltokayaj espíritu santo se tlakatl.

 Tlen melauak: Non amo tlamachtia Biblia nion okseki amochmej. Amochtli Encyclopædia Britannica kijtoua: “Itech se nechikol tlen omochi Constantinopla itech xiuitl 381 okijtojkej Espíritu Santo okatka se dios”. Non nechikol omochi kanaj ome siglo uan tlajko satepan ijkuak oixpoliuik saiktlami apóstol.