Miakej sapanoua motekipachoskej ijkuak panotos ueyi tlajyouilistli. Profecías tlen ijkuilitokej itech Biblia kijtouaj nochi nin panos “itlamian tonalmej” (2 Timoteo 3:1; Daniel 12:4). Marcos 13: 19 kijtoua: “Ijkuakon yetos tlajyouilistli. Non amo keman ijkon panoua desde ijkuak toTajtsin Dios otlachijchi uan amo keman oksepa ijkon panos” (Daniel 12:1; Mateo 24:21, 22).

¿Tlen panos ijkuak yetos ueyi tlajyouilistli?

•   Kipojpoloskej religión tlen tlakajkayaua. San niman kipojpoloskej religión tlen tlakajkayaua (Apocalipsis 17:​1, 5; 18:​9, 10, 21). Ijkuak ijkon kichiuaskej tekiuajkej tlen kineskayotia Naciones Unidas, kichijtoskej tlen toTajtsin Dios kineki (Apocalipsis 17:​3, 15-​18). a

•   Kinekiskej kipojpoloskej ialtepe toTajtsin Dios. Ezequiel okitak “Gog tlen kajki itech tlali Magog” nin kineskayotia ijkuak mosetiliskej tekiuajkej uan yejuan kinekiskej kinpojpoloskej akinmej kitekichiuiliaj toTajtsin Dios. Pero toTajtsin Dios amo kitekauilis makipojpolokan ialtepe (Ezequiel 38:​1, 2, 9-​12, 18-​23).

•   Kinmixkomakaskej akinmej chantij tlaltikpak. Jesús kinmixkomakas nochtin uan “kinxexelos ijkon ken se tlajpixki kinxexeloua ichkamej uan tentsomej” (Mateo 25:31-​33). Jesús kijtos tlen kinpanos ijkuak kitas kox yejuan okinpaleuijkej ‘ikniuan’. Ikniuan Jesús kijtosneki akinmej tlanauatiskej iluikak (Mateo 25:34-​46).

•   Kinnechikoskej akinmej tlanauatiskej itech Tekiuajkayotl. Akinmej kitekichiuiliaj toTajtsin Dios uan okinpejpenkej tlanauatiskej iuan Cristo, ixpoliuiskej uan kinyolitiskej iluikak (Mateo 24:31; 1 Corintios 15:50-​53; 1 Tesalonicenses 4:​15-​17).

•   Peuas Armagedón. Biblia kijtoua “iueyi tonal toTajtsin Dios tlen kipia nochi chikaualistli” uan “itonal Jehová” noijki kijtosneki Armagedón (Apocalipsis 16:14, 16; Isaías 13:9; 2 Pedro 3:​12). Itech non guerra Cristo kinmixpolos akinmej amo okitlakamatkej (Sofonías 1:​18; 2 Tesalonicenses 1:​6-​10). Noijki kinpojpoloskej nochtin tekiuajkej, ninmej tekiuajkej Biblia kijtoua kineskayotia yolkatl temomojti tlen kinpia chikome itsontekonuan (Apocalipsis 19:19-​21).

¿Tlen panos ijkuak tlamis ueyi tlajyouilistli?

•   Kintsakuaskej Satanás uan iejekauan. Se ángel kikitskis Satanás uan iejekauan uan kintlamotlas “kanin tlauejkatlan” (Apocalipsis 20:​1-3). Ompa ayakmo itlaj kichiuaskej, yetoskia ken ijkuak ikaj miki. Noijki ayakmo tlakajkayauaskej porque tsaktoskej kanin tlauejkatlan (Apocalipsis 20:7).

•   Peuas mil xiuitl. Ijkuakon iTekiuajkayo toTajtsin Dios peuas tlanauatis mil xiuitl uan ijkon kinteochiuas akinmej chantiskej tlaltikpak (Apocalipsis 5:​9, 10; 20:​4, 6). Ijkuak tlamis ueyi tlajyouilistli “sapanoua miakej” momakixtiskej uan kitaskej peuas tlanauatis iTekiuajkayo toTajtsin Dios (Apocalipsis 7:​9, 14; Salmo 37:​9-​11).