Itech metstli julio, xiuitl 2011, opejki mochijchiua revista Akin Tetlapouijtok ika tlajtoli tlen amo oui moajsikamati. Otiknekiayaj ijkon tikchijchiuaskej san itech se xiuitl. Axkan pampa yotikitakej tlapaleuia miak, timokuayejyekoaj nochipa tikchijchijtoskej.

Itech metstli enero, xiuitl 2013, noijki opejki mochijchiua ika español, francés uan portugués.

Non opejki mochijchiua pampa kinpaleuis akinmej yauij itech se tlanechikol ika tlajtoli inglés uan amo kuali kajsikamatij.

Ijkuak omochijchi achto revista, opejki tikinseliaj miakej amatlajkuilolmej pampa techtlasojkamatiliaj. Itech altepetl Liberia chanti Rebeca, se siuatl tlen yikipia 64 xiuitl uan amo keman omomachti, ye okijkuilo: “Nimomachtijtok nikintlajtoltis amatlajkuilolmej. Ualeua oniktlajtoltiaya revista Akin Tetlapouijtok, pero amo onikajsikamatiaya. Sapanoa nechpaktia nin revista [ika tlajtoli tlen amo oui], axkan keman nikajsikamati”.

Noijki miakej tetajmej kitekitiltiaj nin revista pampa moyektlaliskej iuan inkoneuan, pampa yaskej itech se nechikol tlen kichiuaj iTlaixpantijkauan Jehová, kanin momachtiaj ika revista Akin Tetlapouijtok.

Rosemary, akin kinmiskaltia eyi iixuiuan, okijkuilo: “Sapanoa oui otikitayaj timomachtiskej ika revista Akin Tetlapouijtok. Nochipa omonekiaya tiktemoskej itech se diccionario tlen kijtosneki se tlajtoli. Ualeua, sapanoa otimochijchikauayaj tikajsikamatiskej se tlajtoli, ik non, noxuiuan amo kuali okajsikamatiayaj tlamachtil. Axkan okachi timajxiliaj tikintemoskej tlaxelolmej itech Biblia uan tikajsikamatij tlen techmachtia”.