Itech 7 de octubre 2013, iTlaixpantijkauan Jehová okikixtijkej se aplicación ika inglés para uelis se kitlajtoltis uan se momachtis Biblia itech teléfonos, tabletas uan okseki tlamantli. Nin aplicación itoka JW Library uan amo itlaj tiktlaxtlauas noijki kipia chikuase Biblias ika inglés, se itoka King James Version (Versión del Rey Jacobo) uan Traducción del Nuevo Mundo de las Santas Escrituras tlen okiski itech 2013. a

Sapanoa miakej kintekitiltiaj teléfonos, tabletas uan okseki tlamantli para tekitiskej, motlapouiskej uan para kimatiskej okseki tlamantli. Ik non, iTlaixpantijkauan Jehová yokitlalijkej miak tlamantli itech jw.org para kinpaleuiskej oksekimej. Tla ijkon, ¿tleka okikixtijkej aplicación JW Library?

Achto, ijkuak itlaj kikixtiaj satepan ayakmo moneki Internet. Satepan, okichijchijkej para totoka se kintemos tlaxelolmej uan kuali se momachtis Biblia. Ma tikitakan tlen okseki tlamantli kipia.

Ijkuak ikaj yikin kalaki itech JW Library achto mota amochmej tlen katej itech Biblia. Uan tla tikpejpenaskej se, motaj nochi tlakotonalmej. Ijkon totoka se kajsis se tlaxelol. Noijki kipia okseki tlamantli tlen tlapaleuia ma timomachtikan Biblia:

• Kinpia notas uan okseki tlamantli tlen miak ipati

• Okseki tlaxelolmej tlen iuan mouika tlen tiktlajtoltijtokej

• Kipia kanin tikintemos seki tlajtolmej

• Kijtoa tlen kipia amochtli tlen tiktlajtoltijtokej

• Kipia kanin kijtoa akin otlajkuilo, itoka amochtli keman okijkuilojkej, kanin uan keski xiuitl okitekitiltijkej ijkuak okijkuilojkej

• Kinpia mapas, tablas, líneas de tiempo uan diagramas

Nochi amatlajkuilolmej tlen kinpia iTlaixpantijkauan Jehová itech JW Library, amo itlaj motlaxtlauaj. Nin aplicación omokixti ika tomin tlen kitemakaj nochtin ika nochi inyolo. Uan nin aplicación yikipiaj kanaj se millón tlaltikpaktlakamej (2 Corintios 9:7). Tla ayamo tikpia, xikkixti nin aplicación uan xiktekitilti.