Sapanoa oyolpakej akinmej amo tlakakij ijkuak okinmatiltijkej nin tlamantli: “Namechyolpaktis nankimatiskej axkan motlajtolkueptok okseki amochmej tlen kipia Escrituras Hebreas [Antiguo Testamento], uan yikajki video itech amochtli Génesis”.

Nin tlamantli, okitematiltijkej itech saiktlami tlapoualistli itech ueyi nechikol tlen okichijkej iTlaixpantijkauan Jehová ika tlajtoli señas americano.

Itech xiuitl 2005, iTlaixpantijkauan Jehová opejkej kitlajtolkuepaj Traducción del Nuevo Mundo de las Santas Escrituras ika tlajtoli señas americano, opejkej ika amochtli Mateo. Uan itech xiuitl 2010, nochi 27 amochmej tlen kipia Escrituras Griegas [Nuevo Testamento] okintlajtolkuepkej ika tlajtoli señas americano.

Noijki, iTlaixpantijkauan Jehová yokitlajtolkuepkej seki amochtli tlen kipia Biblia ika makuili tlatlamantli tlajtolmej ika señas.

¿Tleka kichiuaj nochi nin tekitl? Pampa iTlaixpantijkauan Jehová kajsikamatij akinmej amo tlakakij amo uelis kajsikamatiskej amatlajkuilolmej, pampa non kajsikamatij san akinmej tlajtoaj. Pero Biblia ika tlajtoli señas kuali kajsikamatij akinmej amo tlakakij uan okachi motokiaj itech toTajtsin Dios, okitlajtolkuepkej pampa uelis kajsikamatiskej uan kijtoa tlen melauak. ¿Tlen okimachilijkej akinmej amo tlakakij ijkuak okiselijkej?

Se telpochtli tlen amo tlakakij okijto: “Ijkuak okitemakakej amochtli Mateo, onikmachili Jehová kiteititia nechtlasojtla miak, uan ijkuak okitemakakej amochtli Génesis onikmachili okachi nechtlasojtla. Uan ye ijkon kichiua pampa kineki ma nikixmati”.

Okse siuatl tlen amo tlakaki okijto: “¡Nin tlajtoli ika señas kuali moajsikamati uan kijtoa tlen nikmachilia! Sapanoa niktlasojtla Biblia. Nikita ken Jehová kineki ma niktlajtolti nochi iTlajtol, sejse tlaxelol, pampa okachi kuali ma nikixmati. Pampa okachi kuali nikajsikamati, nechyolinia uan nechpaleuia ma nikilui toTajtsin Dios nochi tlen nikmachilia itech noyolo ijkuak niktlatlaujtia”.