Itech metstli enero, xiuitl 2013, revista Akin Tetlapouijtok ika tlajtoli groenlandés kajxitia cuarenta xiuitl yimochijchijtok. Tlajtoli groenlandés uits itech altepetl inuit uan tlajtoaj kanaj 57,000 tlaltikpaktlakamej.

Itech altepetl Groenlandia katej 150 iTlaixpantijkauan Jehová, pero revista Napasuliaq Alapernaarsuiffik (revista Akin Tetlapouijtok ika tlajtoli groenlandés) mochijchiuaj 2,300 revistas. Nin kiteititia miakej akinmej kitlajtoltiaj non revista amo iTlaixpantijkauan Jehová.

Pampa kajxitia xiuitl, se tlakatl tlen tlajtoa itech televisión okitlajtlani seki tlamantli akin kiyekana tlajtolkuepalistli itech altepetl Nuuk, ye okijto: “Miakej akinmej tlajtoaj tlajtoli groenlandés kinekij okachi kimatiskej itech Biblia, ik non, kitlajtoltiaj revista Napasuliaq Alapernaarsuiffik”.

Ijkuak non tlakatl okitlajtlani se siuatl tlen tlajtolkuepa, tlen okachi kipaktia itech revista, ye okijto: “Okachi nechpaleuia ijkuak niktlajtoltia. Nechmachtia, ken nikpias kuali chipauak nonemilis. Achto sapanoa onitlachichinaya, maski onikmatiaya sapanoa tekojkoa. Pero Biblia techiluia tla tiknekij kuali tiyetoskej, moneki ma tikpiakan chipauak totlalnakayo”.<uEF51>

Noijki itech nin tlen opanok itech televisión okijtojkej katej iTlaixpantijkauan Jehová tlen opejkej momachtia itlajkotia xiuitl 1950, uan kinchijchiuaj amochmej uan amatlajkuilolmej ika tlajtoli groenlandés. Nochtin akinmej tlajtolkuepaj amo kintlaxtlauiaj, sekimej chantij itech ueyi altepetl Dinamarca uan Groenlandia, uan kinekij tlajtolkuepaskej pampa kuali ma mokaki uan ma moajsikamati.

Se iTlaixpantijka Jehová tlen chanti itech altepetl Groenlandia, okijto: “Yikipia 25 xiuitl nikintlapouijtok akinmej nikan chantij uan yonikitak ken okachi kinpatioitaj amatlajkuilolmej ika intlajtol. Itech seki altepemej tlen uejka katej, kanin uelij ajsitiuij ika barco san seki uelta itech se xiuitl, katej tlaltikpaktlakamej tlen kinyolpaktia kintlajtoltiskej revistas. Ik non, ijkuak tikintlajpalotiuij tikintitlaniliaj amatlajkuilolmej”.

Itech metstli enero, xiuitl 2013, revista Akin Tetlapouijtok opejki kichijchiuaj se pampa ika momachtiskej itech tlanechikol uan tlen kitemakaskej ijkuak tetlapouiaj. Ninmej revistas uelis kintlajtoltiskej itech jw.org noso uelis kinkixtiskej kanin kijtoa “Amatlajkuilolmej”, san moneki kipejpenaskej tlajtoli groenlandés uan satepan kichiuaskej clic kanin kijtoa “Xitlatemo”.