Amatlajkuilolmej tlen kinchijchiuaj iTlaixpantijkauan Jehová kinpiaj miakej tlaixkopinalmej, pero yikin opejkej ijkon kichiuaj. Achto revista Zion’s Watch Tower, tlen opejki mochijchiua itech xiuitl 1879 amo okinpiaya tlaixkopinalmej. Miak xiuitl opanok, nochi amatlajkuilolmej san okipiayaj letras, uan ualeua okipiayaj se tlaixkopinal san istak uan tliliuik.

Axkan miakej amatlajkuilolmej kinpiaj miakej tlaixkopinalmej. Tlaixkopinalmej tlen tikinmitaj itech amatlajkuilolmej uan itech jw.org okinchijkej akinmej kimatij kinchijchiuaskej tlaixkopinalmej, uan akinmej kinkixtiaj tlaixkopinalmej. Kuali tlatemoaj pampa kimatiskej ken kinchijchiuaskej tlaixkopinalmej tlen kuali ma kiteititi tlen melauak tlamachtia Biblia uan tlen yiuejkika opanok.

Se neskayotl, ma tikitakan ken omochi tlaixkopinal tlen nikan mota, achto okitlalijkej itech tlamachtil 19 itech amochtli “Testimonio cabal” del Reino de Dios. Nikan mota ueyi altepetl Corinto. Ijkon ken kijtoa Biblia itech Hechos tlakotonal 18, tlatitlanil Pablo okatka itech béma, noso inmixpan tekiuajkej. Akinmej okijkuilojkej non, okiluijkej akin kichijchiuas tlaixkopinal seki tlamantli tlen okajsikej, ken kanin okatka altepetl uan ken okichijchijtoka ika mármol kanin okiuikakej Pablo iixpan ueyi tekiua Galión. Noijki okiluijkej ken okatka ueyi altepetl Roma itech achto siglo, ken okatka itlaken tekiua Galión (akin kajki itlajkotia tlaixkopinal), uelis okipiaya se tlakemitl tlen kiteititia ye se tekiua. Okipiaya se túnica uan se toga tlen itempa okipiaya itlaj ika tlapali púrpura uan okipiaya ikakuan tlen itoka cálceos. Ijkuak Galión okatka itech béma uelis otlachixtoka ik noroeste. Ik non, ijkuak akin kichijchiuas non tlaixkopinal kimati nochi nin tlamantli, okachi kajsikamati tlen moneki kuali kiteititis.

San sekan kintlalijtiuij tlaixkopinalmej, pampa satepan uelis oksepa kintekitiltiskej. Yiuejkika, nochi tlaixkopinalmej tlen okinchijchiuayaj uan neskayomej okintlaliayaj itech uejueyij sobres, san okitayaj itech tlen amatlajkuilol okiski. Uan tlaixkopinalmej okintlatiayaj ika intoka. Pero pampa okachi miak onka, okachi oui kintemoskej uan kintekitiltiskej tlaixkopinalmej.

Pero itech xiuitl 1991, okichijkej itlaj tlen okachi kinpaleuis ijkon ken kinekij, itoka Image Services System, uan ompa yokintlalijkej kanaj 440,000 tlaixkopinalmej. Uan amo san tlen mota itech amatlajkuilolmej tlen kinpiaj, noijki sapanoa miakej tlaixkopinalmej kinpiaj pampa kintekitiltiskej ijkuak monekis.

Ijkuak kitlatiaj se tlaixkopinal, noijki kijkuiloaj keman uan kanin okitekitiltijkej, tlen itoka uan tlen opanotoka ijkuak okichijchijkej. Ijkon okachi totoka kajsij ijkuak moneki kitekitiltiskej itech okse yankuik amatlajkuilol.

Ualeua moneki kitlajtlaniskej ma kinkauilikan kitekitiltiskej se tlaixkopinal tlen amo inmiaxka. Se neskayotl, tla kinekij se tlaixkopinal ken anillos de Saturno pampa kitlaliskej itech se tlamachtil itech revista ¡Despertad!, akinmej tlapaleuiaj achto kitemoaj se tlaixkopinal ken kinekij uan satepan kitlajtlaniliaj akin iaxka pampa uelis kitekitiltiskej. Pampa sekimej kipatioitaj pampa tlamachtiaj ika Biblia, amo kinmiluiaj ma kitlaxtlauakan. Oksekimej kinekij ma kintlaxtlauilikan noso san ma kijkuilokan akin iaxka non tlaixkopinal. Ijkuak kijtoaj kema ma kitekitiltikan, kitlaliaj non tlaixkopinal itech amatlajkuilol uan kitlatiaj.

Itech ninmej tonalmej kinpiaj seki amatlajkuilolmej tlen kinpiaj miakej tlaixkopinalmej. Se neskayotl, ken seki tlaixkopinalmej tlen kiteititiaj tlen techtlapouia Biblia tlen kajki itech Internet. Noijki tlen motaj itech amatlajkuilolmej ken Xikaki toTajtsin Dios, tlamachtia miak tlamantli maski amo kipia miak tlajtolmej. Nochi ninmej amatlajkuilolmej uan tlen kajki itech Internet kichiua tlaltikpaktlakamej okachi ma kinekikan kimatiskej tlen tlamachtia Biblia.