Akinmej tlajtolkuepaj itech tlajtoli español yauij España
Jesús okijto kuali tlajtolmej itech Tekiuajkayotl motetlapouis itech nochi altepemej (Mateo 24:14). Pampa uelis kinpaleuiskej tlaltikpaktlakamej ma kimatikan nonmej kuali tlajtolmej ika intlajtol, tiTlaixpantijkauan Jehová tikintlajtolkuepaj amatlajkuilolmej ika miakej tlatlamantli tlajtolmej, achto moijkuiloaj ika tlajtoli inglés. Itech xiuitl 1909 opejki motlajtolkuepaj ika tlajtoli español, maski itech tlajtoli chino sapanoa miakej tlajtoaj, tlajtoli español noijki miakej tlajtoaj. Axkan, kanaj 500 millones tlaltikpaktlakamej tlajtoaj español itech nochi Tlaltikpak.
William akin kintlajtolkuepa amatlajkuilolmej ika tlajtoli español, kijtoa: “Tlajtoli español tlajtoaj itech miakej uejueyij altepemej”. Noijki okijto: “Tlen tiktlajtolkuepaj tiknekij ma ajsi itech inyolo nochtin tlaltikpaktlakamej, maski san kanin inaltepe, maski tla omomachtijkej escuela noso amo, maski ma kipiakan tomin noso amo”. Pampa uelis kichiuaskej nin tekitl tlen oui, noijki tlapaleuiaj akinmej tlatlamantli inaltepej ken: Argentina, Colombia, El Salvador, Estados Unidos, Guatemala, México, Puerto Rico, Uruguay, Venezuela uan España.
ITlaixpantijkauan Jehová akinmej tlajtolkuepaj ika tlajtoli español yokipiayaj miak xiuitl itech altepetl Estados Unidos uan otlapaleuiayaj akinmej okatkaj itech altepetl Argentina, México uan España. Itech xiuitl 1993, oyajkej altepetl Puerto Rico uan ompa san sekan otekitikej.
Itech metstli marzo, xiuitl 2012, omoijto akinmej tlajtolkuepaj, axkan kinuikaskiaj itech Kali kanin tekitij iTlaixpantijkauan Jehová itech altepetl España. Edward akin tlajtolkuepa, okijto: “Amo san tejuan tiaskiaj, tikuikaskiaj tlamantli tlen toaxka, tlamantli tlen ika titekitij uan noijki omonekiaya tikuikaskej: tobiblioteca”. Nin biblioteca kinpia kanaj 2,500 amochmej tlen ika titekitij, uan noijki sapanoa miakej Biblias ika tlajtoli español.
Akinmej tekitij itech Kali Betel itech altepetl España kinseliaj tokniuan ika miak tlasojtlalistli.
Akinmej kintlajtolkuepaj amatlajkuilolmej ika tlajtoli español oajsitoj España itech tonal 29, metstli mayo, xiuitl 2013. Akinmej tekitij itech kali Betel, okinselijkej ika miak tlasojtlalistli. Akinmej tlajtolkuepaj uan tlen ika tekitij okipanauijkej océano Atlántico; uan pampa miakej otlapaleuijkej uan kuali omokuayejyekojkej ken kichiuaskiaj, akinmej kintlajtoltiaj amatlajkuilolmej nochipa okinpiayaj. Edward okijto: “Okachi miak ipati ma motetlapoui itech iTekiuajkayo toTajtsin Dios uan tiknekij miakej akinmej tlajtoaj español ma kimatikan nin tlamantli”.