Itech ueyi altepetl México uan makuili uejueyij altepemej itech Centroamérica, katej kanaj 290 akinmej tlajtolkuepaj ika kanaj 70 tlatlamantli tlajtolmej. ¿Tleka kichiuaj nin tekitl? Pampa ijkuak tlaltikpaktlakamej kinseliaj amatlajkuilolmej ika intlajtol okachi kajsikamatij uan ajsi itech inyolo (1 Corintios 14:9).

Pampa okachi kuali tlajtolkuepaskej, sekimej tokniuan tlen otekitiayaj itech Kali kanin tekitij iTlaixpantijkauan Jehová itech ueyi altepetl México okintitlankej kanin tlajtoaj intlajtol. ¿Ken kinpaleuia? Akinmej tlajtolkuepaj motlapouiaj iuan akinmej tlajtoaj intlajtol, ijkon okachi kuali tlajtolkuepaj.

¿Ken momachiliaj akinmej tlajtolkuepaj? Federico, akin tlajtolkuepa ika náhuatl de Guerrero, okijto: “Onikatka kanaj majtlaktli xiuitl itech ueyi altepetl México, san se kalchanejke onikixmatki tlen tlajtoa notlajtol. Pero axkan, itech altepetsintli kanin titlajtolkuepaj, sapanoa miakej tlajtoaj náhuatl de Guerrero”.

Karin, akin tlajtolkuepa ika bajo alemán kajki itech altepetl Chihuahua (México), okijto: “Nichantis iuan menonitas nechpaleuia ma nikmati ken tlajtoaj axkan tlaltikpaktlakamej. Nichanti uan nitekiti itech se altepetsintli, uan ijkuak nitlachia itech ventana, nikinmita nochtin akinmej uelis mopaleuiskej ika tekitl tlen nikchiua”.

Neyfi, akin tlajtolkuepa ika tlajtoli maya ompa Mérida (México), okijto: “Ijkuak nitlamachtia Biblia ika tlajtoli maya, nikita tlen tlajtolmej amo okachi kuali moajsikamatij. Ik non, timochijchikauaj okachi kuali titlajtolkuepaskej”.

¿Ken kinpaleuia akinmej kintlajtoltiaj amatlajkuilolmej ika intlajtol? Ma tikitakan se neskayotl. Elena tlajtoa tlapaneco, yokipiaya kanaj cuarenta xiuitl omonechikoaya iuan iTlaixpantijkauan Jehová ika tlajtoli español, pero amo okajsikamatiaya tlen omomachtiaya. Okijto: “San onikmatiaya omonekiaya nimonechikos”. Pero ijkuak opejki momachtia Biblia ika amatlajkuilolmej ika tlajtoli tlapaneco, opejki okachi kitlasojtla Jehová uan satepan omotemakak iixpan uan omoapolakti itech xiuitl 2013. Elena okijto: “Niktlasojkamatilia Jehová pampa onechkauili ma nikajsikamati Biblia”.