Sapanoa oui kintlajtolkuepaskej tlakuikalmej ika okseki tlatlamantli tlajtolmej. Uan kitlajtolkuepaskej se amochtli tlen kipia 135 tlakuikalmej moneki sapanoa mochijchikauaskej.

ITlaixpantijkauan Jehová opejkej kichiuaj nin tekitl, san itech eyi xiuitl okitlajtolkuepkej yankuik amochtli, Cantemos a Jehová, ika 116 tlatlamantli tlajtolmej. Uan ok 55 tlatlamantli tlajtolmej okitlajtolkuepkej san 55 tlakuikalmej. Uan ok kitlajtolkuepaskej ika miakej tlatlamantli tlajtolmej.

Axkan, iTlaixpantijkauan Jehová kintlajtolkuepaj amatlajkuilolmej ika 600 tlatlamantli tlajtolmej, uan kanaj 400 yikajki itech Internet. Pero kintlajtolkuepaskej tlakuikalmej okachi oui. ¿Tleka sapanoa oui? Pampa tlakuikalmej tlen kipia amochtli Cantemos a Jehová amo okipatlakej itech okseki tlatlamantli tlajtolmej.

Kuali kijkuiloskej uan kiyektlaliskej tlen tlajtolmej kipias se tlakuikali amo ken ijkuak kitlajtolkuepaj se revista. Ijkuak kitlajtolkuepaj revista Akin Tetlapouijtok ika okse tlajtoli, akinmej tlajtolkuepaj okachi mochijchikauaj pampa nochi kijkuiloskej ken achto okijkuilojkej. Pero tlakuikalmej amo ijkon kintlajtolkuepaj.

Akinmej kitlajtolkuepaj tlakuikalmej amo kichiuaj ken ijkuak motlajtolkuepaj amatlajkuilolmej tlen achto omoijkuilo, okachi kuali nin moneki kuali moajsikamatis, yetos kuajkualtsin uan amo oui kilnamikiskej.

Tlajtolmej tlen kipia se tlakuikali amo moneki yeto oui, okachi kuali, uelis san niman moajsikamatis. Itech nochi tlatlamantli tlajtolmej, moneki kuali mokakis tlajtoli ika tlatsotsonalistli, ken yetoskia okijkuilo akin tlakuika.

¿Ken ueli okichijkej akinmej tlajtolkuepaj? Amo okijtlajtolkuepkej sejse tlajtoli tlen kipia amochtli Cantemos a Jehová ika inglés, okachi kuali, okinnauatijkej ma kitekitiltikan tlajtoli tlen ma kiteititi tlen okachi ipati tlen ijkuilitok ika inglés. Noijki, omochijchikajkej pampa kijkuiloskej tlen kijtoa Biblia itech nochi tlakuikalmej, akinmej okitlajtolkuepkej okitekitiltijkej tlajtolmej tlan kuali moajsikamati uan tlen uelis san niman moilnamikis.

Achto okitlajtolkuepkej sejse tlajtoli tlen ijkuilitok ika inglés. Satepan, se iTlaixpantijka Jehová tlen kimati kinmijkuiloa tlakuikalmej, okiyektlali tlen yomotlajtolkuepki pampa kuajkualtsin ma mokaki, ken se yankuik tlakuikali ika non tlajtoli. Uan akinmej okitlajtolkuepkej okitakej pampa ma kiteititi tlen kijtoa Biblia.

Itech nochi Tlaltikpak, iTlaixpantijkauan Jehová sapanoa yolpakij pampa kipiaj nin amochtli, uan miakej mochixtokej kiseliskej ika intlajtol.