Itech metstli septiembre, xiuitl 2012, kanaj 20 kalmej kanin tekitij iTlaixpantijkauan Jehová okinpanoltijkej itech okseki kalmej tlen okachi uejueyij pampa ompa kinyekanaskej.

Uan itech okseki altepemej, ken itech ueyi altepetl Serbia uan Macedonia okinchijchijkej kalmej kanin tekitiskej iTlaixpantijkauan Jehová. Ma tikitakan ome tlamantli pampa ijkon okichijkej.

Axkan onka okachi miak tlamantli uan miak teposmej tlen ika tekitiskej, ik non, ayakmo moneki okachi miakej ma tekitikan itech ninmej kalmej. Pampa ayakmo miakej tekitij itech kalmej tlen okachi uejueyij, uelis kinpanoltiskiaj oksekimej tokniuan tlen tekititokej itech kalmej tlen amo okachi uejueyij.

Axkan pampa okinsetilijkej kalmej kanin tekitij iTlaixpantijkauan Jehová, okintlalijkej seki tokniuan tlen kuali tekitij pampa ma kiyekanaj tetlapouilistli. Se neskayotl, itech Kali kanin tekitij iTlaixpantijkauan Jehová itech ueyi altepetl México kiyekanaj tetlapouilistli itech tlen mochiua itech ueyi altepetl Costa Rica, El Salvador, Guatemala, Honduras, Nicaragua uan Panamá. Ik non, ninmej chikuase kalmej okintsakej.

Itech ninmej chikuase kalmej tlen okintsakej, okinpejpenkej cuarenta tokniuan uan okititlankej itech Kali kanin tekitij iTlaixpantijkauan Jehová itech ueyi altepetl México. Uan kanaj noventa y cinco tokniuan omokajkej itech inmialtepe pampa okachi tetlapouiskej.

Kali kanin tekitij iTlaixpantijkauan Jehová itech ueyi altepetl México kinyekana oksekimej tokniuan tlen omokajkej itech seki altepemej itech Centroamérica pampa ma kintlajtolkuepakan amatlajkuilolmej. Se neskayotl, itech ueyi altepetl Panamá kanaj veinte iTlaixpantijkauan Jehová kintlajtolkuepaj amatlajkuilolmej ika tlatlamantli tlajtolmej tlen tlajtoaj itech non ueyi altepetl. Uan itech kali kanin otekitiayaj itech ueyi altepetl Guatemala, katej 16 iTlaixpantijkauan Jehová tlen tlajtolkuepaj ika naui tlatlamantli tlajtolmej. Ik non, itech 300 tokniuan tlen otekitiayaj itech Centroamérica kanaj 75 tokniuan tekitij itech okseki kalmej kanin tekitij iTlaixpantijkauan Jehová.

Pampa okinsetilijkej seki kalmej kanin tekitij iTlaixpantijkauan Jehová, miakej tlen kuali tekitij axkan uelis okachi tetlapouiskej kuali tlajtolmej itech Tekiuajkayotl.

Se iTlaixpantijka Jehová itech África, akin okititlankej ma tetlapouiti, okijkuilo: “Itech seki metstli, onikitak oui nikpatlas tlen achto onikchiuaya uan peuas nikchiuas okseki tlamantli. Axkan sapanoa niyolpaki uan nikpia miak tlateochiualistli pampa mojmostla nitetlapouia. Nikinmachtia 20 tlaltikpaktlakamej, uan sekimej yopejki monechikoaj”.