Itech metstli octubre, xiuitl 2012, itech Kali kanin kinyekanaj iTlaixpantijkauan Jehová itech altepetl Brooklyn (Nueva York), opejkej kiteititiaj nochi tlen okinpanok. a Itech nin museo kiteititiaj ken sapanoa omochijchikajkej, ken okintlajyouiltijkej uan ken otlaxikojkej pampa okintlajyouiltijkej akinmej okichiuayaj ken Cristo.

Akinmej tlachiatiuij kitaj tlen yiuejkika opanok, peua itech tlen okinpanok akinmej achto opejkej kichiuaj ken Cristo itech xiuitl 33 uan ajsi itech ninmej tonalmej. Nin omoxejxelo itech naui secciones uan mota nochi tlen opanotiaya. Sejse sección okitokayotijkej ika se tlaxelol tlen kisa itech Biblia, peua ika se video tlen amo uejkaua uan kajki ika tlajtoli inglés, uan kipia subtítulos ika tlajtoli coreano, español, francés, itlaliano, japonés uan portugués.

Achto sección itoka, “[Tlaltikpaktlakamej] okachi okiwilitakeh n tleyuálistli” tlen okijto Jesús itech Juan 3:19. Biblia okijto yetoskej tlaltikpaktlakamej tlen amo yolkualmej tlen “kitemachtiskeh tlan amo milák” (Hechos 20:30). Kuali technejmachtia itech tlen okichijkej nonmej tlakamej.

Sección ome itoka “N tláwili tsotlanis [noso petlanis]” tlen kisa itech 2 Corintios 4:6. Nin kiteititia tlen opanok itech xiuitl 1800 a 1900. Itech nin sección peua tlajtoa itech seki tlakamej tlen opejkej momachtiaj Biblia uan ken opejkej okachi kajsikamatij ijkuak ayamo opeuaya Primera Guerra Mundial.

Itech nin sección noijki kiteititiaj seki tlamantli itech se tlamauisol tlen itoka “Foto-Drama de la Creación”. Itech xiuitl 1914, akinmej Momachtiaj Biblia (axkan moixmatij ken iTlaixpantijkauan Jehová) opejkej kiteititiaj nin tlamauisol tlen okipiaya tlaixkopinalmej uan omokakiaya. Seki xiuitl satepan, sapanoa miakej tlaltikpaktlakamej okitakej nin tlamauisol. Nikan noijki motaj seki tlaixkopinalmej, se video tlen amo uejkaua uan kiteititia ken peua nin sección uan motaj 512 diapositivas.

Sección eyi itoka “Dragón okachi okualankamik” tlen kisa itech Apocalipsis 12:17. Nin kiteititia ken okintlajyouiltijkej imachtijkauan Cristo ijkuak opejki siglo 20 uan seki tlamantli itech akinmej kichiuaj ken Cristo tlen amo otlapaleuijkej itech guerra. Onka se video tlen kiteititia tlen okipanok Remigio Cuminetti, se iTlaixpantijka Jehová tlen chanti itech ueyi altepetl Italia, ye amo okinek motlakentis ken soldado uan amo okinek tlapaleuis itech Primera Guerra Mundial. Itech okse video mota itech Alois Moser tlen ochantiaya itech ueyi altepetl Australia. Ye amo okinek kijtos “¡Heil Hitler!”, ik non, okikixtijkej kanin otekitiaya uan satepan okitsakej itech se campo de concentración itech altepetl Dachau.

Ken mota kanin okitsakej, kiteititia nochi tlen okinpanok iTlaixpantijkauan Jehová akinmej noijki okintsakej pampa okichiuayaj ken Cristo, sekimej okintsakej itech uejueyij altepemej ken Grecia, Japón, Polonia uan Serbia.

Saiktlami, itech sección naui itoka “Kualitlájtoli [...] itech nochi n tlaltíkpaktli,” tlen kisa itech Mateo 24:14, kiteititia nochi tlen opejkej kichiuaj iTlaixpantijkauan Jehová itech xiuitl 1950 uan hasta itech ninmej tonalmej. Sapanoa miakej tlaixkopinalmej kiteititiaj ken totoka moskaltijtok tekitl, mochijchikauaj tetlapouiaj uan ken kiteititiaj melauak motlasojtlaj, ijkon ken moixmatij iTlaixpantijkauan Jehová.

Ijkuak yitlamis nochi kitaskej tlen onka, akinmej tlachiatiuij uelis kimauisoskej itech seki pantallas Kali kanin momachtiaj Biblia, tabernáculo de Brooklyn uan kalmej tlen okintekitiltijkej iTlaixpantijkauan Jehová yikipia kanaj cien xiuitl.

Opanok se xiuitl pampa kijtoskej ken kichiuaskej uan opanok seki metstli pampa ijkon kichiuaskej. Pero itech nochi Tlaltikpak otlapaleuijkej iTlaixpantijkauan Jehová pampa kinechikoskej nochi tlamantli tlen miak ipati.

¿Tleka okichijkej nochi nin tekitl? Ijkuak okitlajtlanijkej se tokni tlen poui itech Cuerpo Gobernante tlen kipiaj iTlaixpantijkauan Jehová, okijto ninmej tlajtolmej: “Pampa tikmatiskej tlen moneki tikchiuaskej, moneki tikmatiskej tlen otikchijkej”.