Itech Kali kanin tekitij iTlaixpantijkauan Jehová itech ueyi altepetl Estados Unidos mochijchikauaj tekitij telpokamej uan ichpokamej pampa kinpakaskej kanaj mil ochocientos toneladas tsotsoli sejse xiuitl, nochi tlen kisa itech eyi kalmej tlen kajki itech altepetl Brooklyn, Patterson uan Wallkill (Nueva York). Sapanoa miak tsotsoli kipakaj. Amo san miak tsotsoli kipakaj, noijki kipakaj okseki tlamantli.

Mojmostla akinmej chantij itech Betel kititlanij kanaj 11,000 tlamantli tsotsoli kanin tlapakaj: kanaj 2,300 camisas uan kanaj 650 pantalones, noijki kititlanij calcetines, ropa interior uan camisetas. Noijki kititlanij kanaj 900 tlatlamantli tsotsoli pampa kipakaskej ika vapor pampa non tlakemitl amo mopaka ika atl.

Noijki kititlanij sapanoa miakej sábanas, toallas uan mantas. Moneki kinpakaskej nochi tlen kintitlaniliaj, kiuatsaskej uan kikauatiuij. Seki tsotsoli ken tlen ika tlachipauaj san sekan kinpakaj, pero seki tsotsoli ken blusas uan corbatas tlen chijchijtokej ika seda moneki sejse tsotsoli kinpakaskej.

Akinmej tekitij kitaj sejse tsotsoli kox yotsomonki noso kinpoloa botones. Tla moneki kitlaliliskej se botón, san niman ijkon kichiuaj ika se tepostli noso ika se akuxa. Tla se tsotsoli itlaj kipoloa, ikaj tlen kimati ken kichiuas san niman kiyektlaliaj.

Pampa amo motlapololtiskej pampa sapanoa miak tsotsoli kipakaj, se máquina kintlalilia se etiqueta ika se código de barras pampa kixmatiskej. Ika código de barras uelij kimatij akin iaxka se tsotsoli, uan ijkuak yokinpakej uan yokinmelajkej kinkauilitiuij kanin chantij akinmej tekitij itech Betel.

Akinmej okachi yikimatij ken tekitiskej kinmachtiaj akinmej yikin peuaj. Momachtiskej kanaj 20 tlatlamantli tekitl tlen uelis kichiuaskej. Maski mota amo okachi oui nin tekitl uejkaua momachtiaj ken kinpakaskej tlen sapanoa sokiojkej. Pampa ikaj tlen yikin peua tekiti, moneki kixmatis san tlen tsotsoli uan kimatis tlen okachi kuali kitekitiltis uan ken kichiuas.

Se siuatl tlen itoka Tajh, yikipia se xiuitl uan tlajko tekititok kanin tlapakaj, okijto nin itech akinmej iuan tekitij: “Nochtin kuali timouikaj, sapanoa techyolpaktia titekitiskej iuan tlaltikpaktlakamej tlen kipiaj tlatlamantli innemilis”. Okse siuatl tlen nikan tekiti itoka Shelly, okijto: “Se tlateochiualistli nitlapaleuis pampa nochtin akinmej nikan tekitij kuali uan chipauak ma motakan”.