“¡Tikmachiliaj sapanoa techtlasojtlaj!” Ijkon okijto se siuatl tlen chanti itech ueyi altepetl Ucrania ijkuak okikak tokni Stephen Lett akin poui itech Cuerpo Gobernante tlen kipiaj iTlaixpantijkauan Jehová, ijkuak okitlajtolti se amatlajkuilol. Ijkon ken nin siuatl, noijki omonechikojkej 165,000 iTlaixpantijkauan Jehová akinmej noijki okikakej tokni Stephen Lett ijkuak okintlajpaloto itlamian semana itech tonalmej 10 uan 11, metstli mayo, xiuitl 2014.

Tlapoualistli tlen okipanolti uan amatlajkuilol tlen okitlajtolti okintlajtolkuepkej ika makuili tlatlamantli tlajtolmej uan okipanoltijkej itech 700 Kalmej kanin monechikoaj iTlaixpantijkauan Jehová itech ueyi altepetl Ucrania.

Noijki itech non itlamian semana, tokni Mark Sanderson, akin noijki poui itech Cuerpo Gobernante tlen kipiaj iTlaixpantijkauan Jehová, noijki okitlajtolti nin amatlajkuilol itech se nechikol tlen okichijkej itech ueyi altepetl Rusia. Nin nechikol okitlajtolkuepkej ika 14 tlatlamantli tlajtolmej uan omonechikojkej 180,413 itech kanaj 3,000 tlanechikolmej tlen katej itech altepetl Bielarrusia uan itech ueyi altepetl Rusia.

Nin amatlajkuilol, tlen okijkuilo Cuerpo Gobernante tlen kipiaj iTlaixpantijkauan Jehová, okinmijkuililijkej nochi tlanechikolmej tlen katej itech ueyi altepetl Rusia uan Ucrania. Tokni Mark Sanderson okitlajtolti nin amatlajkuilol ika tlajtoli ruso, itech Kali kanin tekitij iTlaixpantijkauan Jehová itech ueyi altepetl Rusia, okijkuilo: “Nochtin sapanoa otechyolini pampa Cuerpo Gobernante totech motekipachoa. Tinochtin otikmachilijkej ken otechualtlajpalojkej ika miak tlasojtlalistli”.

Nin amatlajkuilol okinyolseui uan okinyolchika iTlaixpantijkauan Jehová tlen chantij kanin mokokoliaj tlaltikpaktlakamej. Uan okinyolchika pampa amo ma mokajkalakikan itech nin Tlaltikpak (Juan 17:16).

Saiktlami, nin amatlajkuilol okinyolchika pampa okachi kuali ma mouikakan iuan Jehová, ma kitlatlaujtikan, ma momachtikan uan ma mokuayejyekokan itech tlen kitlajtoltiaj itech iTlajtol toTajtsin Dios. Noijki okinmilui maski kipiaskej miak ouijkayotl, moneki kineltokaskej melauak mochiuas tlen kijtoa toTajtsin Dios itech Isaías 54:17: “Maski san tlen tepostli ika mitsixnamikiskej, amo mitstlaniliskej, uan maski san akin mitsteluis, tiktlanilis”.

Nin amatlajkuilol tlen okijkuilo Cuerpo Gobernante, saiktlami okijto: “Nochtin timechtlasojtlaj. Kuali xikmatokan tejuan nochipa timechilnamiktokej uan tiktlatlaujtiaj Jehová ma namechpaleui”.

Pampa noijki okintlajpalotoj, itech Kali kanin tekitij iTlaixpantijkauan Jehová itech ueyi altepetl Ucrania, okijkuilo: “Nochtin tokniuan sapanoa okintlajtlachialti pampa Cuerpo Gobernante intech motekipachoa uan sapanoa kintlasojtla. Pampa tokni Stephen Lett oyajki itech ueyi altepetl Rusia uan Mark Sanderson itech ueyi altepetl Ucrania, omoteititi ialtepe toTajtsin Dios san sekan kajki uan okiteititi ken Jehová uan Jesús kintlasojtlaj nochtin tokniuan. Melauak tikneltokaj okintlajpalotoj ninmej tokniuan ijkuak okachi okinekiayaj uan non kinpaleuis pampa okachi mochijchikauaskej maski kipiaskej miak ouijkayotl”.