Itech tonalmej 5 uan 6, metstli octubre, xiuitl 2013, kanaj 1,413,676 (un millón cuatrocientos trece mil seiscientos setenta y seis) tlaltikpaktlakamej tlen uitsej itech 31 uejueyij altepemej omonechikojkej itech nechikol 129 tlen kichiua Watch Tower Bible and Tract Society of Pennsylvania. Sekimej omonechikojkej itech Kali kanin mochiuaj uejueyij nechikolmej itech altepetl Nueva Jersey (Estados Unidos), uan miakej okinpanoltilijkej itech Internet.

Tokni Guy Pierce, akin poui itech Cuerpo Gobernante tlen kipiaj iTlaixpantijkauan Jehová, okiyekanki nin nechikol. Okijto seki tlamantli tlen kikakiskiaj itech nin nechikol, okijto monankiliskiaj tlajtlanilmej tlen miak inpati, kiyekijtoskiaj seki tlamachtilmej uan kinmakaskiaj tlakuali espiritual “ipan ora” (Mateo 24:45; Proverbios 4:18).

“Kiteititiaj itlaj tlen kiueyichiua itoka Jehová.”

Tokni Mark Sanderson, akin poui itech Cuerpo Gobernante tlen kipiaj iTlaixpantijkauan Jehová, okijto okichijkej se tlamantli itech Kali kanin kinyekanaj iTlaixpantijkauan Jehová itech altepetl Brooklyn (Nueva York, Estados Unidos). Itoka “Biblia uan itoka toTajtsin Dios”. Itech nin kiteititia ken itoka toTajtsin Dios sapanoa miak ipati itech Escrituras Hebreas uan itech Escrituras Griegas Cristianas. Akinmej tlachiatiuij uelis kitaskej miakej Biblias tlen yiuejkika okinchijkej, miak tlamantli tlen okitekitiltiayaj yiuejkika uan seki páginas tlen okipiaya seki Biblias itech Edad Media.

Nikan motaj seki páginas tlen okiski itech se Biblia tlen okitlajtolkuepki William Tyndale itech siglo XVI, nin tlakatl achto okitlajtolkuepki Biblia ika tlajtoli inglés uan okijkuilo itoka toTajtsin Dios, noijki mota se página tlen kipia achto Biblia Reina-Velera, tlen okichijkej itech xiuitl 1602. Nin Biblia tlen okitlajtolkuepkej ika tlajtoli español kipia itoka totajtsin Dios, “Iehova”. Noijki, mota se Biblia ika inglés tlen itoka Great Bible (Gran Biblia, okichijkej itech xiuitl 1549), noijki se Biblia tlen okitlajtolkuepki Elias Hutter ika 12 tlatlamantli tlajtolmej (moixmati ken Políglota de Núremberg, tlen okichijkej itech xiuitl 1599) uan Biblia tlen itoka Geneva Bible (Biblia de Ginebra; tlen okichijkej itech xiuitl 1603). Ninmej Biblias kipiaj itoka toTajtsin Dios.

Tokni Sanderson nochtin okimilui ma kitatij kanin okintlalijkej tlatlamantli Biblias, okijto: “Tiktlatlaujtiaj Jehová [...] nin tlamantli ma kinpaleui nochtin tlaltikpaktlakamej, maski san tlen tlamachtilistli kipiaj uan kinekij kimatiskej tlen melauak, uan noijki ma kitlasojtlakan tlen tiktlasojtlaj: iTlajtol toTajtsin Dios, Biblia, uan itoka, Jehová”.

Tlaxelol tlen motekitiltis xiuitl 2014.

Tokni Gerrit Lösch, akin poui itech Cuerpo Gobernante tlen kipiaj iTlaixpantijkauan Jehová, okipanolti Tlamachtil ika Akin tetlapouijtok, satepan okijto tlen tlaxelol motekitiltis itech xiuitl 2014. Mateo 6:10 tlen kijtoa: “Ma uiki motekiuajkayo”. Maski nin tlaxelol miak tlamantli kijtosneki pampa iTlaixpantijkauan Jehová, itech xiuitl 2014 okachi miak ipati, pampa iTekiuajkayo toTajtsin Dios kajxitia cien xiuitl yitlanauatijtok itech iluikak.

“Jehová techtliokolia itlaj tlen miak ipati.”

Satepan, nochtin okitakej se video kanin omotak ken okichijchijkej Biblia, Traducción del Nuevo Mundo de las Santas Escrituras, tlen kichijchiuaj iTlaixpantijkauan Jehová. Miakej tlaltikpaktlakamej kijtoaj nin okachi kuali omotlajtolkuepki. Itech se ueyi nechikol internacional tlen itoka “Aumento de la Teocracia”, tlen omochi itech xiuitl 1950, tokni Nathan Knorr okiteititi achto Biblia tlen omotlajtolkuepki uan okijto nochi ma kitlajtoltikan, ma momachtikan uan ika ma kinpaleuikan oksekimej tlaltikpaktlakamej pampa uelis kiueyichiuaskej itoka toTajtsin Jehová, ninmej tlajtolmej ok techpaleuiaj.

“Okilnamikej nochi tlen okichijkej.”

Tokni Samuel Herd, akin poui itech Cuerpo Gobernante tlen kipiaj iTlaixpantijkauan Jehová, okiteititi se video kanin omotayaj naui betelitas tlen katej itech ueyi altepetl Estados Unidos, yejuan okitakej ijkuak okitemakakej achto Traducción del Nuevo Mundo. Non Biblia omochijchi ika chikuase volúmenes itech xiuitl 1950 a 1960.

Eunice Timm okijto ken opejki kitekitiltia Traducción de Nuevo Mundo itech nechikol. Okipatioitaya tlapaleuilistli tlen okipiaya Biblia, ken notas uan referencias. Pampa okitaya oui kinuikas nochi volúmenes itech tlanechikol, okinuikaya san tlen okitaya kintekitiltis. Pero okiuikaya Biblia King James Version (Versión del Rey Jacobo) pampa tla omonekiaya motlajtoltis okse tlaxelol, pampa nin Biblia amo ueyi.

Nin yankuik Biblia noijki otechpaleui itech okseki tlamantli pampa tikueyichiuaskej toTajtsin Dios. Se neskayotl, Fred Rusk okijto ijkuak ayamo oajsiaya xiuitl 1950, akinmej okichiuayaj se tlatlaujtilistli itech Betel okitekitiltiayaj tlajtolmej tlen kipia Biblia King James Version. Ik non, satepan ijkuak okiski Traducción del Nuevo Mundo, tokniuan ayakmo okijtojkej tlajtolmej tlen ayakmo motekitiltiaj uan opejkej kitekitiltiaj tlajtolmej tlen kipia nin Biblia.

Se tlakatl tlen itoka John Wischuk amo san okitlajtlachialti ken okitlajtolkuepkej nin Biblia, noijki okitlajtlachialti akinmej okitlajtolkuepkej pampa yejuan okatka yolyamankej. Ye okijto: “Amo okinekiayaj ma kimatikan akinmej okitlajtolkuepkej nin Biblia, nion satepan ijkuak mikiskiaj, pampa okinekiayaj san Jehová ma kiseli ueyichiualistli”. Tlen okijto Charles Molohan okiteititi tlen okimachiliayaj akinmej okinchiuilijkej seki tlajtlanilmej, ye okijto: “Traducción del Nuevo Mundo techpaleuia pampa ma tikneltokakan tlen melauak, pampa ma mochikaua totlaneltokilis uan pampa ma tikinpaleuikan oksekimej ma kichikauakan intlaneltokilis”.

“Ika tejwah totlajtol tikinkakih kenijki yejwah kimijtoah n milagros non Dios yokinchi.” (Hechos 2:11.)

Geoffrey Jackson, akin poui itech Cuerpo Gobernante tlen kipiaj iTlaixpantijkauan Jehová, ijkuak okipanolti tlapoualistli okiteititi Biblia versión revisada 2013 de la Traducción del Nuevo Mundo ika tlajtoli inglés. Ijkuak otlanki tlapoualistli, nochtin akinmej okikakej nin tlapoualistli okiselijkej se Biblia, noijki akinmej okinpanoltilijkej itech Internet.

Tokni Jackson okijto yikipia kanaj sesenta xiuitl ijkuak omotlajtolkuepki san tlajko Traducción del Nuevo Mundo. Itech non kauitl, tlajtoli inglés yomopatlak miak, pero tlen tiknekij ijkuak tiktlajtolkuepaj Biblia tikchiuaj amo keman mopatla. Tiknekij tiktlajtolkuepaskej iTlajtol toTajtsin Dios, ijkon ken achto omoijkuilo, pero kuali ma kiteititi tlen melauak.

Itech xiuitl 2005, Cuerpo Gobernante okinek ma motlajtolkuepa Biblia ika okachi miakej tlatlamantli tlajtolmej. Itech non xiuitl Traducción del Nuevo Mundo yokatka ika 52 tlatlamantli tlajtolmej. Pero axkan uelis kitlajtoltiskej ika 121 tlatlamantli tlajtolmej uan ok motlajtolkueptok ika 45 tlatlamantli tlajtolmej. Akinmej kitlajtolkuepaj Traducción del Nuevo Mundo ika okseki tlatlamantli tlajtolmej kitlajtlanij tlapaleuilistli pampa kuali kajsikamatiskej seki tlajtolmej. Yokinchijkej kanaj 52,000 tlajtlanilmej uan omonankilijkej, seki omotekitiltijkej pampa kitaskej tlen tlaxelolmej omonekiaya kinyektlaliskej.

Se neskayotl, tokni Jackson okijto tlen kijtosneki tlen kijtoa 1 Samuel 14:11, kanin kijtoa Jonatán uan iescudero oyajkej kanin filisteos uelis kinmitaskiaj. Okijto achto tlajtolkuepalistli tlen okichi Traducción del Nuevo Mundo ika inglés okintekitiltiaya seki tlajtolmej tlen omoajsikamatiaya Jonatán uan iescudero omoxipetsojkej pampa ma kinmitakan filisteos. Ken axkan omotlajtolkuepki ayakmo ijkon moajsikamati. Okse neskayotl, itech Miqueas 2:6 achto okijtoaya: “Amo xikinkauakan ma uetsikan tlajtolmej. Yejuan kinkauaj ma uetsikan tlajtolmej”. Nin tlaxelol omotlajtolkuepki sejse tlajtoli, pero axkan ika inglés kijtoa: “Yejuan tetlapouiaj: “¡Ayakmo xitetlapouikan!”.

Yikipia makuili xiuitl, Cuerpo Gobernante tlen kipiaj iTlaixpantijkauan Jehová okinmakak tekitl akinmej kitlajtolkuepaj Traducción del Nuevo Mundo pampa ma kitakan tlen uelis okachi moyektlalis. Axkan nin Biblia kuajkualtsin mota, amo oui motlajtoltia uan tlen ika okichijchijkej chikauak, ik non, okachi uejkauas maski sapanoa kitekitiltiskej. Tokni Jackson okijto mochijchiua nin Biblia ika uejueyij letras uan ika tsikitsitsintin letras, tlen ayakmo uejkauas pampa kintemakaskej.

“Kuali ma tiktekitiltikan iTlajtol toTajtsin Dios.”

Stephen Lett, akin poui itech Cuerpo Gobernante tlen kipiaj iTlaixpantijkauan Jehová, okijto tlen tlamantli kipia nin Biblia tlen okiyektlalijkej, uan okipanolti se tlapoualistli tlen kisa itech 2 Timoteo 2:15. Okijto tlajtoli “tikyektekitilia” kijtosneki itlaj “kuali tiktekiskej”. Ik non, akinmej kichiuaj ken Cristo moneki “kuali tlatekiskej” ijkuak tiktekitiltiaj “espada non techmaka n Espíritu Santo”, kijtosneki kuali tiktekitiltiskej iTlajtol toTajtsin Dios (Efesios 6:17). Tokni Lett okijto tlen kipia Biblia tlen uelis techpaleuis pampa kuali tiktekitiltiskej.

1. Tlen ika peua kipia 20 tlajtlanilmej uan kipia tlaxelolmej tlen monankiliaj ika tlen melauak tlamachtia Biblia, nin tlamantli itoka: “Introducción a la Palabra de Dios”.

2. Itech okseki tlamachtilmej A kijtoa seki tlamantli tlen kipia nin Biblia itech, ken omoijkuilo, tlajtolmej tlen axkan moajsikamatij uan motekitiltia itoka toTajtsin Dios.

3. Itech okseki tlamachtilmej B, tlen kipia 15 secciones, kipia mapas, diagramas uan tablas pampa ika timomachtiskej uan ika titlamachtiskej.

4. Kanin peua se amochtli tlen kipia Biblia, kipia tlajtolmej tlen achto omotokayotiayaj titulillos, tlapaleuia pampa okachi totoka tikajsiskej se tlaxelol. Nin tlamantli okipiaya achto Biblia.

5. Kipia se glosario kanin techiluia tlen kijtosneki seki tlajtolmej tlen motekitiltiaj itech Biblia.

6. Índice ayakmo okachi miakej tlajtolmej kipia. Axkan san kinpia tlajtolmej uan tlaxelolmej tlen okachi motekitiltiaj itech tetlapouilistli uan ijkuak titlamachtiaj.

7. Referencias tlen katej intlajkotia páginas noijki ayakmo okachi miakej. Axkan san kinpia tlen okachi motekitiltiaj itech tetlapouilistli.

8. Itech tlajtoli tlen kiualika tlakxitlan kinpia tlajtolmej tlen uelis tikintekitiltis.

Aplicación JW Library.

John Ekrann, akin poui itech akinmej tlayekanaj itech Betel itech Estados Unidos, okintekitilti celulares, tabletas uan computadoras pampa kiteititis aplicación JW Library. Nin aplicación kiteititia versión revisada de la Traducción del Nuevo Mundo ika tlajtoli inglés uan ok makuili Biblias. Itech tonal 7, metstli octubre, xiuitl 2013 opejki mokixtia nin aplicación itech Internet uan amo motlaxtlaua.

“Motlajtolkuepa iTlajtol toTajtsin Dios uan amo poliui tlen achto omoijkuilo.”

Tokni Anthony Morris, tlen poui itech Cuerpo Gobernante tlen kipiaj iTlaixpantijkauan Jehová, okijto okseki tlamantli tlen okinpaleui okichijkej Traducción del Nuevo Mundo. Okichijkej tlen kijtoa 1 Corintios 14:8, 9 pampa kichiuaskej inteki, akinmej okiyektlalijkej nin Biblia omochijchikajkej pampa kuali ma moajsikamati. Tla ijkuak motlajtolkuepa sejse tlajtoli amo moajsikamati noso ayakmo kijtoa tlen melauak, yejuan okitlaliayaj tlen kijtosneki non tlajtoli.

Se neskayotl, Génesis 31:20 omotlajtolkuepki sejse tlajtoli, kijtoa: “Jacob okichtekili iyolo Labán”. Pero ika tlajtoli Hebreo “okichtekili iyolo” kijtosneki okachi okatka ixtlamatki. Ik non, itech Traducción del Nuevo Mundo ika inglés kijtoa Jacob okachi okatka ixtlamatki. Noijki ijkon panoa ika 1 Corintios 7:39, tla ikaj kitlajtolkuepas sejse tlajtoli moajsikamati se siuatl tla inamik okochki uelis monamiktis iuan ikaj. Ualeua itech Biblia motekitiltia “kochilistli” pampa moijtos ikaj omikik, ik non, Traducción del Nuevo Mundo techpaleuia pampa kuali ma moajsikamati okochki itech mikilistli.

Tokni Morris okijto: “Biblia omotlajtolkuepki ika tlajtolmej amo oui kajsikamatiskej ken: tlajpixkej, akinmej tekiti itech tlali uan akinmej kinkitskiaj michimej. Pampa kuali okitlajtolkuepkej Biblia, kichiua okachi kuali ma kajsikamatikan tlaltikpaktlakamej akinmej yolyamankej, maski amo miak omomachtijkej.”

“Motekitiltiaj tlajtolmej tlen ajsi itech toyolo uan kijtoaj tlen melauak.”

David Splane, tlen poui itech Cuerpo Gobernante tlen kipiaj iTlaixpantijkauan Jehová, otlajto itech tlen kijtoa Eclesiastés 12:10. Akinmej okijkuilojkej Biblia okitlalijkej san tlen toTajtsin Dios okimilui, uan akinmej okichijkej Traducción del Nuevo Mundo noijki ijkon okichijkej inteki, omochijchikajkej pampa amo itlaj ma mopatla. Uan Traducción del Nuevo Mundo tlen okiyektlalijkej omochijchi ijkon kichiuaskej: “Okitekitiltijkej tlajtolmej tlen kijtoaj tlen melauak, uan kichiuaskej kuali ma moajsikamati iTlajtol toTajtsin Dios techiluis.

Tokni Splane okijto: “Miakej tlajtolmej ika inglés kijtosnekij miak tlamantli”. Se neskayotl, okijto tlen kijtoa Timoteo 1:13, nin tlaxelol tlajtoa itech “n kualitlájtoli non ne onimitsmachti”. Itech nin tlaxelol itech Traducción del Nuevo Mundo ika inglés okitekitiltiaya se tlajtoli (pattern) tlen noijki kijtosneki “itlaj kualtsin okichijchijkej”. Ik non, itech nin tlaxelol sekimej okajsikamatiayaj kijtosneki nochi tlen techmachtia Biblia. Pero tlen nikan kineki kijtos ken “itlaj tlen kuali kiteititia pampa mochiuas okse ijkon”. Ik non, itech Biblia tlen okiyektlalijkej kitekitiltiaj se tlajtoli (standar) tlen kiteititia ken itlaj tlen uelis ijkon kijtoskej, uan ika tlajtoli inglés kuali kiteititia tlen kinekij kijtos tlen achto omoijkuilo.

Tokni Splane okijto seki tlamantli tlen okipatlakej pampa kichiuaskej ken axkan tlajtoaj inglés. Se neskayotl, tlajtoli tlen okitekitiltiaya Traducción del Nuevo Mundo ika inglés pampa kijtoskej okipilojkej Jesús itech se kuauitl, omoajsikamatiaya ken okikalakilijkej se kuauitl itech itlalnakayo uan ika okipilojkej. Pero Jesús amo ijkon okimiktijkej, ik non, itech Biblia tlen okiyektlalijkej kijtoa okikalakilijkej clavos uan ijkon okipilojkej itech kuauitl (Mateo 27:22, 23, 31).

Saiktlami, ijkuak otlajtojtoka itech nin Biblia, tokni Splane okijto: “Timotlatlaujtia itech toTajtsin Dios pampa ijkuak nankitlajtoltiskej uan nanmomachtiskej ma namechpaleui pampa okachi kuali nanmouikaskej iuan toTajtsin Jehová, ijkon nochipa yetos namoTajtsin, namoDios uan namoyolikni”.

Saiktlami.

Tokni Pierce okijto nin Biblia tlen okiyektlalijkej ken tlakuali tlen okachi uelik tlen techmaka Jehová (Isaías 25:6). Uan pampa tlamiskej ika miak pakilistli nin nechikol, okinyole nochtin ma kitemokan tlakuikali 114, tlen itoka “El libro de Dios es un tesoro”.