ITlaixpantijkauan Jehová okinchijkej uejueyij nechikolmej itech ueyi altepetl Brasil, Costa Rica, Hong Kong, Irlanda, Israel, Nueva Zelanda uan Suecia. Achto ueyi nechikol omochi itech ueyi altepetl Suecia itech metstli julio, xiuitl 2012, uan saiktlami eyi uejueyij nechikolmej omochijkej itech metstli enero, xiuitl 2013 itech ueyi altepetl Costa Rica uan Nueva Zelanda.

Ijkon ken mochiuaj uejueyi nechikolmej sejse xiuitl, itech non motlapouiaj ika Biblia, kinpanoltiaj neskayomej uan tlamauisolmej.

Itech ninmej uejueyij nechikolmej tlen miak inpati okinyolejkej tlaltikpaktlakamej tlen chantij itech okseki uejueyij altepemej. Ijkuak ayamo peuaj uan ijkuak yotlankej nonmej uejueyij nechikolmej, okinuikakej ma paxialotij.

Se tokni siuatl tlen oyajki ueyi nechikol itech ueyi altepetl Brasil, okijto: “Sapanoa onechyolpakti nikinmitas tokniuan sapanoa techtlasojtlaj uan kuali otechselijkej. Nikita ken nikinpiaskia okseki nokalchanejkauan”.

Okse tokni siuatl tlen oyajki ueyi nechikol itech ueyi altepetl Hong Kong, okijto: “Sapanoa onechyolini nikitas ken oyolpaktokaj, oixuetskatokaj uan ochokatokaj ijkuak okinselijkej amatlajkuilolmej ika tlajtoli mandarín uan chikauak okinmonapaloltijkej”.

Sejse xiuitl, iTlaixpantijkauan Jehová kinchiuaj uejueyij nechikolmej itech nochi Tlaltikpak. Sapanoa miakej monechikoaj.

Itech ninmej uejueyij nechikolmej nochtin kiteititiaj tlasojtlalistli, yolpakij, uan kipiaj yolseuilistli iuan nochtin akinmej monechikoaj. Uan okachi ijkon mota itech uejueyij nechikolmej tlen miak inpati noso itech uejueyij nechikolmej internacionales. Nochtin akinmej monechikoaj motlapouiaj ika miak pakilistli, san sekan tlakuaj, itlaj kimotliokoliaj, kinmokixtiliaj tlaixkopinalmej uan monapaloaj ika miak tlasojtlalistli.

Ijkon ken mochiuaj okseki uejueyij nechikolmej, nochtin uelis tlakakitiuij maski sekimej amo iTlaixpantijkauan Jehová.