Itech 2014 Cuerpo Gobernante tlen kipiaj iTlaixpantijkauan Jehová, okijto motetlapouiskia kanin okachi uejka ik norte itech Europa uan Norteamérica (Hechos 1:8). Okijtojkej achto ma tetlapouikan itech Alaska (Estados Unidos), Laponia (Finlandia), Nunavut uan itech okseki altepetsitsintin tlen katej ik Noroeste itech (Canadá).

ITlaixpantijkauan Jehová miak xiuitl ompa oyayaj tetlapouitiuij. Pero amo uejkika ompa omokauayaj uan ualeua amo okintemakayaj amatlajkuilolmej.

Akinmej tekitij itech Betel itech nonmej altepemej kichiuaj ken kijtoa programa uan kinyoleuaj precursores ma mokauakan ompa kanaj eyi metstli. Tla sekimej kinekiskej momachtiskej, precursores uelis seki kauitl ompa mokauaskej uan uelis kinpanoltiskej nechikolmej.

Sapanoa oui ompa se chantis. Ome precursores tlen okintitlankej Barrow (Alaska), tlen se ochantiaya ik sur de California uan okse Georgia (Estados Unidos) uan itech inmialtepe tlatotonia. Uan itech Barrow sapanoa seua hasta kanaj 38 grados uan okixikojkej. Maski sapanoa oseuaya, amo miak metstli opanok yejuan okintlajpalojkej kanaj 95% tlaltikpaktlakamej uan opejki kinmachtiaj naui. Se telpochtli itoka John. Ye uan inovia momachtiaj ika amochtli ¿Tlen melauak tlamachtia Biblia? uan tlen momachtijtok John kintlapouia iyolikniuan uan akinmej inmiuan tekiti. Noijki kitlajtoltia itech iteléfono Amatlajkuilol tlen motlajtoltia mojmostla tlen kajki itech aplicación JW Library.

Amo onka carreteras hasta Rankin Inlet, ompa Nunavut (Canadá), se tokni uan isiua tlen tekitij ken precursores oyajkej itech avión hasta itech non altepetl uan opejki miakej kinmachtiaj. Se tlakatl ijkuak otlanki okitak video ¿Ken tikchiuaj tonechikoluan? otlajtlanki keman kichijchiuaskiaj se Kali kanin monechikoaj iTlaixpantijkauan Jehová. Uan okijto: “Tla ok nikan niyetos ijkuak nankichijchiuaskej, nias nechikolmej”.

Ome precursores tlen okintitlankej Savukoski (Finlandia) okijtojkej: “Sapanoa seua uan onka miak nieve”. Uan itech non altepetsintli okachi katej renos uan amo miakej tlaltikpaktlakamej. Pero kijtoaj precursores oajsitoj ijkuak okachi omonekiaya. ¿Tleka? Okijtojkej: “Nochtin kuali otikintlapouijkej. Noijki kachiuaj nieve itech carreteras uan kuali kinyektlaliaj para uelis panoskej tlen uejka yauij. Uan ken sapanoa seua, tlaltikpaktlakamej okachi katej inkalijtik”.

Ken timochijchikauaj titetlapouitiuij kanin sapanoa uejka ik norte, sekimej kinekij kimatiskej tlen titetlapouiaj. Se tonal okitlajpalotoj se siuatl tlen okatka alcalde itech se altepetsintli tlen kajki Alaska. Uan nin siuatl itlaj kualtsin okijkuilo itech Internet itech iTlaixpantijkauan Jehová uan okitlali itlaixkopinal amatsintli tlen itoka ¿Tlen iTekiuajkayo toTajtsin Dios?

Itech Haines (Alaska), ome precursores okipanoltijkej se nechikol itech se biblioteca uan omonechikojkej chikueyi. Uan itech periódico okijtojkej ome tlakamej tlen ualeuaj Texas uan Carolina del Norte kijtoaj uelis mitsmachtitiuij mokalijtik. Uan saiktlami okijtojkej: “Tla tikneki tikmatis okachi, xikalaki itech jw.org”.