Itech Estados Unidos miakej mokuayejyekoaj tlen tlajtoaj okse tlajtoli uejka chantij. Pero kanaj 70% chantij itech altepemej tlen pouij Estados Unidos. Nueva York se altepetl tlen okachi ueyi itech Estados Unidos uan katej sekimej tlaltikpaktlakamej tlen tlajtoaj okseki tlajtolmej, yejuan okichijkej se iluitl itech 5 al 7 de junio 2015 se iluitl tlen itoka powwow noso “Gateway to Nations” (Puerta a las Naciones). Ijkuak iTlaixpantijkauan Jehová tlen chantij Nueva York okimatkej yetoskia se iluitl, san niman omoyektlalijkej para yaskej. ¿Tleka ijkon okichijkej?

ITlaixpantijkauan Jehová kintlajtolkuepaj amatlajkuilolmej ika miakej tlajtolmej. Seki tlajtolmej intoka: cree de las llanuras, dakota, hopí, mohaqués, navajo, odawa uan piesnegros. Ik non, iTlaixpantijkauan Jehová okintlalijkej amatlajkuilolmej uan noijki okitlalijkej se amatsintli tlen itoka Usted puede confiar en el Creador.

Página oficial tlen tikpiaj itech Internet kinpia miakej grabaciones ika tlajtolmej tlen yomoijtojkej. Uan iTlaixpantijkauan Jehová okintlalijkej grabaciones para ma kikakikan akinmej omotokiayaj para kitaskej tlen amatlajkuilolmej ompa okinpiayaj. Porque yejuan okitakej nochi tlen ompa okichijkej oijkuilitoka ika inglés noso español.

Miakej okintlajtlachialti tlen tikchiuaj para tikintlajtolkuepaskej amatlajkuilolmej ika miakej tlajtolmej uan ken titlamachtiaj ika Biblia itech nochi altepemej. Ijkuak se tlakatl tlen otekitik itech iluitl okimatki tlen tikchiuaj, okijto ma tikmachtitij uan okijto: “Melauak nikneki xinechtlajpalotij uan nikneki nimomachtis Biblia”.

Se tlakatl uan isiua omotokijkej kanin okatkaj amatlajkuilolmej pero yejuan amo otlakakiayaj, ik non, iTlaixpantijkauan Jehová tlen ompa okatkaj amo ueli inmiuan omotlapouijkej. Pero satepan oejkok se iTlaixpantijka Jehová tlen kimati señas. Uan ye inmiuan omotlapoui kanaj tlajko hora uan okinmilui kanin mochiuaskia ueyi nechikol ika señas tlen amo uejka mochiuaskia.

Kanaj cincuenta iTlaixpantijkauan Jehová otetlapouijkej itech non iluitl tlen uejka eyi tonal. Okinmakakej kanaj ciento cincuenta amatlajkuilolmej akinmej omotokijkej kanin okatkaj amatlajkuilolmej.