Itech metstli julio, xiuitl 2013, kanaj 28 iTlaixpantijkauan Jehová tlen chantij itech altepetl Brasil okiskej itech se altepetsintli tlen itoka São Félix do Xingú uan oyajkej okinmitatoj sekimej tlaltikpaktlakamej akinmej kinmixmatij ken cayapós uan yurunas. Oyajkej itech aueyatl Xingú itech se barco tlen ueyi kanaj 15 metros. Nin aueyatl ueyak kanaj 2,000 kilómetros, yaui ik norte uan ajsi itech aueyatl Amazonas.

Oyajkej pampa kintlapouiskej iTlajtol toTajtsin Dios akinmej chantij itempa aueyatl. Ijkuak yikipiaj eyi tonal, oajsito itech se altepetsintli tlen itoka Kokraimoro, uan kuali okinselijkej. Ijkuak se siuatl okinmitak opejki kinnotsa ika miak pakilistli. Se tlakatl tlen ompa ichan tlen okinyekanaya okinmilui akinmej tetlapouiaj, non siuatl okinekiaya kinmiluis: “¡Xiuikikan! ¡Tiknekij timechixmatiskej!”.

ITlaixpantijkauan Jehová okinmachtijkej nochtin tlaltikpaktlakamej: sekimej ika tlajtoli portugués, ika señas uan ika tlaixkopinalmej tlen okinpiayaj amatlajkuilolmej tlen okinmakayaj. Akinmej ompa chantij okinselijkej amatlajkuilolmej. Amatlajkuilol Xikaki toTajtsin Dios okachi okinpakti.

Gerson, tlen tekiti ken precursor especial itech altepetsintli São Félix do Xingú, kijtoa tlen okichi se tlakatl ijkuak okiseli amochtli Noamoch tlen nechtlapouia itech Biblia: “Ijkuak okitak nin amochtli, okikitski ika ome imauan. Amo okinek kikauas”.

ITlaixpantijkauan Jehová okintemakakej kanaj quinientos amochmej, amatlajkuilolmej uan revistas ijkuak okintlapouitoj ninmej tlaltikpaktlakamej tlen chanti itempa aueyatl. Akinmej chantij itech Kawatire, sapanoa okinpakti ijkuak okinmachtijkej Tlaltikpak mochiuas se kuajkualtsin Xochitlali. Tonjaikwa okijto: “Itech Xochitlali tlaltikpaktlakamej chantiskej ken tejuan”.

Miakej tlen chantij itech São Félix do Xingú okimatkej iTlaixpantijkauan Jehová yaskiaj kanin yejuan chantij. Simone, se akin otetlapouito, okijto omokuayejyeko amo kinkauaskiaj ompa ma tetlapouikan. Pero amo itlaj okijtojkej. Simone kijtoa: “Kuali otechselijkej uan kuali inmiuan otimotlapouijkej”.