Itech Canadá tlajtoaj kanaj 60 tlajtolmej uan kanaj 213,000 tlen ompa chantij kimatij se tlajtoli desde oneskej.

Miakej iTlaixpantijkauan Jehová omomachtijkej kanaj se tlajtoli para iTlajtol toTajtsin Dios ma ajsi itech inyolo tlaltikpaktlakamej. Itlamian 2015 kanaj 250 iTlaixpantijkauan Jehová otlamachtijkej itech tlajtolmej tlen tlajtoaj itech non altepetl.

Noijki iTlaixpantijkauan Jehová yokintlajtolkuepkej miakej amatlajkuilolmej uan seki videos ika chikueyi tlajtolmej tlen tlajtoaj itech Canadá: algonquino, cree de las llanuras, cree de los pantanos occidental, inuktitut, mohaqués, odawa, oyibua septentrional (norteño) uan pies negros. a

Akinmej momachtiaj se tlajtoli kijtoaj sapanoa oui. Carma kijtoa: “Ijkuak opejki nikinpaleuia akinmej tlajtolkuepaj ika tlajtoli piesnegros, onikmachili sapanoa oui, amo onikixmatiaya tlajtoli, amo onikmatiaya niktlajtoltis nion onikinmixmatiaya sonidos”.

Terence akin kinpaleuia akinmej tlajtolkuepaj ika tlajtoli cree de los pantanos occidental, kijtoa: “Miakej tlajtolmej kipiaj miakej letras uan oui nikintlajtoltis”. Daniel akin tekiti ken precursor itech isla de Manitoulin (Ontario), kijtoa: “Amo tikinpiaj miakej amochmej itech non tlajtoli. Para nimomachtis odawa moneki nikiluis ikaj akin yikipia miak xiuitl ma nechmachti”.

¿Miak ipati mochijchikauaskej? Se siuatl oyibua okijto tlen kichiuaj iTlaixpantijkauan Jehová amo kichiuaj okseki tlaneltokalismej. Okijto kuali kinkakij iTlaixpantijkauan Jehová tla kintlajtoltiliaj tlaxelolmej itech Biblia ika tlajtoli oyibua.

Bert akin tlajtolkuepa uan omoskalti itech tribu blood (Alberta), kijtoa: “Yonikinmitak miakej akinmej tlajtoaj piesnegros ijkuak kiseliaj se amatlajkuilol kijtoaj: ‘¡Nin notlajtol, nin onechijkuililijkej!’. Miak uelta chokaj ijkuak kitaj se video ika intlajtol”.

Se siuatl tlen tlajtoa cree de las llanuras omotlasojkamatki miak ijkuak okitak se video ika itlajtol tlen itoka ¿Tleka moneki timomachtis Biblia? Okijto yetoskia ken inantsin kitlapouiskia.

Miakej iTlaixpantijkauan Jehová mochijchikauaj yaskej kintlapouitiuij kuali tlajtolmej tlen kitemaka Biblia akinmej tlajtoaj okse tlajtoli. Terence uan isiua tlen itoka Orlean, kilnamikij ijkuak otetlapouitoj. Yejuan kijtoaj: “Otiajkej san sekan itech miakej carros, otiuejkajkej kanaj doce horas itech carreteras kanin tlaseuetsi para uelis titetlapouiskej itech Little Grand Rapids. Uan kuali otechkakej”.

Sekimej ochantitoj amo uejka itech nonmej altepetsitsintin. Daniel uan isiua tlen itoka LeeAnn ijkuak otetlapouijkej eyi metstli itech se altepetl, okijtojkej ompa chantitiuij. Daniel kijtoa miak ipati ma timajxilikan para yejuan ma techixmatikan uan ijkon kinekiskej momachtiskej.

¿Tleka iTlaixpantijkauan Jehová mochijchikauaj kintlapouiskej akinmej tlajtoaj okseki tlajtolmej? Isiua Bert tlen itoka Rose kijtoa: “Nikneki nikinpaleuis oksekimej porque ne noijki nitlajtoa se tlajtoli uan kuali nikmati techpaleuia miak ijkuak timoyekanaj ika principios tlen katej itech Biblia”.

Orlean kijtoa: “Nikneki akinmej tlajtoaj cree de las llanuras ma kikauilikan ma kinyekana toTajtsin Dios. Niyolpaki nikinpaleuis oksekimej ma mouikakan iuan Jehová uan ma kixnamikikan ouijkayotl tlen axkan kipiaj”.

Marc tekiti iuan akinmej tlajtolkuepaj ika tlajtoli piesnegros. ¿Tleka mochijchikaua tetlapouis kanin ye chantij? Ye okijto: “Porque melauak nikintlasojtla”.