Itech metstli julio, xiuitl 2009, iTlaixpantijkauan Jehová okikojkej se ueyi tlali tlen kipia 102 hectáreas itech altepetl Nueva York, pampa ompa kichijchiuaskej kali kanin tekitij. Non tlali kajki 80 kilómetros ik noroeste itech altepetl Brooklyn, kanin kajki kali kanin tekitij iTlaixpantijkauan Jehová tlen opejkej itech xiuitl 1909.

Itech nin kali tlen kichijchiuaskej, chantiskej uan tekitiskej kanaj ochocientos iTlaixpantijkauan Jehová. Mochijchiuas se kali pampa oficinas, uan okse de servicios uan naui pampa chantiskej. Noijki kichijchiuaskej se museo tlen kiteititis ken opejkej iTlaixpantijkauan Jehová.

Motekitiltiskej kanaj 18 hectáreas pampa ijkon mochijchiuas, uan amo kintekiskej kuajmej uan kimaluiskej atl tlen kajki. Okachi kuali, kitaskej ken kichijchiuaskej kali pampa amo nochi kikixtiskej tlen toktok.

Sekimej tokniuan tlen ixtlamatkej uan kimatij ken kinchijchiuaskej kalmej, okijkuilojkej ken kichijchiuaskej kali pampa okachi kimaluiskej electricidad uan tlen kitekitiltiskej. Ik non, amo okachi kipojpoloskej tlen kajki uan amo sapanoa patio kisas. Se neskayotl, ikuapak kali kitokaskej seki xiuitl pampa kichichinas atl ijkuak kiauis uan kichiuas amo sapanoa ma tlatotonia nion ma seua ijtik kali. Uan itech oficinas okachi kitekitiltiskej itlauil tonaltsin. Noijki, kimaluiskej atl.

¿Tleka kinekij oksekan kichijchiuaskej kali kanin tekitij? Itech Kali kanin tekitij iTlaixpantijkauan Jehová itech altepetl Brooklyn okinchijchiuayaj Biblias uan okintitlaniayaj itech nochi Tlaltikpak. Axkan okseki kalmej kanin tekitij iTlaixpantijkauan Jehová itech okseki altepemej noijki kichiuaj nin tekitl. Uan itech xiuitl 2004 itech altepetl Wallkill (Nueva York), tlen mokaua kanaj 150 kilómetros ik noroeste de Brooklyn, opejkej kinchijchiuaj uan kintitlanij amatlajkuilolmej.

Noijki omokuayejyekojkej itech tomin tlen kitekitiltiaj pampa kiyektlaliskej kali. Ik non, ijkuak panoskej itech okse kali, okachi kuali kitekitiltiskej tomin pampa tlapaleuiskej ma motetlapoui kuali tlajtolmej.

Achto kuali kitaskej ken kajki tlali uan nochi tlen kipia, uan kintlajtlaniliskej tekiuajkej ma kinkauilikan kichijchiuaskej kali. Tla nochi kuali kisa, peuaskej kichijchiuaskej nin kali itech xiuitl 2013 uan kitlamiskej san itech naui xiuitl.

ITlaixpantijkauan Jehová kipiaj se imprenta itech altepetl Wallkill, uan noijki kanin momachtiaj itech altepetl Patterson (Nueva York), uan okseki kalmej itech miakej altepemej. Katej kanaj siete millones y medio iTlaixpantijkauan Jehová.