Itech ueyi altepetl Estados Unidos, iTlaixpantijkauan Jehová kinchijchijtokej kalmej itech altepetl Wallkill uan Warwick pampa sapanoa mochijchikauaj tekitij tokniuan tlen uitsej itech miakej altepemej.

Wallkill (Nueva York). Itech nin kali chantiskej kanaj 1,600 iTlaixpantijkauan Jehová pampa kinchijchiuaskej amatlajkuilolmej tlen kintekitiltiskej itech ueyi altepetl Estados Unidos. Pampa mochiua tekitl itech altepetl Wallkill, akinmej nikan tekititokej —noijki miakej tlen tlapaleuitiuij— kichijchiuaskej se kali ika eyi pisos, kanin mokauaskej carros uan okse kali ika eyi pisos kanin chantiskej akinmej ompa tekitiskej. Itech xiuitl 2012, okichijchijkej se kali kanin kintlaliskej teposmej uan kali kanin tlakuaj okiueyitilijkej pampa akiskej ok 200 tlaltikpaktlakamej.

ITlaixpantijkauan Jehová noijki kinpiaj okseki kalmej kanin kiyekanaj tekitl tlen kichiua itech okseki uejueyi altepemej ken Brasil, Alemania uan México. Uan itech ueyi altepetl Estados Unidos noijki kipiaj se kali kanin momachtiaj itech altepetl Patterson, uan kinpiaj oficinas itech altepetl Brooklyn (Nueva York). Ijkuak tlamis kichijchiuaskej non kali itech altepetl Wallkill, nin yetos tlen okachi ueyi kali tlen kinpiaj iTlaixpantijkauan Jehová itech nochi Tlaltikpak.

Warwick (Nueva York). Nikan kichijchiuaskej kali kanin kinyekanaskej iTlaixpantijkauan Jehová itech nochi Tlaltikpak. Kalmej tlen ompa okatkaj yokinxixinijkej. Noijki iTlaixpantijkauan Jehová okikojkej se tlali tlen kajki 10 kilómetros itech altepetl Tuxedo (Nueva York), pampa ompa kintlaliskej teposmej uan nochi tlen kitekitiltiaj. Tekiuajkej okiselijkej ijkon ma kichiuakan maski kikixtiskej seki tlamantli tlen ompa kajki. Uan ijkuak kiseliskej ken kinekij kichijchiuaskej, niman peuaskej tekitiskej. Axkan iTlaixpantijkauan Jehová ok tekitij itech altepetl Brooklyn pampa kiyekantoskej tekitl tlen kichiuaj itech nochi Tlaltikpak.