Itech 28 xiuitl tlen yopanok, kanaj 11,000 iTlaixpantijkauan Jehová okikajtejkej inkalijtik, sekimej inmialtepe, pampa tlapaleuiskej kinchijchiuaskej kalmej itech 120 altepemej. Nochtin sapanoa yolpakij pampa mochijchikauaj tekitiskej maski amo kintlaxtlauiaj.

Yejuan kimotlaxtlauiliaj nochi tlen moneki pampa tlapaleuitiuij. Sekimej, ijkuak moseuiaj itech inteki, noijki tlalpaleuitiuij. Oksekimej kitlajtlanij seki tonalmej pampa amo tekitiskej, uan ijkon tlapaleuiskej, maski amo itlaj kitlaniskej.

Amo ikaj kinchiualtia ma kichiuakan non tlamantli, okachi kuali, ika nochi inyolo kinekij tlapaleuiskej okachi ma motetlapoui kuali tlajtolmej itech Tekiuajkayotl (Mateo 24:14). Ninmej iTlaixpantijkauan Jehová kinchijchiuaj uejueyij kalmej, oficinas uan kalmej kanin kinchijchiuaskej Biblias uan okseki amatlajkuilolmej. Noijki kinchijchiuaj Kalmej kanin mochiuaj uejueyij nechikolmej kanin uelis monechikoskej hasta kanaj 10,000 tlaltikpaktlakamej, uan Kalmej kanin monechikoaj pampa kanaj 300 tlaltikpaktlakamej.

Uan nin tekitl ok mochijtok. Ijkuak ninmej tokniuan peuaskej tekitiskej itech se altepetl, Kali kanin kinyekanaj iTlaixpantijkauan Jehová itech non altepetl kinmaka kanin mokalotiskej, tlen kikuaskej, kintlapakia uan kinmaka nochi tlen kinpoloa. Oksekimej iTlaixpantijkauan Jehová tlen chantij itech non altepetl tlapaleuiaj itech non tekitl ika miak pakilistli.

Itech xiuitl 1985 okitlalijkej se tlamantli pampa okachi kuali kichiuaskej uan kiyekanaskej nin tekitl. Pampa uelis tlapaleuiskej, nochtin iTlaixpantijkauan Jehová moneki kipiaskej kanaj 19 hasta 55 xiuitl uan kimatiskej ken mochijchiuaj kalmej. Ika nin tlamantli, akinmej kinekij tlapaleuiskej uelis tekitiskej kanaj ome semanas uan hasta eyi metstli, ualeua sekimej tlapaleuiaj kanaj se xiuitl noso okachi.

Sekimej tlakamej insiua ayamo kimatij ken tekitiskej, ik non, kinmachtiaj ken kilpiskej varillas ika alambre, ken kitlaliskej azulejo, itlaj kichichikiskej ika lija noso ken kitlapalotiskej kali. Uan sekimej tlakualchiuaj noso tlachipauaj kanin moseuiaj.

Ijkuak ninmej tokniuan mokuepaj inkalijtik, sapanoa kitlasojkamatij pampa okinyolejkej ma tlapaleuikan itech non tekitl. Se namiktilistli okijkuilo: “Tiknekij timechtlasojkamatiliskej nin tlateochiualistli pampa otitlapaleuijkej ma mochijchiua Kali kanin tekitiskej iTlaixpantijkauan Jehová itech ueyi altepetl Budapest. Tokniuan tlen chantij itech ueyi altepetl Hungría sapanoa tetlasojtlaj uan tepatioitaj. Otechyolkoko tikinmiluiskej yitiauij pampa inmiuan otitekitikej se metstli. Nochipa ijkon tikmachiliaj. Pero tiknekij oksepa timokuepaskej itech primavera. Ijkuak titlapaleuiaj itech se tekitl ken nin, tikmachiliaj non metstli okachi kuali itech tonemilis”.