Itech ueyi altepetl España, iTlaixpantijkauan Jehová kinmachtiaj ika Biblia kanaj 600 tlaltikpaktlakamej tlen tsaktokej itech 68 telpiloyan.

Ijkon kichiua se iTlaixpantijka Jehová tlen itoka Miguel, ye otsaktoka 12 xiuitl ijkuak ayamo omomachtiaya Biblia. Axkan yauij itech telpiloyan sejse semana. ¿Tleka ijkon kichiua? Pampa kinpaleuis oksekimej ma kipatlakan innemilis ken ye okichi.

Yikipia chikueyi xiuitl Miguel kinmachtia ika Biblia akinmej tsaktokej, ye kijtoa: “Nechyolpaktia nikinpaleuis akinmej tsaktokej kanin noijki ne onitsaktoka. Niyolpaki miak ijkuak nikita nonmej tlaltikpaktlakamej mochijchikauaj pampa ayakmo kichiuaskej tlen amo kuali”.

Ijkuak Miguel okipiaya naui xiuitl, omikik itajtsin pampa okikuitikis se carro, pampa akin okiuikaya otlauanki miak. Inantsin iselti omoka, ik non, ye omonekiaya sapanoa tekitis pampa kipiaskej tlen ika mopanoltiskej.

Miguel uan iikni, akin okachi yiueyi, ayakmo oyayaj momachtitiuij uan opejkej tlachtekij tekalijtik uan itech carros. San okipiaya 12 xiuitl uan Miguel yokatka se tlakatl sapanoa amo yolkuali. Ijkuak okipiaya 15 xiuitl sapanoa yokipiaya tomin pampa okinemakaya droga. Sapanoa okitekitiltiaya cocaína uan heroína, ik non, okachi otlachtekiaya pampa uelis kikouas. Ijkuak yokipiaya 16 xiuitl, okitsakej itech telpiloyan, pero san omochi okachi amo yolkuali. Miguel kijtoa: “Yonikmatiaya se tonal uelis nimikis itech telpiloyan noso nechmiktis drogas tlen nikintekitiltia, onikmachiliaya ayakmo ueli nikkauas”.

Pero itech xiuitl 1994, se iyolikni Miguel okilui se iTlaixpantijka Jehová ma kijkuilo uan ma kititlanili se amatlajkuilol itech telpiloyan. Ika non amatlajkuilol Miguel omomachti toTajtsin Dios kineki kichiuas se Xochitlali nin Tlaltikpak. Okiyolchika ma kipatla inemilis pampa uelis kiselis non tlateochiualistli. Miguel okijto: “Oajsik itech noyolo non amatlajkuilol, itech non tonal nochi omopatlak, uan onikijto nimomachtis Biblia, maski onikmatiaya oui nikchiuaskia”.

Oui kichiuiliskia pampa okitekitiltiaya droga uan otlachichinaya, uan itech telpiloyan okatka miak tlamantli. Uan akin iuan otsaktoka mojmostla okinekiaya kimakas droga. Ik non, Miguel nochipa okitlatlaujtiaya toTajtsin Dios ma kiyolchikaua pampa kikauas non, saiktlami okika.

Opanok eyi metstli, uan Miguel opejki kintlapouia tlen momachtijtok akinmej noijki tsaktokej. Uan opanok se xiuitl, okiski itech telpiloyan uan omoapolakti ken se iTlaixpantijka Jehová. Satepan, yomonamiktiskia, pero okipanok se ouijkayotl. San opoliuiaya se metstli pampa monamiktis, uan tekiuajkej okinotskej Miguel pampa okichi seki tlamantli yiuejkika uan okijtojkej kitsakuaskej majtlaktli xiuitl. Pero opanok san eyi xiuitl uan tlajko uan Miguel okiski itech telpiloyan pampa okiteititiaya kuali iyelis. Saiktlami, omonamikti. Miguel ayakmo keman okichi tlen achto okichiuaya.