ITlaixpantijkauan Jehová timochijchikauaj tofamilia uan noijki okseki familias san sekan mayetokan. Kuali tikmatokej Jehová okintlali familias ikinon tikpatioitaj (Génesis 2:21-24; Efesios 3:14, 15). Itech Biblia tikinmajsij principios bíblicos tlen kinpaleuia akinmej yomonamiktijkej mayolpakikan uan kichiua kuali mamouikakan.

 Timochijchikauaj tiktlakamatiskej tlen techmachtia Biblia, tlen techpaleuia matiyetokan kuali iuan akin yotimonamiktijkej uan matiyetokan okachi kuali tetajmej (Proverbios 31:10-31; Efesios 5:22–6:4; 1 Timoteo 5:8). Biblia noijki kinyolchikaua familias maski kipiaj okse religión (1 Pedro 3:1, 2). Matikitakan tlen okijtojkej sekimej ijkuak innamik opejki momachtia iuan iTlaixpantijkauan Jehová:

•   “Itech chikuase xiuitl nochipa san otimokualaniayaj uan san otimoyolkokouayaj. Pero ijkuak Ivete omochi iTlaixpantijka Jehová, opejki okachi tetlasojtla uan kimati mochias non okichi kuali matimouikakan.” (Clauir, de Brasil)

•   “Ijkuak nonamik Chansa opejki momachtia iuan iTlaixpantijkauan Jehová, ne amo onikkauili mamomachti, onimokuayejyekouaya iTlaixpantijkauan Jehová san kinxelouaj familias. Pero satepan onikajsikamatki Biblia melauak techpaleuia.” (Agness, de Zambia)

 Ijkuak titetlapouiaj, tikinmachtiaj oksekimej ken Biblia kinpaleuia familias:

•   Kuali tikpejpenas akin iuan timonamiktis

•   Nankiyektlaliskej ouijkayotl ijkuak yikin nankipiaj se xiuitl onanmonamiktijkej

•   Kuali nanmouikaskej iuan namomontajuan

•   Ken nankitekitiltiskej tomin

•   Ayakmo ximokualanikan

•   Ximotlapojpoluikan

•   Ken nankinmachtiskej namokoneuan

 Kema ijkon panoua, itech xiuitl 1998 se empresa tlen itoka Sofres okijto se itech 20 akinmej yomonamiktijkej, okipixki ouijkayotl ijkuak omochi iTlaixpantijka Jehová.

 Jesús okijto akinmej mochiuaskiaj imachtijkauan kipiaskiaj ouijkayotl tlen ualaskia itech infamilia (Mateo 10:32-36). Se tlakatl tlen itoka Will Durant okijto itech imperio romano, “akinmej okichiuayaj ken Cristo okintlajtlakoltiayaj okinxelouayaj familias”. a Axkan noijki kijtouaj iTlaixpantijkauan Jehová kinxelouaj familias. Pero ¿melauak iTlaixpantijkauan Jehová kinxelouaj familias?

 Ijkuak okijtojkej iTlaixpantijkauan Jehová kinxelouaj familias, Tribunal Europeo de Derechos Humanos okijto akinmej amo iTlaixpantijkauan Jehová amo “kiseliaj uan amo kitlakaitaj inreligión tlen kipiaj familias nion makichiuakan ken moneki” ikinon peua mokualaniaj. Noijki okijto: “Nochtin familias kipiaj nin ouijkayotl maski amo iTlaixpantijkauan Jehová”. b Uan maski amo nochtin kiseliaj toreligión, tiiTlaixpantijkauan Jehová timochijchikauaj tikchiuaskej tlen kijtoua nin tlanauatil: “Tla aka nomechtoktia itla amokuali, nomejwah amo xikmokopilikah, [...] asta kan weletis, nomejwah xiktemolikah kenijki nonmoyekwikaskeh ika yolsewílistli iwan nochteh” (Romanos 12:17, 18).

 ITlaixpantijkauan Jehová tiktlakamatij tlanauatil tlen kijtoua san ximonamikti iuan “non kineltoka Toteko Dios”, kijtosneki akin noijki tlaneltoka ken tejuan (1 Corintios 7:39). Nin tlanauatil melauak techpaleuia. Se neskayotl, itech xiuitl 2010 revista Journal of Marriage and Family okijto “tla akinmej yomonamiktijkej kipiaj san se religión uan kichiuaj san se tlamantli” okachi kuali mouikaj. c

 ITlaixpantijkauan Jehová amo kinmiluiaj oksekimej inmikniuan mamoxelokan tla innamik amo iTlaixpantijka Jehová. Biblia kijtoua: “Tla se tokni kipia isiwa amo tlaneltokak, pero isiwa kineki yetos íwa, non tokni amo makikajkawa isiwa. Iwa tla se siwatl kipia iokich amo tlaneltokak, iwa ye kineki yetos íwa, amo makikajkawa iokich” (1 Corintios 7:12, 13). ITlaixpantijkauan Jehová tiktlakamatij nin tlanauatil.