Tlen kijtouaj: ITlaixpantijkauan Jehová amo kinekij mopajtiskej porque kijtouaj pajtli amo kinpaleuia.

 Tlen melauak: ITlaixpantijkauan Jehová timochijchikauaj tiktemoskej tlen okachi techpajtis. Ijkuak se tofamiliar noso ikaj mokokoua uan moneki kichiuiliskej se operación, timotlapouiaj iuan akinmej tlapajtiaj tlen amo kitekitiltiaj estli. Uan melauak tikintlasojkamatiliaj porque axkan yokichijkej miak tlamantli tlen ika tlapajtiskej. Uan tlamantli tlen kitekitiltiaj tlen ika kinpajtiskej iTlaixpantijkauan Jehová para amo kintlaliliskej estli, noijki kitekitiltiaj iuan oksekimej itech miakej altepemej. Axkan miakej uelis kipejpenaskej okseki tlamantli tlen ika kinpajtiskej para amo kinmajsis se kokolistli tlen uelis kipias estli, noso porque motlapololtiaj akinmej tlapajtiaj.

 Tlen kijtouaj: ITlaixpantijkauan Jehová mopajtiaj ika intlaneltokilis.

 Tlen melauak: Tejuan amo keman timopajtiaj ika totlaneltokilis.

 Tlen kijtouaj: Sapanoua patio kisa timopajtiskej kanin amo tikmotlaliliskej estli.

 Tlen melauak: Amo patio kisa ijkuak ikaj mopajtia uan amo kitekitiltia estli. a

 Tlen kijtouaj: Sejse xiuitl miakej iTlaixpantijkauan Jehová uan noijki konemej ixpoliuij porque amo kintlaliliaj estli.

 Tlen melauak: Tlen kijtouaj amo melauak. Axkan cirujanos kinchiuaj operaciones tlen melauak oui —ken operaciones ortopédicas, itech inyolo uan ijkuak kinpatiliaj órganos— uan amo kitekitiltiaj estli. b Akinmej amo kintlaliliaj estli noijki pajtij noso okachi totoka ken akinmej kintlaliliaj, noijki ijkon panoua ika konemej. c Uan noijki amo ikaj uelis kijtos tla ikaj kiselis estli uelis mikis noso pajtis.

 Por tlen tikneltokaj, uan amo por akinmej tlapajtiaj. Itech Biblia techiluia amo matiktekitiltikan estli, ijkon kijtoua Antiguo uan Nuevo Testamento (Génesis 9:4; Levítico 17:10; Deuteronomio 12:23; Hechos 15:28, 29). Uan noijki toTajtsin Dios kita estli ken yolilistli (Levítico 17:14). Ikinon iTlaixpantijkauan Jehová amo tikmotlaliliaj estli porque tiktlakamatij Biblia, uan ijkon tiktlakaitaj toTajtsin Dios akin otechmakak toyolilis.

 Yiuejkika akinmej otlapajtiayaj okijtouayaj tla ikaj amo okinekiaya makitlalilikan estli, amo uelis kipajtiskiaj, uan akinmej amo okimotlaliliayaj estli okinmiluiayaj okinekiayaj momiktiskej. Pero axkan okse tlamantli mokuayejyekouaj. Se neskayotl, itech xiuitl 2004 itech se revista de medicina omoijto: “Miak tlamantli tlen ika kinpajtiaj iTlaixpantijkauan Jehová satepan ika kinpajtiskej nochtin”. d Uan itech xiuitl 2010, amochtli Medicina transfusional okijto tla ijkon tlapajtiskej “satepan ‘cirugía sin sangre’ nochipa kichiuaskej ken ijkuak kinpajtiaj uan amo moneki mokauaskej itech hospital”.

 Itech nochi tlaltikpak, miakej akinmej tlapajtiaj, kintekitiltiaj teposmej para amo kipoloskej miak estli, maski melauak oui tlen kichiuaskej. Nochi nin yimochijtok itech miakej altepemej, uan miakej maski amo iTlaixpantijkauan Jehová, noijki kiselijtokej.