Amo. ITlaixpantijkauan Jehová tikchiuaj ken Cristo, pero amo tiprotestantes.

 Miakej kijtouaj iglesias protestantes okixtopejkej tlen tlamachtia Iglesia Católica Romana. Maski iTlaixpantijkauan Jehová tikinmixtopeuaj miakej itlamachtiluan Iglesia Católica, amo tiprotestantes. Matikitakan ome tlamantli tlen ijkon kiteititia.

1.   Miakej intlamachtiluan protestantes kixnamikij tlen tlamachtia Biblia. Pero Biblia amo kijtoua toTajtsin Dios se Trinidad, kijtoua “sanwel onka se Dios” (1 Timoteo 2:5; Juan 14:28). Noijki Biblia amo tlamachtia toTajtsin Dios kintlajyouiltia ijtik tlitl akinmej amo yolkualmej, san kijtoua sepa kinmixpolos (Salmo 37:9; 2 Tesalonicenses 1:9).

2.   Amo tiknekij tikpatlaskej Iglesia Católica nion okse religión. Okachi kuali, tiknekij tiktematiltiskej kuali tlajtoli itech iTekiuajkayo toTajtsin Dios uan titlapaleuiskej makineltokakan non kuali tlajtoli (Mateo 24:14; 28:19, 20). Amo tiknekij tikpatlaskej nion se religión, tiknekij titlamachtiskej tlen melauak itech toTajtsin Dios uan itech iTlajtol (Colosenses 1:9, 10; 2 Timoteo 2:24, 25).