ITlaixpantijkauan Jehová yokintekitiltijkej tlatlamantli Biblias para momachtiskej. Pero melauak kipatioitaj Traducción del Nuevo Mundo, tlen onka ika miakej tlajtolmej, porque kitekitiltia itoka toTajtsin Dios, kijtoua tlen melauak uan kuali moajsikamati.

•   Kitekitiltia itoka toTajtsin Dios. Amo nochtin tlen kinchiuaj Biblias kitlakaitaj akin iaxka Biblia. Se traducción kijtoua intoka kanaj setenta tlen otlapaleuijkej mamochiua, pero amo keman kijtoua itoka akin iaxka: Jehová.

   Uan itech Traducción del Nuevo Mundo ijkuilitok itoka toTajtsin Dios ijkon ken itech tlajkuilolmej tlen yiuejkika omoijkuilojkej uan amo kijtoua intoka akinmej okitlajtolkopkej.

•   Melauak tlen kijtoua. Seki Biblias amo ajsitok noso amo kuali okintlajtolkopkej ken achto omoijkuilo. Se neskayotl, se Biblia kitlajtolkopa Mateo 7:13 ijkin: “Xikalakikan itech kaltlatsakuil pitsauak, porque patlauak kaltlatsakuil uan ojtli tlen teuikaj ijtik tlitl”. Pero itech tlajkuilolmej tlen yiuejkika omoijkuilojkej amo kijtoua “ijtik tlitl”, kijtoua “kinmixpoloskej”. Uelis akinmej otlajtolkopkej okineltokayaj akinmej amo yolkualmej kintlajyouiltiskiaj ijtik tlitl. Pero Biblia amo ijkon tlamachtia, ikinon Traducción del Nuevo Mundo kijtoua “kinmixpoloskej” ijkon ken kijtoua itech tlajkuilolmej tlen yiuejkika omoijkuilojkej.

•   Kuali moajsikamati. Tikmatij se kuali traducción moneki yetos ajsitok noso kuali motlajtolkopas, noijki moneki kuali moajsikamatis. Miakej Biblias kitlajtolkopaj Mateo 5:3 ijkin: “Makipiakan pakilistli akinmej amo chikauak inmiespíritu”. Pero nonmej tlajtolmej axkan amo moajsikamatij ikinon itech Traducción del Nuevo Mundo omotlajtolkopki nin texto ijkin: “Mayolpakikan akinmej kimatij moneki kitemoskej toTajtsin Dios”.

 Ken yotikitakej, nin kitlakaita itoka toTajtsin Dios, kijtoua tlen melauak uan kuali moajsikamati, pero onka okse tlamantli tlen kichiua okachi ipati Traducción del Nuevo Mundo: amo monemaka. Ikinon miakej maski amo kipiaj tomin para kikouaskej, ueli kitlajtoltiaj Biblia ika intlajtol.